Isaya 51:3 - Baibo Busansulushi Bwa Libuku Ili

³ “Ndaakunyumfwila nkumbu ndabala ya Jelusalemu abaabo boonse bekala mumatongo a njiyo. Nakubi kwaamba ayi cishi ca njiyo nduyanga, ndaakucilengesha kuba anga muEdeni. Ncakwiila cilaakusandulwa kuba anga ngumuunda wa Mwaami Lesa. Bantu uko balaakunoosangalala akukondwa. Balaakunoolumba alimwi balaakunokwiimba.

Isaya 51:3 ပူးပေါင်းရင်းမြစ်များ

Matalikilo 13:10

Loti wakalangalanga akubona kwaamba ayi cinyika coonse ca Joodani, kuyabo akuSowa, cakalinga kucite maanshi abuumbi, anga ngumuunda wa Mwaami Lesa nabi cishi ca Ijipiti. Ici cakalinga nciindi Mwaami Lesa kaatana kunyonyoola mandabala anene a Sodoma a Gomola.

Kulumbaisha 85:8

Ndaakukutika kusheesho Mwaami Lesa nsheshi akaambe. Ulashomesha luumuno kuli ndiswe sobantu bakwe, kulilabo na twabula kuboolela kunshila shesu shabuluya.

Isaya 12:1

Pabushiku ubo mulaakwiimba ayi, “Ndanoomulumbaisha noBaami baLesa. Nabi mwakalinga kukalalite pali ndime, bukali bwanu sunu bwamana. Ono sunu mwankalika moyo.

Isaya 25:9

Ici caakucitika, muntu woonse ulaakwaamba ayi, “Ncakwiila nguLesa wesu! Twakacinka manungo muli nguwe, ono anaapa watupulusha. Ncakwiila nguMwaami Lesa! Twakacinka manungo muli nguwe, ono anaapa tulikondetwe alimwi tulisangalete ceebo watupulusha.”

Isaya 35:6

Balema ndyeshi bakatambale anga ninsefu. Abalo bacibuulu ndyeshi bakeembe nyimbo shakulumbaisha. Maanshi alaakukunka muliwesa. Ee, tulonga tulaakukunka muluyanga.

Isaya 41:16

Lusuko ulo mulaakulutukwita mwiculu mumuuwo awalo muuwo ulaakulutola. Ncakwiila cipuupu cinene cilaakulupalanganya. Aboobo mwebo mulaakusangalala muli ndime neMwaami Lesa ee, mulaakunumbaisha nebo neUsalalite wa bene Isilaeli.

Isaya 43:19

Amubone, ntoocita cintu cipya! Cintu ico citoocitika kale alimwi mulicibwene. Ntoopanga nshila muluyanga alimwi ntoobikaamo atulonga.

Isaya 44:26

Sombi na musebenshi wangu walaluka shakunembo, ee, na ndatuma shinkombe wangu kuyubulula nshendabamba, ndime nengesha shintu isho kucitika cancinencine. Ndime ŋamba pandabala ya Jelusalemu ayi bantu balaakuya mukwikalaamo alimwi. Ndaamba apacishi ca Juda ayi mandabala a mumo alaakuyakululwa alimwi. Ee, kuyakululwa nabi ngamatongobo.

Isaya 49:13

Amwiimbe cakusangalala mwebo nomaculu! Olobesha cakukondwa awebo ocishi ca panshi. Ashinyumfwike nyimbo kuli ndimwe notulundu ceebo Mwaami Lesa woombulusha bantu bakwe alimwi alaakunyumfwila nkumbu abo batoopenshekwa.

Isaya 49:19

“Cishi canu cakalinga canyonyooka alimwi calinga mumatongo. Sombi baakwisa bene mishaanu abo, cishi ico cilaakuceyabo kulaale kwaamba ayi bekaleemo. Lyalo abo bakalinga banyonyoola cishi canu balaakutombwetwabo kulaale.

Isaya 49:8

Mwaami Lesa utokwaambila bantu bakwe ayi, “Ciindi caakushikila cakumupulusha, ndaakumunyumfwila nkumbu akukumbula kusenga lucafwo kwanu. Ndaakumulama akumutabilila alimwi kwiinda muli ndimwe ndaakupanga cipangano abantu boonse. Ndaakumusuminisha kwikala alimwi mushipansha shanu sha cishi ico bulya cili mumatongo.

Isaya 51:12

Mwaami Lesa waamba ayi, “Nebo ee, nebo neenka ndime muumbulushi. Ceebonshi mutooloonda bantubo abo balibo anga mbwiisu,

Isaya 52:9

Amusangalale akwiimba nyimbo noonse pantu pomwi nomatongo a ndabala ya Jelusalemu. Mwaami Lesa woombulusha bantu bakwe kwiinda mukufuna ndabala ya Jelusalemu.

Isaya 61:10

Ndasangalala cankusu muMwaami Lesa. Moyo wangu ulisangalete abuumbi muli Lesa. Ceebo wamfwalika lupulusho anga ncakufwala ca peculu akumfwalika bululami anga ngumungaanjo. Wamfwalikabo bweenka shibwiinga nabi mupailishi mbwaalibotesha kumutwi, nabibo shibwiinga mbwaalibotesha ashakulibotesha sha makwebo.

Isaya 65:18

Amukondwe akusangalala kwalyoonse alyoonse pasheesho nsheshi nkaleenge, mukwiinga Jelusalemu ngweshi nkaleenge mulaakunoolibo kusangalala. Abalo bantu beshi bakanookalaamo balaakunooli bantu bakondetwe.

Jelemiya 31:25

Ndaakubooshamo nkusu sha baabo balemete akupa shakulya batoowisooka kunsala.

Esekelo 28:13

Wakalinga muEdeni, ee, mumuunda wakwe Lesa. Mabwe amakwebo oonse akalinga kukubotesha. Nkokwaamba ayi mabwe amakwebo eetwa ayi lubi, topasi alimwi aemalodi, kilisolaiti, onekisi alimwi ajasipa, safaya, tekoisi alimwi abelilu. Shakubikaamo mabwe aya shakalinga sha golodi. Pabushiku ndiwakalengwa ashalo ndishakapangwa.

Esekelo 36:11

Ndaakufusha mweelo wa bantu ashifubwa pali ndimwe. Balaakushalana alimwi akufula. Ndaakwikalika bantu pali ndiwe mbuli kalekale akukulengesha kuswitilila kwiinda pakutaanguna. Lyalo ndyeshi mukeshibe ayi nebo ndi Mwaami Lesa.

Esekelo 36:35

Bantu balaakunokwaamba ayi, ‘Cishi ici cakalinga canyonyoolwa, bulya cababo anga ngumuunda wa Edeni. Mandabala akalinga aba matongo, musena utacite bantu alimwi ayo akalinga anyonyoolwa, ono aba amalinga alimwi mulekala bantu.

Jowelo 2:3

Citoolya shishango cakumaninina anga ngumulilo. Kunembo lya ncico cishi cili anga ngumuunda wa Edeni. Sombi nkocitooswa kwababo anga nduyanga. Ncakwiila taaku nabi comwi citoocaalaako.

1 Pita 1:8

Ono nabi tamukwe kumubonawo kale, mulimusuni. Mulamushoma nakubi kwaamba ayi tamumubooni. Aboobo mulasekelela abuumbi cakubula amaswi eenga asansulula kusangalala uko,