Amosi 5:7 - Baibo Busansulushi Bwa Libuku Ili

⁷ Mwamana katyenke mwebo nomoombolosha cakunyengelela, ee, mwebo nomoombolosha kuteshi mubululami.

Amosi 5:7 ပူးပေါင်းရင်းမြစ်များ

Kulumbaisha 125:5

Sombi abo bakonkela nshila shabo shitaluleme, Mwaami Lesa ulaakubatandila nkweshi kukanooli bamucita shibi. Luumuno alube pabene Isilaeli.

Kulumbaisha 36:3

Myaambo yabo yoonse njabubi alimwi njabubeshi. Kucita shintu shibotu, sha busongo, ncintu ncebakacilekabo kalekale.

Tushimpi 21:7

Lunkutwe lwa bamucita shibi lulabacaisha beene, ceebo balakaka kucita shintu shiluleme.

Isaya 1:23

Batanjilili bako mbaashu alimwi baleendelana abeepi. Ncakwiila mbantu basunishi makulo akutambula shipo. Tabeemikaniniwo banabanshiwa munkuta nabi kukutika na bamukalubinje banakashi baleta makani kuli mbabo.

Isaya 10:1

Mapensho kuli baabo bapanga milawo italuleme, ee, milasho yakulyatilila bantu bangu.

Isaya 46:12

“Ono amukutike nshentokwaamba mwebo nobantu beshicimpamya. Amukutike mwebo nomuyeeya ayi teshi mukapulushikwe onoono.

Isaya 5:20

Mapensho kubaabo baamba bubi ayi cibotu akwaamba cibotu ayi bubi. Balapilula munshinshe kuba mumuni, amumuni kuba munshinshe. Cilula balaamba ayi cilicite mise, cicite mise ayi cilalula.

Isaya 5:7

Isilaeli ngomuunda wa minyansa wa Mwaami Lesa Shinkusu shoonse. Ncakwiila bene Juda njeminyansa njaakashanga. Wakalinga kulangila ayi batoocita shiluleme, sombi ncaakabonabo mbucayi. Wakalinga kulangila koombolosha cakutanyengelela, sombi cakapola kumatwi akwe nkulila kwa baabo bakalinga kulyatililwa.

Esekelo 18:24

“Na muntu ululeme wacileka kucita shabululami akutalika kubisha akucita shintu shilensha bunya isho shicita bamucita shibi, sa inga waba abuumi? Sobwe, taakuuwo cintu ciluleme nabi comwi ico ncaakacita ceshi cikeebalukweewo. Ncakwiila ulaakufwa ceebo cakutashomeka kwakwe alimwi ashibiibi isho nshaakacita.

Esekelo 3:20

“Ono na muntu ululeme waswa mubululami bwakwe akutalika kucita shintu shibiibi, lyalo anebo ndamuletela mfumpu, ncakwiila ulaakufwa. Muntu uyo ulaakufwa ceebo ca shibiibi shakwe mukwiinga webo tookwe kumucenjesha. Shiluleme nshaakacita teshi shikayeeyekweewo tubili, Sombi awebo ulaakupekwa mulandu pabulowa bakwe.

Esekelo 33:18

Na muntu waswa kubululami bwakwe akutalika kucita bubi, ulaakufwa ceebo ca bubi bwakwe.

Osiya 10:4

Balashomesha kucita shintu shiinji, kushomesha cakulumbila cakubeca akupanga shipangano shiinji shitaaku mboshibete. Mwasandula bululami kuba kutalulama alimwi kutookula anga ninsaku mumuunda wakashabwa.

Amosi 2:3

Ndaakucaya muleli wa ncico pantu pomwi abacinenenene bakwe. Nebo neMwaami Lesa ndaamba.”

Amosi 3:10

Mwaami Lesa waamba ayi, “Bantu abo balasusha malinga ashintu shakusaala. Tabacishi kucita shintu shiluleme, napaceyi.”

Amosi 6:12

Sa maaki alacica patulundu twa myaandami? Sa muntu inga walima aŋombe palweenge? Sombi mwebo mwasandula koombolosha kwakutanyengelela kuba shikola akusandula shabululami kuba kulula kwiine kwiine.

Mika 3:9

Amukutike mwebo nobamatanjilili ba bamulunyungu lwakwe Jakobo, ee, mwebo nobaleli ba bene Isilaeli. Amukutike mwebo nomupatite koombolosha cakutanyengelela akusandula shiluleme kuba shitaluleme.

Abakuku 1:4

Milawo yamana nkusu. Koombolosha cakutanyengelela kwamana. Bamucita shibi batoolita masuku pamitwi ya baluleme. Munshila iyo koombolosha cakutanyengelela kwasendama.

Sefaniya 1:6

Ndaakunyonyoola baabo bacileka kukonkela ndime neMwaami Lesa ee, bantu abo batanyandooli nabi kunjipusha ayi mbalwiite nshila iluleme.”

Dutolonomi 29:18

Ono mucenjele ayi patakabi musankwa, mwanakashi, cipani nabi mukowa uli waano sunu weshi ukafutatile Mwaami Lesa, Lesa wesu akutalika kulambila balesa ba mishobo imwi. Ceebo ici inga caba anga ngumuyanda wasonsa akuba cisamu ca musuku mubi.