2 Bene Kolinto 4:4 - Baibo Busansulushi Bwa Libuku Ili

⁴ Bantu abo tabashomi ceebo Satana uyo uli anga ngulesa pacishi ca panshi, wabika maano abo mumunshinshe. Ulabakasha kubona mumuni utoomunika pali mbabo, uyo mumuni uswa muMakani Abotu aamba shabulemu bwakwe Klistu. Klistu ngootondesha Lesa mbwaabete.

2 Bene Kolinto 4:4 ပူးပေါင်းရင်းမြစ်များ

1 Baami 22:22

Mwaami Lesa wakeepusha ayi, ‘Ulaakumucenjeeka buyani?’ Mushimu wakakumbula ayi, ‘Ndaakuya mukulengesha balaluki bakwe Aabu kwaamba shabubeshi.’ Mwaami Lesa wakaamba ayi, ‘Koya ukamucenjeeke. Ulaakucikonsha.’ ”

Kulumbaisha 50:2

Bulemu bwakwe Lesa bulabala kuswa muSiyoni, ndabala inene iyo ibotu cakushika peela kubota.

Isaya 6:10

Wakandwiita alimwi ayi, “Lengesha bantu aba bushicimpamya, alimwi ubashinke matwi abo akucala meenso abo. Kwabula boobo inga kababonesha akunyumfwishisha, akuba amyoyo yakusuna kukutika kwaamba ayi basandukile kuli ndime ayi nebo mbashilike.”

Mateyo 13:22

Ono isho shakalokela pamyuumfwa mbantu abo banyumfwa maswi akwe Lesa, sombi shintu sha mucishi ca panshi, akusuna bubile, shilafulunganya maswi akwe Lesa, aboobo tabacati shisepo.

Joni 1:14

Mpeeke Liswi ili lyakaba muntu akwisa mukwikala pakati kesu, kaaswite luse alushinisho. Twakabona bulemu bwakwe ubo mbwaakatambula ceebo wakalinga Mwaana eenkabo wa baIshi.

Joni 1:18

Taaku muntu wakabonaawo kale Lesa, sombi Mwanaakwe wakashalwabo eenka, uyo usunikwi abuumbi abaIshi, ngowakalengesha ayi ashibikwe.

Joni 12:31

Ono cashikila ciindi cakwaamba ayi bantu ba pacishi ca panshi boomboloshekwe. Ono Satana mweendeleshi wa panshi pano wakomwa.

Joni 12:35

Jesu wakabaambila ayi, “Mumuni ucili amwebo ciindi ciniinibo. Amweende, mumuni kauciliiko kwaamba ayi munshinshe utesi pali ndimwe. Mukwiinga uyo woonse weenda mumunshinshe taashibi nkwaatooya.

Joni 12:40

“Lesa wakabapofosha akuyumya mitwi yabo, cakwaamba ayi tabakoonshi kubona ameenso abo nabi kunyumfwishisha amyoyo yabo. Nabibo kusandukila kuli ndime ayi mbashilike.”

Joni 12:45

Uyo woonse ubona ndime, ingayi wabona awooyo wakantuma.

Joni 14:30

Teshi ntolelele kwaamba amwebo mukwiinga mwaami wa mucishi ca panshi utoosa. Taacite nkusu pali ndime,

Joni 15:24

Nintakwe kucita shintu pali mbabo isho shitana kucitawo kale muntu nabi womwi, naakwiinga tabacite mulandu pacibiibi cabo. Nabi bakabona shintu shoonse ishi, bakatupata soonse, nebo abaTa.

Joni 16:11

Ulaakubashinina pacikani ca boomboloshi mukwiinga Satana muleli wa pacishi ca panshi woomboloshekwa kale.

Joni 8:12

Jesu wakaambila baFalisi alimwi ayi, “Ndi mumuni umunikila bantu boonse. Uyo woonse unkonkela teshi akeende mumunshinshe napaceyi, sombi ulaakuba amumuni upa buumi.”

Milimo ya Batumwi 26:18

Ukabacalule meenso kwaamba ayi babone, ukabakushe mumunshinshe kwaamba ayi benjile mumumuni alimwi akubakusha munkusu shakwe Satana ukabenjishe munkusu shakwe Lesa. Kwiinda mulushomo lwabo muli ndime, Lesa ulaakubalekelela shibiibi shabo akuba amusena pakati ka bantu bakwe Lesa basalitwe.’

Milimo ya Batumwi 26:23

Usalitwe wakwe Lesa ulaakucaikwa akuba mutaanshi kubushikwa kuswa kubafu kwaamba ayi akashimikile baJuda abaswamashi bakunsengwe ayi inga bapulushikwa. Mpeeke lupulusho lulaakuba anga ngumumuni kuli mbabo.”

1 Bene Kolinto 10:20

Sobwe, sombi ntokwaamba ayi shipo shipekwa pashipaililo sha bakunsengwe shilapekwa kubashikaswa kuteshi kuli Lesa. Ono nebo nshisuni kwaamba ayi mwebo munoocatana abashikaswa.

2 Bene Kolinto 2:11

Tulishi bucenjeshi bwakwe Satana alimwi tatusuni kwaamba ayi atwiinde kumaano.

2 Bene Kolinto 2:12

Ono ndindakashika kuTulowasi mukushimikila Makani Abotu akwe Klistu, ndakabona kwaamba ayi Mwaami wakancalwita mulyango wakusebensa.

2 Bene Kolinto 3:11

Ceebo na ico cakekalabo ciindi ciniini cakalinga kucite bulemu, ino ico ceshi cikekalilile cilaakweela kuli?

2 Bene Kolinto 3:14

Ncakwiila maano abo alicalitwe ceebo kushikila sunu cisani ceenka ico cilafweka maano abo ndibabelenga Cipangano ca Kale kale. Cisani cilakushikwabo na muntu wekala muli Klistu.

2 Bene Kolinto 3:18

Swebo soonse sotucite shiwa shitafweketwe shisani, tuli anga nshilola shitondesha bulemu buswa kuMwaami. Tutoosandululwa kuba mbuli nguwe, kuswa mubulemu bumwi kuya mubuumbi bwiindaawo, kwiinda muMwaami uli nguMushimu.

2 Bene Kolinto 4:6

Ceebo Lesa wakaamba ayi, “Akube mumuni umunika kuswa mumunshinshe.” Lesa eenkabo uyo ngoolengesha mumuni kumunika mumyoyo yesu, kwaamba ayi twishibe bulemu bwakwe bumunika pameenso akwe Klistu.

Bene Galatiya 1:4

Klistu wakalibenga ceebo ca shibiibi shesu ayi atufuune kububi bwa mucishi cino ca panshi, kweelana akuyanda kwakwe Lesa Ishiwesu.

Bene Efeso 2:2

Paciindi ico mwakalinga kweenda munshila sha bantu bakunsengwe. Mwakalinga kukonkela mweendeleshi wa bashikaswa wa muluuwo, mushimu ubiibi uyo weendelesha bantu batanyumfwili Lesa.

Bene Efeso 6:12

Mukwiinga tatutoolwana abantu, sombi tutoolwana ankusu sha mishimu ibiibi ya mwiculu, iyo yeendelesha alimwi icite nkusu, mishimu iyo yeendelesha bantu munshiku shino shili anga ngumunshinshe.

Bene Filipi 2:6

Lakwe wakalingabo nguLesa lyoonse, sombi taakwe kuba amuyeeyo wakwaamba ayi eelane aLesa munkusu shakwe mwiine.

Bene Kolose 1:15

Lesa utaboneki wakaboneka kwiinda muli Klistu. NgoMwanaakwe Lesa mutaanshi wiinda pashilengwa shoonse.

Bene Kolose 1:27

Lakwe wakasuna kwaamba ayi baswamashi bakunsengwe boonse beshibe maswi ayo ancinencine. Ngamaswi abotu abuumbi, abubile bwa bulemu bwakwe ayo akalinga kushisitwe kubantu boonse. Maswi aya ngakwaamba ayi Klistu uli muli ndimwe alimwi ngoomupa kulangila kwa kutambula bulemu bwakwe Lesa.

1 Timoti 1:11

Kwiisha uko kulacanika muMakani Abotu ayo akabikwa mumaansaangu kuswa kuli Lesa ulemekwa shicoolwe.

Taitasi 2:13

Bulya nditutoolindila bushiku bwa coolwe, ubo bulemu bwakwe Lesa munene alimwi aMupulushi wesu Jesu Klistu, ndyeshi bukaboneke.

Bene Ebulu 1:3

Muli nguwe mulaboneka kumweka kwa bulemu bwakwe Lesa alimwi ncecikoshanyo ciine ca bube bucite Lesa. Ngoolengesha shintu shoonse mucishi ca panshi kuba bweenka mboshibete kwiinda mumaswi akwe a nkusu. Ndyaakamana kulengesha Lesa kulekelela shibiibi sha bantu, wakaya kwiculu mukwikala kululyo lwakwe Lesa Shinkusu shiindaawo.

Bene Ebulu 6:4

Inga tacicitikiiwo cakuboosha bantu bakasowa lushomo ayi basanduke kuswa kushibiibi shabo alimwi. Lesa wakalinga wabamunikilaawo kale, bakalinga basomawo kale cipo ciswa kwiculu, alimwi abalo bakalinga batambula Mushimu Usalashi.

2 Pita 1:19

Aboobo tweshiba cancinencine ono ayi maswi akaamba balaluki bakulukulu ngalushinisho. Nkokwaamba ayi inga cabota na mwaakonkela mukwiinga ali anga ndilampi litoonyaka mumusena muli munshinshe kushikila bwaca alimwi kushikila mumuni wakwe Klistu ukamunike mumyoyo yanu anga ngwa ntanda,

1 Joni 2:11

Sombi uyo upatite mubye uli mumunshinshe. Uleenda muli nguwo alimwi ankwaatooya taakwishi ceebo munshinshe wamulengesha kupofola.

1 Joni 2:8

Nakubi boobo mulawo uyu ngoontoomulembela ngupya mukwiinga lushinisho lwa nguwo lulaboneka muli Klistu alimwi amuli ndimwe. Ono munshinshe utooya cimana alimwi mumuni wancinencine watalika kale kubala.

1 Joni 5:19

Tulishi kwaamba ayi tuli bakwe Lesa nabi bantu bamwi boonse batokweendeleshekwa aMubiibi.