2 Makani 7:10 - Baibo Busansulushi Bwa Libuku Ili

¹⁰ Ngayi pabushiku bwamakumi obilo ashotatwe, mumweenshi wasanu ayobilo wakapalanganya bantu ayi baye mwabo mwabo. Bakaya kabakondetwe akusangalala mumyoyo ceebo ca shintu Mwaami Lesa nshaakacitila Defedi, Solomoni alimwi abantu bakwe bene Isilaeli.

2 Makani 7:10 ပူးပေါင်းရင်းမြစ်များ

1 Baami 8:66

Pabushiku bwasanu ashotatwe Solomoni wakabapalanganya. Boonse bakamulumba akuboolela mwabo mwabo kabasangalete mukwiinga wa shoolwe Mwaami Lesa nshaakapa Defedi musebenshi wakwe alimwi abantu bakwe boonse bene isilaeli.

2 Makani 29:36

Lyalo Mwaami Esekiya abantu bakwe boonse bakasangalala mukwiinga Lesa wakabacafwa kwaamba ayi bamanishe mulimo uyo cakufwambaana.

2 Makani 30:26

Mundabala ya Jelusalemu, mwakaba kusangalala kunene mukwiinga kuswabo kuciindi cakwe Solomoni mwanaakwe Defedi mwaami wa bene Isilaeli, takuna kucitikaawo kale cintu ca mushobo uyu.

2 Makani 6:41

“NoBaami baLesa, ono amunyamuke mwise kuŊanda yanu akwikalaamo kwalyoonse alyoonse pantu pomwi aLibokoshi lyanu lya Cipangano citondesho ca nkusu shanu. NoBaami baLesa, bapailishi banu ababe ankusu shakutanjilila bantu kulupulusho ayi bantu banu basangalale mububotu bwanu.

2 Makani 7:11

Mpeeke Mwaami Solomoni ndyaakamana kuyaka Ŋanda yakwe Lesa aŋanda yakwe ya bwaami, kumanisha shoonse nshaakalinga kuyeeya kucita,

2 Makani 7:9

Kusekelela kubengwa kwa cipaililo kwakatola nshiku shosanwe ashobilo kubikaawo akusekelela kwa Shimpaka uko kwakatola nshiku ashimwi shosanwe ashobilo. Pabushiku bwakweelaako, bakaba akusekelela kwakucala.

Neyemiya 8:10

Lyalo Neyemiya wakabaambila ayi, “Kamuya mukalye shakulya shibotu, akunwa shakunwa shamise. Mutumineko shimwi kuli babo batacite shibambitwe kale. Bushiku bwasunu mbushiku busalalite kuMwaami Lesa. Mutoongumani ceebo kusangalala uko kumupa Mwaami Lesa, nkokumupa nkusu.”

Kulumbaisha 100:2

Amulambile Mwaami Lesa cakukondwa. Kamwisa pameenso akwe akwiimba cakusangalala.

Kulumbaisha 105:3

Amusangalale akulambila liina lyakwe lisalalite. Ncakwiila myoyo ya bantu boonse bamulambila aisangalale.

Kulumbaisha 106:5

kwaamba ayi nkasangalale mukuswitilila kwa baabo mbomwakasala. Ee, kwaamba ayi anebo nkabeeko lubasu mukusangalala kwa mushobo wanu akumulumbaisha pantu pomwi abantu banu.

Kulumbaisha 32:11

Amusangalale mwebo nomululeme, ceebo ca shintu shamucitila Mwaami Lesa. Amwiimbishe cakusangalala mwebo nomucita shiluleme.

Kulumbaisha 92:4

NoBaami baLesa, milimo yanu ikankamika ilansangalasha. Ndeemba cakusangalala ceebo ca sheesho nshemucita.

Kulonga 18:1

Ono mupongoshi wakwe Mose musankwa wiitwa ayi Jetulo, mupailishi wa mucishi ca Midyani, wakanyumfwa shoonse Mwaami Lesa nshaakacitila Mose alimwi abene Isilaeli ndyaakabatanjilila kubakusha mucishi ca Ijipiti.

Esekelo 45:25

“Pakusekelela kwa Shimpaka uko kutalika pabushiku bwalikumi ashosanwe mumweenshi wasanu ayobilo, muleli uyo ulaakunoopa shintu sheenka sha milambu yakulekelelwa shibiibi, milambu yakutenta, shipo sha fulaulo alimwi amafuta a olifi.”

Milimo ya Batumwi 16:34

Mpomunyaawo wakabwesa Paulo aSailasi wabatola muŋanda yakwe akubapa cakulya. Lakwe abamuŋanda yakwe bakasangalala abuumbi mukwiinga ono bakashoma muli Lesa.

Milimo ya Batumwi 2:46

Bushiku abushiku bakalinga kubungana amoyo womwi muŊanda yakwe Lesa akulita pantu pomwi mumaandaabo amyoyo yakusangalala akuliceesha.

Dutolonomi 12:12

Mukanoosangalala pameenso a Mwaami Lesa, pantu pomwi abana banu, basebenshi banu alimwi abene Lefi bekala mumandabalaanu. Sombi mulyeelete kwishiba ayi bene Lefi teshi bakabe acishi cinebo beene, sobwe.

Dutolonomi 12:18

Mwebo abana banu pantu pomwi abasebenshi banu alimwi abene Lefi bekala mumandabalaanu mulyeelete kulita shipo isho pameenso a Mwaami Lesa, Lesa wanu mumusena womwi uyo wakulambililaamo uyo mwiine ngwaakasala. Mulyeelete kusangalala pashintu shoonse nsheshi mukanoosebensela.

Dutolonomi 12:7

Lyalo mwebo abamumaandaanu, mulaakunoolya akusangalala mushintu shibotu isho nsheshi mukanoosebensela pameenso a Mwaami Lesa, Lesa wanu mukwiinga wamupa coolwe.

Dutolonomi 16:11

Mwebo pantu pomwi abana banu, basebenshi banu, bene Lefi, baswamashi, bana banshiwa alimwi abamukalubinje banakashi abo bekala mumandabalaanu, mulyeelete kusangalala kunembo lya Mwaami Lesa, Lesa wanu kumusena womwi uyo wakulambililaako.

Dutolonomi 16:14

Mukasekelele pantu pomwi abana banu, basebenshi banu, bene Lefi, baswamashi, bana banshiwa alimwi abamukalubinje banakashi abo bekala mumandabalaanu.

Bene Filipi 4:4

Amusangalale muMwaami lyoonse alimwi ndaamba ayi, amusangalale!