Isaya 47:14 - Baibo Busansulushi Bwa Libuku Ili

¹⁴ “Bantu abo balaakubabo anga mbwiisu butyolookite. Aboobo mulilo ulaakubamana kubatenta. Tabakoonshi akulipulusha kuswa mumulilo utoonyaka. Ncakwiila tabakoonshi kulipulusha kuswa kunkusu sha mulilo. Makalangasha a nguwo teshi akulikasaasha, ee, teshi mulilo wakuya mukwikala pafwaafwi ayi uyote.

Isaya 47:14 ပူးပေါင်းရင်းမြစ်များ

Kulonga 5:12

Aboobo bantu bakapalanganinamobo muIjipiti kuya ciyandoola bwiisu.

Isaya 10:17

Lesa, ee, Mumuni wa bene Isilaeli ulaakuba mulilo. Ncakwiila Usalalite wa bene Isilaeli ulaakuba kubilima kwa mulilo uko kukonsha kutenta shoonse mubushiku bomwibo. Kutenta nabi myuumfwa ashisonsoonya.

Isaya 30:14

Ncakwiila lulapwayooka mutupanshapansha anga ninongo yapwaikwa cakutanenekela. Mpoyapwaikila palabula akapansha keenga kasebenseshekwa kulapula mulilo, nabi kutekwishako maanshi mumungomo.”

Isaya 33:14

Bamucita shibi muSiyoni baloonda, ee, batalemeki Lesa batootutumabo kuboowa. Batokwaamba ayi, “Anu ngani pakati kesu weenga wapuluka mumulilo ulya unyonyoola? Anu ngani pakati kesu weenga kaacili muumi mumulilo utamaani?”

Isaya 40:24

Ndibabikwabikwabo pabwaami, ee, ciindi ndibasalwasalwabo, bwaami bwabo kabutana kushimpa bunene, ulabafulita muuya wakwe, lyalo balamana nkusu anga mbwiisu. Ncakwiila kapupuulwa kalaboolulusha anga mbuungu.

Isaya 41:2

“Ngani wakasongaanya shinkusu ulya kuswa kwicwe alimwi akumulengesha kuya cikoma kuli koonse nkweenga waya? Ngani upa nkusu shakukoma bamaami amishobo ya bantu? Ncakwiila mipeeni yakwe ilabalengesha kubabo anga ndusuko. Ee, mata akwe alabalengesha kuululuka anga mbuungu.

Isaya 44:16

Misampi imwi ulakunkisha mulilo akutentelaawo nyama, weelya akukuta. Pakuyota ulaamba ayi, “Kubota mulilo uyu mwebo! Kutooswa cikasaashi cibotu abuumbi!”

Isaya 5:24

Ono aboobo bweenka mile ya bwiisu mboipya cakumaninina ee, bweenka bwiisu buyumu mbobululuma pakupya, mbweeke ubo muyanda wabo ulaakubola. Aalo maluba abo alaakuululuka anga ndusuko ceebo bakaka milawo ya Mwaami Lesa Shinkusu shoonse, ee, ceebo basuula maswi a Usalalite wa bene Isilaeli.

Jelemiya 51:30

Bashilumamba ba kuBabiloni bacileka kulwana, balishiitebo mushiyubilo shabo. Nkusu shabo shamana. Bababo mbuli banakashi. Maanda a mundabala iyo apya ampingilo sha kuminjililo ya njiyo, shamana kutyoloolwa.

Jelemiya 51:32

Shito shoonse shashinkilwa. Shitolo shoonse shatentwa. Bashilumamba boonse batutuma kuboowa.

Jelemiya 51:58

Lubumbu luyumu lwa ndabala ya Babiloni lulaakuwishikwa. Ayalo minjililo ya njiyo ilaamfu ilaakutentwa. Bantu batoolipenshabo kwakubula mpindu. Milimo yabo yoonse ilaakubabo mafuta akunyashisha mulilo. Nebo neMwaami Lesa Shinkusu shoonse ndaamba.”

Esekelo 15:7

Ndaakubapa mulandu. Nabi bakapuluka kuswa kumulilo womwi, mulilo umwi ulaakubatenta. Ndaakumana kubapa mulandu, ndyeshi mukeshibe ayi nebo ndi Mwaami Lesa.

Jowelo 2:5

Cisoshi citoosotooka peculu pakalundu akupanga coongo cili anga nca shikoci. Citootolooka bweenka bucita mulilo mubwiisu buyumu. Caliyala bweenka bucita bashilumamba balibambila kulwana.

Obadiya 1:18

Bamulunyungu lwakwe Jakobo balaakuba mulilo, abamulunyungu lwakwe Josefu balaakunoonyaka. Bamulunyungu lwakwe Esau balaakuba mabuba, mpeeke balaakubatenta akubalobya. Taaku weshi akapuluke mulunyungu lwakwe Esau.”

Naamu 1:10

Balaakucatwa mumyuumfwa akukolwa waini wabo. Balaakutentwabo anga mbwiisu buyumu.

Malaki 4:1

Mwaami Lesa Shinkusu shoonse utokwaamba ayi, “Ncakwiila bushiku bulaakushikila balisumpula abamucita shibi ndyeshi bakapye anga mbwiisu. Pabushiku ubo balaakulokota cakutacaalaako.

Mateyo 10:28

Mutaloondi baabo bacayabo mubili, sombi tabacikoonshi kucaya muuya. Amuloonde Lesa ukonsha kucaya mubili amuuya woonse mumulilo utamaani.

Mateyo 16:26

Ino mbubotunshi buliimo, na muntu waba ashintu shoonse shili mucishi ca panshi, sombi buumi bwakwe bwancinencine wabusowa? Taamuuwo! Nciinshi muntu nceenga walipila kwaamba ayi acane buumi bwancinencine alimwi?

Ciyubululo 18:21

Mpomunyaawo munjelo ucite nkusu wakabwesa libwe linene lili anga ndyakupelelaawo akuliwaala mulweenge kaamba ayi, “Mbweeke bulya ndabala inene ya Babiloni mbweshi ikanyonyoolwe, teshi ikabonekeewo alimwi!