1 Pita 3:4 - Baibo Busansulushi Bwa Libuku Ili

⁴ Sombi akube kwa mukati mumoyo. Uku nkokulibotesha kutamaani, kwa buumi bwakuteekanya akulibombya. Buumi bwa mushobo wooyu Lesa mbwaabona ayi bulicite makwebo abuumbi.

1 Pita 3:4 ပူးပေါင်းရင်းမြစ်များ

Kulumbaisha 131:2

Sombi moyo wangu ndookalika akuumusha bweenka buumuna mwaana uli mumaansa a banyina. Ndushinisho mbweeke ubo moyo wangu mbooumwite mucaamba cangu.

Kulumbaisha 147:6

Mwaami Lesa ngoosumpula baliceesha, sombi ulalyatoola bamucita shibi.

Kulumbaisha 149:4

Ceebo Mwaami Lesa ulakondwa mubantu bakwe, ulalemeka baliceesha mukubapa nkusu shakukoma.

Kulumbaisha 25:9

Abo balibombya ulabatanjilila munshila shiluleme, alimwi ulabeeisha mbobeelete kweenda.

Kulumbaisha 45:13

Amubone nabwiinga wakubwalo mbwaaboneka kabotu muŋanda ya bwaami. Amubone mbwaaelelwa mushakufwala shakatungilwa kumwi agolodi!

Kulumbaisha 51:6

Ndushinisho mwebo mulisuni muntu ushomeka, paceebo ceeco amunjiishe kuba musongo lyoonse.

Isaya 11:4

Sombi ulaakunokoombolosha bataaku mbobabete cabululami. Ulaakunokoombolosha bakandu ba mucishi ca panshi cakutanyengelela. Bantu batanyumfwi ulaakunooboomishabo kumaswi, bamucita shibi ulaakubacaya.

Isaya 29:19

Ncakwiila bantu balibombya balaakusangalala alimwi muMwaami Lesa. Ee, bakandu balaakusangalala muWooyo Usalalite wa bene Isilaeli.

Isaya 57:15

Usumpukite Lesa wakwiculu uyo, Lesa walyoonse alyoonse ucite liina lisalalite waamba ayi, “Nebo ndekala kwiculu kumusena usalalite, sombi ndekala abaabo balibombya alimwi basanduka kuswa kushibiibi shabo kwaamba ayi mbabooshelemo lushomo lwabo akulangila.

Isaya 61:1

Mushimu wa Mwaami Lesa Shinkusu shoonse uli pali ndime, mukwiinga wansala kwaamba ayi nshimikile makani abotu kubakandu. Wantuma kwaamba ayi njumyeyumye batyongooka mumyoyo akwaambilisha lwaanguluko kubaabo baangitwe, akucita kwaamba ayi boofu balashe.

Jelemiya 51:59

Iyi ninkombe nebo neJelemiya njendakaambila Selaya mutanjilili wa bashilumamba, mwanaakwe Neliya, mwishikulu wakwe Maseiya, ndyaakaya kuBabiloni aSedekiya mwaami wa bene Juda mumwaaka wane wa bwaami bwakwe.

Mateyo 11:29

Amulipatike lijoko lyangu, mwiiye kuli ndime ceebo nebo ndimoote alimwi ndimubombu mumoyo. Paceebo ceeco, mulaakucana kookesha mumyoyo yanu.

Mateyo 21:5

“Ambila bantu bamundabala ya Siyoni ayi, ‘Amubone Mwaami wanu utoosa kuli ndimwe cakulibombya, ee, ulitantite pambongolo, ncakwiila pamwanaambongolo.’ ”

Mateyo 23:26

Mwebo nobaFalisi boofu, amutaangune kusansha shili mukati munkomeshi, apalo pansengwe ndyeshi patube.

Mateyo 5:5

“Balicite coolwe abo balibombya, mukwiinga Lesa ulaakubapa cishi ncaakabashomesha.

Luka 11:40

Mwebo nobantu nobaluya! Sa te uyo wakalenga pansengwe ngowakalenga amukati?

Luka 16:15

Sombi Jesu wakabaambila ayi, “Mwebo mulalibonekesha kubantu ayi muliluleme, nakubi boobo Lesa ulishi myoyo yanu. Mukwiinga cintu coonse bantu ncibaamba ayi ncibotu abuumbi, kuli Lesa taaku ambocibete.

Bene Loma 1:23

Bakacileka kulambila Lesa utafwi, balalambila shibumbwabumbwa shiboneka anga mbantu bafwa nabi bayuni, banyama ba muluundu, ntaale ashintu shimwi sha mushobo uyo.

Bene Loma 2:29

Anu muJuda wancinencine ngooyo muJuda mumoyo. Akwalo kupalulwa kwancinencine nkooko kwa mumoyo kucitikwa aMushimu Usalashi. Kupalulwa uku takucitwi ceebo muntu wacita bwaamba Milawo. Muntu wa mushobo wooyo umulumbaisha nguLesa, teshi bantu, sobwe.

Bene Loma 6:6

Tulishi kwaamba ayi buumi bwesu bukulukulu bwakaloba Jesu ndyaakapopwa pamucilingano kwaamba ayi Lesa anyonyoole buumi bwesu bwakusuna kubisha kwaamba ayi tutabi lyobilo basha ba bubi.

Bene Loma 7:22

Ndakondwa amoyo wangu woonse ceebo ca Milawo iswa kuli Lesa.

2 Bene Kolinto 10:1

Nebo nePaulo, ntooyanda kumusenga ono. Bantu balaamba ayi na kaandi amwebo ndalibombya, sombi na nkaantabete amwebo ndamukalalila. Kwiinda mukulibombya ankuumbu shakwe Klistu ntoomusenga ayi

2 Bene Kolinto 4:16

Nceceeco ncetutabooleli pesule. Nakubi kwaamba ayi mibili yesu itooya cicembela, sombi Mwaami utooya citufushishako nkusu muMushimu bushiku abushiku.

Bene Galatiya 5:23

kulibombya alimwi akulitibuka. Taaku mulawo ukasha shintu ishi.

Bene Efeso 4:2

Amuliceeshe, mulibombye alimwi amukomenye myoyo lyoonse. Kamulekelelana kwiinda mulusuno.

Bene Kolose 3:12

Mwebo muli bantu abo Lesa mbwaakasuna akumusala kwaamba ayi mube bantu bakwe. Paceebo ceeco, mulyeelete kuba beshinkumbu, bacita kabotu, baliceesha, balibombya akuba bantu bacata myoyo.

Bene Kolose 3:3

Mukwiinga mwebo mwakafwa, aboobo buumi bwanu bulishisitwe pantu pomwi aKlistu muli Lesa.

1 Bene Tesalonika 4:11

Muyeeyo wanu lyoonse aube wakwikala buumi bwa luumuno, kwiilibala ncootoocita akulicanina shiyandika bweenka mbotwakamulwiitawo kale.

2 Bene Tesalonika 3:12

Bantu abo tutoobaambila akubacenjesha muliina lya Mwaami Jesu Klistu ayi bacileeke kwikala buumi bwa kunyonyonganya, akutalika kulisebensela beene.

1 Timoti 2:2

Mupailile baami abaabo bali mubweendeleshi kwaamba ayi twikale muluumuno cakulemeka Lesa abuumi bubotu.

2 Timoti 2:25

muntu ulibombya pakulwiita beshikumupikisha, mukwishiba kwaamba ayi mpashi Lesa inga wabapa ciindi cakusanduka kuswa kushibiibi shabo akwishiba shalushinisho.

Taitasi 3:2

Ubalwiite ayi batanokwaambila muntu shibiibi nabi womwi, sombi kuba beshiluumuno, beshikulibombya alimwi bacite bulemu kumuntu woonse.

Jemusi 1:21

Aboobo amushiye shibiibi shoonse nshemushibite abubi ubo buli mumyoyo yanu. Amutambule cakulibombya maswi ayo Lesa ngaakashanga muli ndimwe, ayo akonsha kumupulusha.

1 Pita 1:23

Lesa wakamupa buumi bupya, kuteshi kuswa kumbuto inyonyooka, sombi itanyonyooki, iyo ili ngomaswi akwe Lesa ayo aliiko alimwi eshi akanooliikobo lyoonse.

1 Pita 3:15

Sombi mumyoyo yanu kamulemeka Klistu mukwiinga ngoMwaami wanu. Munoolibambite lyoonse kusansulwita muntu uli woonse weenga wamwiipusha pakulangila nkomucite, sombi kamusansulula cakulibombya alimwi akumulemeka.

1 Samwelo 16:7

Nakubi boobo Mwaami Lesa wakaambila Samwelo ayi, “Utaboni mbwaaboneka nabi ciimo, mukwiinga nebo ndamukaka kuba mwaami. Nebo neMwaami Lesa nshilangilishi muntu pashintu shilangilisha bantu. Mukwiinga bantu balabonabo pansengwe, sombi nebo neMwaami Lesa ndabona mukati, ee, mwiine mumoyo.”