Isaya 47:6 - Baibo Busansulushi Bwa Libuku Ili

⁶ Bantu bangu bakalinga bankalasha. Mpeeke ndakacita anga ndacileka kubabikaako maano. Lyalo ndakabaaba mumaansaako. Ncakwiila tookwe kubanyumfwilawo nkumbu. Wakalinga kucita shalunkutwe akubamacembele boonse.

Isaya 47:6 ပူးပေါင်းရင်းမြစ်များ

2 Samwelo 24:14

Mpomunyaawo Defedi wakaamba ayi, “Nebo ndi mumapensho anene abuumbi. Ono inga cabota kwaabwa mumaansa a Mwaami Lesa mukwiinga ngushinkumbu, kwiinda kwaabwa mumaansa a bantu.”

2 Makani 10:11

Mubalwiite alimwi ayi, ‘Bata bakamupa mikuli ilemu, ono nebo ndaakwiindilishaawo apo. Bakalinga kumuumisha musako, sombi nebo ndaakunoomuumisha mutatula!’ ”

2 Makani 28:9

Mulaluki umwi wa Mwaami Lesa wiitwa ayi Odedi uyo wakalinga kwikala mundabala ya Samaliya wakakumana abashilumamba bene Isilaeli abo bakalinga kuboolela abaabo mbobakacata busha kuswa kuJuda ndibakalinga pafwaafwi akwinjila mundabala ya Samaliya. Mpomunyaawo wakabaambila ayi, “Mwaami Lesa, Lesa wa bamashali banu bakulukulu wakakalala pabene Juda akulengesha ayi mwebo mubakome. Sombi wabona mbuli mbomwabacaya calunkutwe pakubalwana.

2 Makani 36:17

Lyalo Mwaami Lesa wakaleta mwaami wa bene Babiloni ayi abalwaane. Mwaami uyo wakacaya basankwa bacikula bwangu amipeeni muŊanda yakwe Lesa. Taakwe kushiyaako mwanike nabi munene, musankwa nabi mwanakashi. Ncakwiila Lesa wakaaba boonse mumaansaakwe Nebukadinesa.

2 Makani 36:20

Wakatola boonse abo bakacaalaawo kuBabiloni uko nkobakaya mukuba basebenshi bakwe abasebenshi ba bamulunyungu lwakwe kushikila bwaami bwa bene Pesha ndibwakaba ankusu.

Esila 5:12

Ono mukwiinga bamashali besu bakulukulu bakakalasha baLesa ba kwiculu, bakabalekelesha ayi bakomwe aNebukadinesa mwaami wa kuBabiloni, wa mucikoto ca bene Kaludeya, uyo wakanyonyoola Ŋanda iyi alimwi akutola bantu mubusha kucishi ca Babiloni.

Kulumbaisha 69:26

ceebo balapensha baabo mbomwakapa mulandu, akwiilika mapensho pabaabo mbomwakacisa.

Isaya 10:6

Asilya, ndiwe ndakatuma kuya mukulwana mushobo utalemeki ndime neLesa, mushobo uyo wakankalasha. Ndiwe ndakatuma kuya mukusaala buboni bwabo akubalyatoola anga ngamatombe mumikwakwa.”

Isaya 13:16

Bana babo bakateta balaakusansoolwa mutupanshapansha beene kabeebela. Maandaabo alaakusaalwa abamakaabo balaakucatwa ayi bakumanaabo cakubakakatisha mumeenso abo.

Isaya 14:17

Sa te ngowooyu wakalengesha cishi ca panshi kuba luyanga akukoma mandabala anene akalinga mumo? Sa te ngooulya watakalinga kwaangulula basha mbwaakalinga kucata ayi baboole kumishaabo?’

Isaya 14:6

iyo yakalinga kuumishikwa mishobo ya bantu cabukali alimwi cakutacilekaawo. Mubukali yakakoma mishobo iinji akwiipensha cakutaboolaawo pesule.

Isaya 43:28

Abalo baleli banu bakabisha musena wangu usalalite. Paceebo ceeco ndakalengesha bene Isilaeli kunyonyoolwa. Ncakwiila ndakalekelesha bantu bangu ayi bacobolwe.”

Jelemiya 50:42

Banyamuna mata amasumo, mbantu beshilunkutwe alimwi batacite nkumbu. Batooyoomabo anga ngamaaba apalweenge mbuli mbobatoosa kabatantite pamaaki. Balilibambite kale kwisa mukukulwana webo ondabala ya Babiloni.

Malilo 1:14

“Wakabona shibiibi shangu shoonse, akushaangilila pantu pomwi. Ee, kushaangilila pantu pomwi akunkulikisha munshingo. Ncakwiila ndakakopoka ceebo cakulemenwa. Mwaami Lesa wakangaba mumaansa a balwani mbootakoonshi kukoma.

Malilo 1:21

“Bantu balinyumfwite kutongela kwangu, sombi taaku nabi womwi wakuŋumbulusha. Balwani bangu boonse balinyumfwite shamapensho angu alimwi batoosangalala pashintu isho nshemwancita. Ndamusenga kwaamba ayi mulete bushiku ubo mbomwakashomesha kwaamba ayi abalo bakapenge bweenka mbondapenga.

Malilo 2:2

Cakutafwawo nkumbu, Mwaami Lesa wakanyonyoola mishi ya bamulunyungu lwakwe Jakobo yoonse. Mubukali bwakwe buyoosha wakawisha shiyubilo sha bamulunyungu lwakwe Juda. Wakawisha bwaami bwabo abaleli ba mumo mukubasebaanya.

Malilo 4:16

Mwaami Lesa mwiine ngowakabapalanganya, taababikiiko amaano, sobwe. Bapailishi taabapiwo bulemu, abalo bamaloba babo taabanyumfwiliwo nkumbu.

Malilo 5:12

Banaamwaami baangilila kumaansaabo akubaleleesha. Abalo bamaloba tabatoolemekwaawo, sobwe.

Esekelo 24:21

‘Lwiita mushobo wa bene Isilaeli ayi nebo neMwaami Lesa ndaamba ayi, ntooyanda kubisha Ŋanda yangu isalalite, ee, ciyubilo ico ncemulisumpwitaawo, cisangalasha meenso anu alimwi apo pali myoyo yanu. Bana basankwa abanakashi abo mbomwakashiya balaakucaikwa kunkondo.

Esekelo 28:16

Kwiinda mumakwebo ako ngowakalinga kucita mucishi coonse, wakaba shilunkutwe alimwi mucita shibi. Paceebo ceeco ndakakutanda kuswa kuKalundu kangu kasalalite. Ncakwiila kelebu wakukutabilila wakakutanda kuswa pakati ka mabwe abekabeka.

Obadiya 1:10

“Ceebo ca shimfulunganya nshemwakacita kubamakwabanu bamulunyungu lwakwe Jakobo, mulaakulenshekwa nsoni, alimwi mulaakunyonywetwabo limwi.

Obadiya 1:16

Bweenka mbuli mbomwakanwa munkomeshi ya bukali pakalundu kangu kasalalite, mbweeke ubo mishobo yoonse imushingulukite ilaakunoonwaamobo. Balaakunoocitekobo kunwa tibili bakanyonyooke cakutacaalaako.”

Sekaliya 1:12

Mpeeke munjelo wa Mwaami Lesa wakaamba ayi, “NoBaami baLesa Beshinkusu shoonse, mwakakalalila bene Jelusalemu aba mumandabala a muJuda mumyaaka ili 70. Ino mulaakubafwita lili nkumbu?”

Sekaliya 1:15

Sombi ndikalalite abuumbi pamishobo iyo ishiite cakuliiba. Mukwiinga ndindakalinga kukalalite paniini pabantu bangu, bantu balo abo bakeelikaawo mapensho pali mbabo.

Mateyo 7:2

Mukwiinga ubo bweenka mbomoombolosha bamwi alakwe Lesa mbweshi akamoomboloshe, amilawo njemusebensesha pakoombolosha bamwi, alakwe Lesa njeshi akasebenseshe pali ndimwe.

Dutolonomi 28:50

Balaakunooli bakali alimwi batacite nkumbu kubacembele nabi banike boonse.

Jemusi 2:13

Ceebo Lesa teshi akanyumfwilewo nkumbu pakoombolosha muntu utanyumfwili nkumbu babye. Sombi abo banyumfwila nkumbu tabeelete kuloonda loombolosho lwakwe Lesa.