Jemisi 5:7 - Godido Vua Maeje

⁷ Uviarafa none igie, ni mauike oe vafaena oenoekinu E Ireobo fu ruakuveno ije samuafo. Ni izege e juae mevo bu juare mena sone oe vafaena samua karikoga ire boeje bune duivoga bu masiva ije vierafefo.

Jemisi 5:7 ပူးပေါင်းရင်းမြစ်များ

Matiu 16:27

Ijadufuo maeje Ema ijiebuo Fari ige nare maza radekuma ijia anera none ijena una Asoe none ijadufuo sanaema ijiakuma ruake. Areme na uri e besubesu izege bu kenoeva ijia giakinu ire maeje ro ire ise ije buone rejiadufuo.

Matiu 16:28

Ro vua ige naka ma kuariavo fiefo. Iviama e gure ja kariva ijia e gue jaka oe furidufuo. Ro gue ja ni uria kariva ijia Ema ijiebuo Fari ige na una Kini rena e boege samuagiakiro roga ja giekono kiae.

Matiu 24:27

Ijadufuo maeje ire vebu fu karamone e boeje ae sakae igia kariva ije bu gavo. Ijadufuo vame besu ijiege Ema ijiebuo Fari ige na una ruovo ije e boeje buka gieke.

Matiu 24:44

Ijadufuo jadua nika maza boeje samuakinu oenoefo. Ijadufuo maeje Ema ijiebuo Fari ige na una ruovo ije jaka naebe samuaeva ijia na ruakono kiae.

Ruki 18:8

Naka ma kuariave E Ireobo fube saroekiro fuka migegire ifejiake. Rove maza ije Ema ijiebuo Fari ige na una ruovo ije ja vierafe e boeje bube uria na ma vierafevo na giake? Ijadufuo nika vame izege bara amune fu kema ijiege mimatanoefo. Janika maza boeje Godi baname isoena kuara unamunakina fu ifejiaga e ani jone bube vame jone kame arafiriano kiae.

Ruki 21:27

Areme maza ijia Ema ijiebuo Fari ige na una amite uve ijia daro ro sanaema none ijiakuma roga ja gieke.

Ruki 8:15

Ro una uije ije sakae ma ijia arina mukoe tavuana fo kiravo ijeja e ije bu Godido vua ije mukoreigia fiena abe oe buone ijia gikikimana vierafenoevo ijene. Areme buka uri giriesana vame maeje ijuoebaki rekinu karinoega kairafa gue nijasiakinu kuariaga budua uri ijiege renoekinu Jesu ma vierafevo ijene.

Joni 21:22

Ro Jesu fu una kuae, Fuje na ivia kuako a ni uria igia oenoeke na una rono kuaebitie na ijiege reke. Ro a irerefuo ije dabe ireobo vierafeme? Ijiege a vierafemo ije arekiro uri makae none ijia nuvediena ige na kenoejo ijiege kenoeno kuae.

Joni 21:23

Fu ijiege kuaramoga e Jesu ma vierafevo bu vua ije e Jesudo vua fiemo be fube baronedufuo fu kuaema ije fie. Rove Jesu fu naebe kuae e ije fube baronekiro fu ijia fivakono kuae. Ro fume kuae, Na vierafe fu ijia ni uria fike na una ruakuvabitie na ijiege reke ro a irerefuo ije abe ireobo vierafemono kuae?

Romeni 15:4

Ro vua boeje bu isuibe buki akae ijia isoeva ije bu no nijasuokuae isoe ijadufuo no vua ije dana vierafeke. No vua ije ma vierafekuva vua ijiebe no ifejuo ro ejafuoga nobe mamoeke. Ro noka giriesana uri ma vierafero Godi fu maza rade ire ma bino nuvuone rejuokiro no ijiege vierafekinu zinune ke vake.

Romeni 2:7

Ijadufuo e gue bu vierafe buka maza boeje mimatana vame maeje ijiaru kenoekuae vierafei. Bu vierafe buka kairafa buone ro e binobino ije ifejiaga Godi fu bu aroriana nidosiakiro bu ije vierafei. E ije ijiege kenoejo ije Godi fu buone oemaremo ijadufuo fu kiaga bu maza rade ma karivake.

1 Koriniti 1:7

Ijadufuo Kavene Akae ije fune daro fuone binobino vekinu ja vajiae. Ijadufuo ja maza ije Jesu Kuraesi fu una ume igia ari ruadufuo ije jaka ijafunekinu samuave.

Garesiani 5:5

Ro noeje no Godido Kavene ijare daro muoko no ma vierafevo ijadufuo noka Godido nidua ijia maturaena karikuae no ijadufuo samuave.

Garesiani 6:9

Ijadufuo nobe vame maeje no kenoejo ijia aemueva igege kenoedufuo. Ijadufuo maeje no naebe arekuva no maza ije Godi fu nijaema ijia ire maeje gue kedufuo.

Korosiani 1:11

Ro no Godi baname isoega fu daro fuone ka ma ireobo ije miaga ja irufui bino bu jone ruovo ijia ka uria giriesana kabuaekabuaeki kenoeke. Ro kuke maza boeje jaka oe jone ijia Asoe nuvuone oemarejanoeke. Ijadufuo maeje fure ja karauniae ijadufuo jane manido ja rade ire ije fu are fuone sanaema ijia kanafui naema ije gue kedufuo.

1 Tesaroniasi 1:3

Ijadufuo maeje ja Jesu Kuraesi ma vierafevo ijadufuo jaka mukoreigia oetuanamikinu i jone menoeve. Ro kuke ja izege E Ireobo Jesu Kuraesi fu una ruadufuo ije ja vierafevo ije ja arevo baki ro jaka giriesana ma vierafenoeve.

1 Tesaroniasi 2:19

Ro oe nuvuone noka ja vierafevo ijadufuo maza boeje noka joefuo E Ireobo oemareve. Ijadufuo Jesu fu una ruakuma no irerefuo no nidua fuone ijia irena aroekarakinu oemareke? Ire bino baki ro jane jare vua fuone maeje no abe kuariavo jane mukore fiena ma vierafe. Ijadufuo E Ireobo fu una ruakuma ja noena nidua fuone ijia ireke.

1 Tesaroniasi 3:13

No vierafe E Ireobo fuka daro miaga ja Godi Asoe nuvuone ijadufuo nidua ijia oe maturaena karinoeke. Ja ijiege maturaena oenoekinu maza ije E Ireobo Jesu fu e akae fuone ijena una ruadufuo ije samuake.

Jemisi 4:11

Uviarafano jade uviarafa jone ijiebuo ise ije giana kuaenoevo. Ro erare fu e guebuo vua kuae ro ise buone bu reva ije dabe kuaenoeno ije fune Godido akae ije dabe tuaseme. Ja akae ije abe tuasekuva ije ja akae ije mukoreigia irinavo baki. Ro kuke ja e ije fu akae ije nijaema ije irinavo baki.

Jemisi 5:10

Ro uviarafano ni e ije bu Godido vua vierafena kuaevo ije bu E Ireobo ijadufuo ive ijia vua kuaenoeva ije vierafefo. Buka uruvanaigia isejavae rove buka sone oe vafaena mauikeigia karinoeve.

Jemisi 5:3

Ro kuke ire gorodikiro siriva jone zine igege iravo ije bune ziribijiae. Ro sinuome ije ziribijiaema ijiebe rade maza ije Godi fu fina e boeje ijiebuo ise bu reva ije mazie giamo ijia una kuderiana miane igege rena ire boeje naena ja kame isekafiake. Ijadufuo maeje ume igia sinuome zaraezaraeki ja kevo ije fuka rade ire miane igege naena ja sakiakiro samuagiame.