Joshuwa 22:25 - Baibo Busansulushi Bwa Libuku Ili

²⁵ Amubone Mwaami Lesa wakabika Mulonga wa Joodani ayi ibe nyinsa pakati kesu amwebo nobamumukowa wakwe Lubeni alimwi anobakwe Gadi. Nkokwaamba ayi tamucite lubasu kuMwaami Lesa, sobwe.’ Munshila iyo bamulunyungu lwanu inga balengesha beesu kucileka kulambila Mwaami Lesa.

Joshuwa 22:25 ပူးပေါင်းရင်းမြစ်များ

2 Samwelo 20:1

Ono muGilugala mwakalinga cikwapululwa ca muntu wiitwa ayi Sheba mwanaakwe Bikili wamumukowa wakwe Benjameni. Sheba uyo wakalisha lupeenga akoolobesha ayi, “Taaku ceesu kuli Defedi, Tatubeteeko lubasu kumwanaakwe Jese! Nobene Isilaeli, musankwa womwi awomwi aaboolele kuŋanda yakwe!”

1 Baami 12:16

Bantu ndibakabona kwaamba ayi mwaami teshi abanyumfwile, bakoolobesha ayi, “Taaku ceesu kuli Defedi, Tatubeteeko lubasu kumwanaakwe Jese! Nobene Isilaeli amuboolele kumaanda anu! Amuleke wamulunyungu lwakwe Defedi alibonene!” Munshila iyi bene Isilaeli bakakaka Leoboamu kuba mwaami wabo.

1 Baami 14:16

Mwaami Lesa ulaakusuula bene Isilaeli boonse mukwiinga wa kubisha kwakwe Jeloboamu uyo wakalengesha bene Isilaeli kubisha.”

1 Baami 15:30

Ici cakacitika mukwiinga Jeloboamu wakasonkomona bukali bwa Mwaami Lesa, Lesa wa bene Isilaeli kwiinda mushibiibi isho nshaakacita akulengesha bene Isilaeli bamwi boonse kushicita.

Neyemiya 2:20

Mpomunyaawo ndakabakumbula ayi, “Lesa wa kwiculu ulaakutulengesha kuswitilila. Swebo sobasebenshi bakwe tutootalika kuyakulula alimwi, sombi mwebo tamucitewo nkusu pacipansha ca ndabala ya Jelusalemu nabi comwi alimwi taaku cintu nabi comwi nceenga mwaamba ayi ncanu.”

Kulumbaisha 16:5

NoBaami baLesa ndimwe mwakampa cipansha cangu ca cishi, ncakwiila ndimwe mwakampa ankomeshi ya shoolwe shangu shoonse. Nshiku shangu shitoosa shili mumaansaanu.

Milimo ya Batumwi 8:21

Taaku lubasu ndoocite mumulimo wesu uyu mukwiinga tooluleme pameenso akwe Lesa.

Joshuwa 22:24

“Ono tabwishi mbocibete ubo! Swebo ncetwakacitila bobulya nkuloonda kwaamba ayi bamulunyungu lwanu inga batalika kwaamba kubeesu ayi, ‘Ino mwebo muliiko lubasunshi kuMwaami Lesa, Lesa wa bene Isilaeli?

Joshuwa 22:26

Aboobo twakayaka cipaililo ici kuteshi ayi tunootentelaawo milambu nabi kupetaawo shipo,

Joshuwa 22:27

sombi ayi cibe kamboni pakati kesu amwebo alimwi abaabo beshi bakabeeko kunembo, kwaamba ayi tulaakunoolambila Mwaami Lesa kumusena wakwe usalalite akuleta nkuko milambu yakutenta, milambu imwi alimwi aya bwanabwankashi. Lyalo kunembo bamulunyungu lwanu teshi bakanokwaambila beesu ayi, ‘Tamubeteko lubasu kuMwaami Lesa.’

1 Samwelo 26:19

Ono nkambo nobaami bangu amukutike makani angu nemusebenshi wanu. Na nguMwaami Lesa walengesha ayi mumbukile, aatambule mulambu. Sombi na mbantu, Mwaami Lesa aabashingane! Mukwiinga bantanda kuswa mucishi ca Mwaami Lesa akundekela mumusena mweenga ndalambilabo balesa beensu.