Isaya 61:11 - Baibo Busansulushi Bwa Libuku Ili

¹¹ Ono bweenka bulongo mbobumenesha shishango, ee, bweenka muunda mbookusha shakashangwaamo, mbweeke ubo Mwaami Lesa Shinkusu shoonse mbweshi akaboneshe bululami abulemu bwakwe pameenso amishobo imwi yoonse.

Isaya 61:11 ပူးပေါင်းရင်းမြစ်များ

Matalikilo 1:11

Kuswawaawo Lesa wakaamba ayi, “Inshi aimene shishango isho shicata nseke, ashisamu shicata shisepo shicite mikoli kweelana amushobo wa comwi acomwi.” Mpeeke kwakaba bweenka ubo.

Kulumbaisha 72:16

Amukabe shili anga ngamaila shiinji mucishi cakwe coonse. Shishango ashikanefume patulundu. Ashikacate anga nsheesho sha kuLebanoni. Mandabala anene aakasule bantu, mbweeke bwiisu mbobuswite muluundu.

Kulumbaisha 72:3

Cishi ca tulundu ici aciletele bantu banu lusumpuko. Bantu bekalaamo abeende mubululami.

Kulumbaisha 85:11

Kushomeka kwa bantu kulaboneka pacishi ca panshi, sombi bululami bwakwe Lesa bulaswa kwiculu.

Lwiimbo lwakwe Solomoni 4:16

Pupa omuuwo wakumatwa awebo omuuwo wakumalenge! Amupuupile pamuunda wangu, kwaamba ayi bweema bubotu buyebo cishi coonse. Usunikwi wangu eese kumuunda wakwe akulya shisepo shiswa muli nguwo shiindaawo kubota.

Isaya 4:2

Ciindi cilaakushikila Musampi wa Mwaami Lesa ndyeshi ukabote akuba abulemu. Lyalo nsheshi shikanooswa mubulongo bwa cishi ico, shilaakusangalasha akuletela bulemu bene Isilaeli abo beshi bakacaale mboomi.

Isaya 45:23

Ndashomesha cakulumbila muliina lyangu nemwiine. Mulomo wangu waamba cakushinisha, kwaamba maswi eshi akabule kusandulwaawo akwaamba ayi, ‘Linungo lya muntu woonse lilaakufukama kunembo lyangu alimwi mulomo wa muntu womwi awomwi ulaakunoolumbila muliina lyangu.’

Isaya 45:24

“Mukwaamba liina lyangu balaakunokwaamba ayi, ‘MuMwaami Lesa mweenkabo, momuli bululami alimwi ankusu.’ ” Boonse abo bandwana balaakwisa kuli ndime akulenshekwa nsoni.

Isaya 45:8

“Webo oliculu kwiculu uko, losha bululami bweenka makumbi mbwaalosha mfula. Acalo cishi ca panshi acibutambule kwaamba ayi muli ncico lupulusho abululami shiboneke. Nebo neMwaami Lesa ndimeshi nengeshe ayi cicitike.”

Isaya 46:13

Bushiku bwakupulushikwa kwanu ndabuleta pafwaafwi. Ndushinisho tabubete kulaale, sobwe. Teshi nkacelweewo kukoma balwani bangu. Ndabala ya Jelusalemu ndaakwiipulusha onoono akuletela bene Isilaeli bulemu.”

Isaya 48:18

“Nebakanyumfwila akukonkela milawo yangu, naakwiinga luumuno lulakunkabo anga ngamaanshi mukalonga. Ncakwiila bululami nibwalinga kusefooka anga ngamaaba a mulweenge mbwaacita muloombe.

Isaya 58:11

Nebo neMwaami Lesa ndaakunoomutanjilila lyoonse. Ndaakunoomupa shoonse shiyandika mubuumi bwanu mucishi ici cibalilwabo lumwi. Ndaakunoomupa nkusu abuumi bubotu. Mulaakubabo anga ngumuunda utililwa kabotu, nabi kantupu katamani maanshi.

Isaya 60:18

Mucishi cako teshi mukanyumfwikewo tubili shankondo abucayi. Cishi cako teshi cikanyonyoolwewo tubili. Ndaakunookufunabo anga ndilinga liyumu, paceebo ceeco ulaakunumbaisha ceebo ndakupulusha.

Isaya 60:21

Lyalo bantu bako boonse balaakutalika kucita shiluleme. Acalo cishi cilaakuba cabo kwalyoonse alyoonse. Bantu bako nshishango shangu. Ncakwiila nebo nemwiine ndime ndakabalenga kwaamba ayi batondeshe bulemu bwangu.

Isaya 62:1

Ceebobo cakusuna Siyoni teshi ncale mulomo. Ee, ceebobo cakusuna Jelusalemu teshi ngumuneewo, kushikila bululami bukabale anga ncitubilishi cakumuyamaca, alimwi alwalo lupulusho lukamunike anga ncimunimweenge.

Isaya 62:2

Mishobo imwi yoonse ilaakubona bululami bwako. Bamaami boonse balaakubona bulemu bwako. Balaakunookwiita liina lipya ilyo Mwaami Lesa mwiine ndyeshi akakupe.

Isaya 62:7

Ee, amutolelele kushikila akalengeshe ndabala ya Jelusalemu kuba mboyakalinga akwiilengesha ayi ibe ndabala inene iyo bantu boonse njeshi bakanoolumbaisha.

Mateyo 13:23

Sombi mbuto shakalokela mubulongo bubotu mbantu abo banyumfwa maswi akwe Lesa akwaacita. Aboobo balacata shisepo, bamwi mwaanda, bamwi makumi osanwe alyomwi abalo bamwi makumi otatwe.”

Mateyo 13:3

Jesu wakabalwiita shintu shiinji mushikoshanyo. Wakaamba ayi, “Kwakalinga muntu umwi wakaya mukushanga mbuto.

Mateyo 13:8

Ono mbuto shimwi shakalokela pabulongo bubotu akucata shakacata. Shimwi shakacata mwaanda, shimwi makumi osanwe alyomwi ashalo shimwi makumi otatwe.”

1 Pita 2:9

Sombi mwebo muli bantu basalitwe, bapailishi ba bwaami, mushobo usalalite alimwi bantu bakwe Lesa. Wakamusala kwaamba ayi mukashimikile shamicito yankusu ya wooyo wakamwiita kuswa kumunshinshe akumwinjisha mumumuni wakwe ukankamika.