Bene Lefi 4:26 - Baibo Busansulushi Bwa Libuku Ili

²⁶ Mpomunyaawo mafuta oonse ulaakwaatentela pacipaililo, bweenka mbwaatenta mafuta a banyama bacaikwa ayi njimilambu ya bwanabwankashi. Munshila iyi, mupailishi ulaakubenga mulambu wa cibiibi ca mutanjilili, aboobo ulaakulekelelwa.

Bene Lefi 4:26 ပူးပေါင်းရင်းမြစ်များ

2 Makani 29:24

Lyalo bapailishi bakacaya mpongo isho akutila bulowa bwa nshisho pacipaililo ayi ngumulambu wakulekelelwa shibiibi sha bantu boonse. Bakacita boobo mukwiinga mwaami wakaambilisha ayi bene Isilaeli boonse babengelwe milambu yakutenta alimwi ayakulekelelwa shibiibi.

Esekelo 43:22

“Pabushiku bwabili ulyeelete kubenga mpongo isankwa itacite kampenda ayi ngumulambu wakulekelelwa shibiibi. Ukasalashe cipaililo abulowa bwa njiyo bweenka mbweshi ukacite abulowa bwa mucende.

Bene Lefi 1:4

Ulyeelete kubika lyaansa pamutwi wakwe, lyalo ulaakutambulwa ayi ngumulambu wakukusha shibiibi shakwe.

Bene Lefi 12:8

“Ono na mwanakashi uyo waalilwa kucana mwanaambelele, ulyeelete kuleta mpolobe shobilo nabi nkulimba shobilo ayi yomwi ngumulambu wakutenta, alimwi imwi ngumulambu wakulekelelwa shibiibi. Alakwe mupailishi ulaakucita kweelana aMilawo ayi amusalashe, kuswawaawo ulaakunoosalalite.”

Bene Lefi 14:18

Lyalo mafuta oonse acaalaawo mulupaka lwakwe ulaakwaabika pamutwi wa muntu uyo. Munshila iyi ulaakucita kweelana amulawo wakusalasha.

Bene Lefi 15:15

Mpeeke mupailishi ulaakubengawo yomwi ayi ngumulambu wakulekelelwa shibiibi, alimwi imwi ayi ngumulambu wakutenta. Munshila iyi, ulaakucita kweelana aMilawo pakusalasha musankwa uyo.

Bene Lefi 17:11

Buumi bwa cintu cili coonse cuumi buli mubulowa. Anu nceceeco nebo neMwaami Lesa nceŋambila ayi bulowa boonse bunootilwa pacipaililo, kwaamba ayi shibiibi sha bantu shikushikwe. Nkokwaamba ayi bulowa ubo buli mbobuumi, bulakusha shibiibi.

Bene Lefi 19:22

Mpeeke mupailishi ulaakucita kweelana aMilawo pakusalasha, aboobo Lesa ulaakumulekelela.

Bene Lefi 3:5

Lyalo shoonse ishi bapailishi balaakushitentela pacipaililo, kubikaawo amilambu yakutenta. Bweema bwa mulambu uyo bulansangalasha neMwaami Lesa.

Bene Lefi 4:19

Kuswawaawo ulaakubwesa mafuta a mucende uyo oonse akwaatentela pacipaililo.

Bene Lefi 4:20

Kumucende mwaana uyo, ulaakucita mbomunya mbwaacita kumucende wa mulambu wakulekelelwa shibiibi. Aboobo munshila iyi, ulaakubenga mulambu wa shibiibi sha bantu, lyalo balaakulekelelwa.

Bene Lefi 4:31

Lyalo ulaakukusha mafuta a munyama uyu oonse, bweenka mbwaakusha mafuta a banyama bacaikwa ayi njimilambu ya bwanabwankashi. Mpeeke ulaakwaatentela pacipaililo kwaamba ayi bweema bukansangalashe neMwaami Lesa. Munshila iyi, mupailishi ulaakubenga mulambu wakukusha cibiibi ca muntu uyo, aboobo ulaakulekelelwa.

Bene Lefi 4:35

Kuswawaawo, ulaakukushamo mafuta oonse, bweenka mbwaakusha mafuta a mumbelele icaikwa ayi ngumulambu wa bwanabwankashi, akwaatentela pacipaililo pantu pomwi acipo ca shakulya cipekwa kuli ndime neMwaami Lesa. Munshila iyi, mupailishi ulaakubenga mulambu wakukusha cibiibi ca muntu uyo, aboobo ulaakulekelelwa.

Bene Lefi 5:10

Kuswawaawo, ndyeshi akabenge kayuni kabili ayi ngumulambu wakutenta kweelana amilawo. Munshila iyi, mupailishi ulaakubenga mulambu wa cibiibi ca muntu uyo, aboobo ulaakulekelelwa.

Bene Lefi 5:13

Munshila iyi, mupailishi ulaakubenga cipo ca cibiibi ca muntu uyo, aboobo ulaakulekelelwa. Fulaulo umwi woonse ngwa mupailishi kweelana ambocibete mumakani a cipo ca fulaulo.”

Bene Lefi 5:16

Ulyeelete kulipila sheesho nshaakaalilwa alimwi ulyeelete kwiilikaawo acomwi ca shosanwe ca sheesho nshaakaalilwa. Ulaakushipa mupailishi uyo weshi akabenge munyama ayi ngumulambu wa cibiibi ca muntu uyo, aboobo ulaakulekelelwa.

Bene Lefi 5:18

Ulyeelete kuleta mbelele isankwa itacite kampenda kali koonse kumupailishi ayi ngumulambu wakumana mulandu. Bubotu bwa njiyo bulyeelete kushibwa kweelana acipimo cakasuminishikwa. Lyalo munshila iyi mupailishi ulaakubenga mulambu wa cibiibi cakabisha muntu uyo mukuteshiba, aboobo ulaakulekelelwa.

Bene Lefi 6:7

Mupailishi ulaakubenga mulambu wa cibiibi ca muntu uyo, aboobo ulaakulekelelwa.”

Shakubelenga 15:25

Mpeeke mupailishi ulaakucita kweelana amulawo wakusalasha bene Isilaeli, abalo balaakulekelelwa mukwiinga tabakwe kubisha kashanga, alimwi bakaleta amulambu wakulekelelwa shibiibi shabo ayi ncipo ca cakulya kuli ndime neMwaami Lesa.

Shakubelenga 15:28

Lyalo mupailishi ulaakucita kweelana amulawo wakusalasha pameenso angu nebo neMwaami Lesa, kwaamba ayi asalashe muntu kucibiibi cakwe, mpeeke ulaakulekelelwa.