2 Bene Kolinto 8:7 - Baibo Busansulushi Bwa Libuku Ili

⁷ Mbuli mbomwiindawo bamwi mushintu shoonse, mulushomo, mukushimikila, mulushibo, mukuyandishisha kucafwa alimwi amulusuno ndomucite pali ndiswe, ndisuni kwaamba ayi mwiindeewo bamwi amukucita mulimo uyu wa luse.

2 Bene Kolinto 8:7 ပူးပေါင်းရင်းမြစ်များ

Mateyo 25:22

Alakwe uyo wakapekwa shuulu shobilo wakashika akwaamba ayi, ‘Nkambo, nebo mwakampa shuulu shobilo, sombi amubone, ndakacaninawo shuulu shobilo ashimwi.’

Bene Loma 15:14

Nobene Klistuma nebo ndishinishite kwaamba ayi mulicite buumi bubotu alimwi mulishi shoonse nshemweelete kucita akulwiitana nobeene.

1 Bene Kolinto 1:5

Ceebo cakuba muli Klistu, Lesa wamupa bubile boonse bwa muMushimu mukwiinga mulishi Makani akwe Lesa alimwi mulakonsha kwaashimika.

1 Bene Kolinto 12:13

Mbweeke ubo, swebo soonse, baJuda nabi baswamashi bakunsengwe, basha nabi baangulukite, twakabombekwa muMushimu womwi kwaamba ayi tube mubili womwi alimwi soonse twakatambula Mushimu womwi mumyoyo.

1 Bene Kolinto 12:8

Mushimu Usalashi ulapa muntu umwi cipo cakwaamba cabusongo, sombi Mushimu weenka uyo ulapa muntu umwi cipo cakupanda maano bamwi.

1 Bene Kolinto 13:2

Na kaancite cipo cakwaamba maswi akwe Lesa, akwishiba lushinisho lushisitwe akuba alushibo lwa shintu shoonse alimwi na kaancite lushomo lukonsha kutuntulusha kalundu, sombi kaantacite lusuno, ingayi taaku mboombete.

1 Bene Kolinto 13:8

Lusuno ndwamuyayaya, sombi cipo cakwaamba maswi akwe Lesa cilaakweela, kwaamba milaka yeensu kulaakumana alwalo lushibo lulaakuloba.

1 Bene Kolinto 14:12

Ono ceebo cakwaamba ayi mulisuni abuumbi kutambula shipo sha Mushimu Usalashi, mulyeelete kweelesha kusebensesha bunene isho shicafwa bamucoonde kukula mulushomo.

1 Bene Kolinto 4:7

Anu ngani wakakupa bunene pabamwi? Sa te nguLesa wakakupa shintu shoonse nshoocite? Ino ono inga walisumpula buyani pashintu shakupekwabo?

2 Bene Kolinto 7:7

Teshibo kupola kwakwe kwakatuyumyayumya, sombi amakani ngaakaleta ambuli mbomwakamuyumyayumya. Wakatulwiita ayi mwayeeya kumbonaawo, mbomwakoongumana ceebo ca ndime alimwi ambomulibambite kunjimikanina. Bulya ndisangalete abuumbi.

2 Bene Kolinto 8:6

Nceceeco ncetwakalwiitilisha Taitasi ayi ulyeelete kumanishisha mulimo wa luse ngwaakatalika kale pakati kanu.

2 Bene Kolinto 9:14

Aboobo bananoomupailila calusuno lwiine lwiine ceebo ca luse lwiindaawo Lesa ndwaamutondesha.

2 Bene Kolinto 9:8

Lesa ulakonsha kumupa shoolwe shiinji abuumbi ayi lyoonse munoocite shintu shakulicafwa nobeene ashintu shiinji shakucitisha milimo yoonse ibotu.

Bene Efeso 4:29

Mutabi beshimyaambo ibiibi, sombi kamwaambabo maswi acafwa, akonsha kuyaka akuleta ciyandika kwaamba ayi boonse batoonyumfwaako bacanemo bubotu.

Bene Filipi 1:11

Buumi bwanu bulaakutondesha micito ya bululami, iyo iswabo kuli Jesu Klistu, kwaamba ayi boonse balemeke akulumbaisha Lesa.

Bene Filipi 1:9

Ndapaila ayi mukomene mulusuno, lushibo lwancinencine alimwi akunyumfwishisha kwanu kwa shintu shoonse,

2 Bene Tesalonika 1:3

Nobamakwesu, tulyeelete kulumba Lesa ceebo canu lyoonse. Cililuleme abuumbi kuli ndiswe kulumba Lesa ceebo lushomo lwanu lwakomena abuumbi alimwi kusunana kwanu kutooya ciindaawo.

2 Timoti 2:1

Ono omwanaangu liyumyeyumye muluse ndootucite muli Klistu Jesu.

Bene Ebulu 12:28

Alimwi ceebo tulatambula bweene ubo butatenkaanishikwi, tulyeelete kulumba Lesa, kumulambila munshila imukondelesha alimwi akumulemeka abuumbi.

1 Pita 1:22

Ono bulya mbomwasalasha myoyo yanu mukunyumfwila shalushinisho ambuli mbomusunene abashominyinaanu, mulyeelete kusunana amyoyo yoonse.

2 Pita 3:18

Sombi mwebo amutolelele kukula muluse alimwi alushibo lwa Mwaami Jesu Klistu, Mupulushi wesu. Bulemu bube kuli nguwe bulya alimwi amuyayaya! Ameni.

Ciyubululo 3:17

Webo ulaamba ayi, Ndimubile, ndicite buboni buunji, taaku nceentacite. Sombi tooshi kwaamba ayi ulipengete alimwi ulalensha ankuumbu! Uli mukandu, moofu alimwi uli matakosha.