Zoɛl 2:3 - NYANMIƐN NDƐ'N 1998

³ Like kwlaa nga be to i'n, be saci i, kpɛkuun bé sin wa lika wlolo'n ngbɛn yɛ ɔ ka lɛ kɛ sin wie bɔ ɔ'a yra lika ɔ'a sin'n sa. I blɛ nga bɔ be nian sin-man'n, asiɛ'n su lika'n ɔ ti bo kɛ Edɛni liɛ'n sa. Sanngɛ kɛ be sinnin'n, be sin wa'n ɔ yoli nyrɛnnɛn ngbɛn. Afin lika ng'ɔ kali bé sin, ɔ yoli kɛ aawlɛ flɛnnɛnnɛn sa. B'a yaci-man like fi lɛ.

Zoɛl 2:3 ပူးပေါင်းရင်းမြစ်များ

Bo Bolɛ 13:10

Lɔt mɛnnin i nyin'n su. Ɔ wunnin kɛ Zurdɛn lika kpɛkplɛkpɛ'n ɔ ti nzue bo lika. Kɛ ɔ ´yo sɔ'n, wuun Anannganman nian nunnun-man Sodɔm nin Gomɔr. Kɛ ɔ fɛ i lika sɔ'n nun lele b'ɔ fa ju Zɔar'n, lika'n ti klanman kɛ Anannganman i fie wie sa, i kunngba'n ɔ ti kɛ Ezipt lika'n sa.

Bo Bolɛ 2:8

Kpɛkuun Anannganman Nyanmiɛn dili fie Edɛni wia afiliɛ lɔ lika'n nun, nan ɔ'a fa sran b'ɔ yili'n ɔ'a sie i lɔ.

Jue Mun 50:3

E Nyanmiɛn'n su ba, ɔ muɛn-mɛn i nuan. Sin kun b'ɔ yra like kɔlikɔli'n dun mmua i nyrun, aunngban dan kun fita bo sin yiɛ i.

Jue Mun 97:3

Sin kun dun mmua i nyrun. Sin sɔ'n ɔ di i kpɔfuɛ'm be kwlaa sin yiɛ i.

Ezipt Lɔ Tulɛ'n 10:15

Be katali asiɛ wunmuan'n su, kpɛkuun asiɛ'n su dunnin tuun. Be dili ijre nin waka mma nga nzraama'n ɔ'a saci-man be'n be kwlaa. I sɔ'n ti Ezipt mɛn wunmuan'n nun'n, nnya wie fi ɔ'a ka-man waka'm be su, yɛ ijre wie fi ɔ'a ka-man fie'm be su .

Ezipt Lɔ Tulɛ'n 10:5

Be wa kata asiɛ wunmuan'n su sa tuun, ɔ man be su wun-man asiɛ ba kpa'n kun, ninnge nga be luali annzɛ nga be tali'n, nga bɔ nzraama'n ɔ'a saci-man be'n, lalo'm be wa saci i kaan sɔ'n ngba. Be wa di bo nun waka'm be nnya'n kwlakwla.

Ezai 14:17

?Sran b'ɔ yo man mɛn'n ɔ kaci kɛ aawlɛ flɛnnɛn sa'n, sran b'ɔ saci klɔ mun'n, sran b'ɔ kplin-man su kɛ ɔ ´yaci i bisuafuɛ'm be nun'n, sran sɔ'n yɛ ɔ o yɛ?»

Ezai 15:6

Afin Nimrim nzue ba'n ɔ'a wie nun, afin ijre'n ɔ'a wu kee. Ijre mɔnnɛn fi nun-man lɛ kun, nnya-nnya fi nun-man lɛ kun.

Ezai 33:4

Kɛ ɔ ko yo sɔ'n, wuun ninnge fɛnlɛ'n ɔ'a ju. A wun ninnge fɛnfuɛ mun sa-a ɔ waan lalo mun-ɔn. Be tɔ ninnge'm be su gblu wuun be su fɛn, be ti kɛ aɛcɛ kpanngban wie mun sa.

Ezai 51:3

Anannganman wa fɔnvɔ Siɔnfuɛ mun, be lika'm bɔ be bubuli'n ti be ´yo i annvɔ. Ɔ ´yo man be lika nga ɔ'a kaci kɛ aawlɛ flɛnnɛn sa'n, ɔ ´yo kɛ Edɛni lika'n sa. Yɛ ɔ ´yo man lika kee sɔ'n ɔ ´kaci kɛ i bɔbɔ Anannganman i fie'n sa. Siɔnfuɛ'm be ´bo sro, be klun ´jɔ. Be ´to Nyanmiɛn manmanlɛ jue mun, yɛ be ´bo ninnge nga be tɛ mun be ´fa yi Nyanmiɛn i ayɛ.

Ezai 9:18

Anannganman b'ɔ sie mɛn wunmuan'n, i ya dan'n ti mɛn'n ɔ'a sɔ kɛ sin sa. Sɛ e ´kwla se'n, sin'n ɔ'a di sran mun. Sran fi yaci-mɛn i wiengu lɛ.

Ezai 9:19

Sɛ be tɔ fama su-ɔ, be kpɛ be di, sanngɛ awe yaci-man be kunlɛ. Sɛ be nyɛn i bɛ su lɔ-ɔ, be su di, sanngɛ be ku yi-man. Sran kun nyɛn i bɔbɔ i sa nin-ɔn, ɔ su di i nnɛn'n.

Zeremi 5:17

Be ´di amun ninnge'n kwlakwla. Be ´di ɔ fie su lɔ aliɛ mun nan b'a di klɔ wa liɛ mun. Be ´kun amun mma mun, i yasua mun o, i bla mun o, be ´kun be. Be ´kun amun nnɛn mun, i boli mun o, i bua mun o, i nannin mun o, be ´kun be. Be ´saci amun vinyi fie mun nin amun figie fie mun. Amun lɔ klɔ nga be sisi bé wun b'ɔ man an bu i kɛ sa kwla nyan-man amun'n, be ´fa alɛ saci be.

Ezekiɛl 36:35

Be ´se kɛ: ‹Mɛn ng'ɔ sacili mlɔnmlɔn'n ɔ'a kaci kɛ Edɛni fie'n sa, yɛ i klɔ nga be sacili bɔ be tɔli srolo'n, bɔ be bubuli'n, b'a si bé wun yɛ b'a tran nun.›

Amɔs 7:4

Anannganman Nyanmiɛn'n yili sa uflɛ nglo kleli min. Sɛ n ´kwla se'n, ɔ flɛli sin'n kɛ ɔ wa di i jɔlɛ'n. Sin'n i dan b'ɔ ti'n ti, asiɛ'n bo lɔ nzue'n ɔ o wielɛ. Izraɛl mɛn wunmuan'n kusu o yralɛ.

Abakik 1:6

Babilɔnifuɛ bɔ be si-man aunnvuɛ'n, bɔ be ti aeliɛ tɛfuɛ'n, bɔ be su wa wlu mɛn'm be nun asiɛ wunmuan su'n, m'an fa be, be o balɛ. Be ´ba be wiengu'm be lika'm bé sa nun delɛ .

Zakari 7:14

N kannin be bo n guɛli i nvle nga be bɔbɔ be si-man nun laa'n be nun. Be mɛn'n tɔli bliin, sran fi kɔ-man lɔ, yɛ sran fi fin-man lɔ ba-man. Be bɔbɔ be yoli man be mɛn sɔ'n bɔ i nun yo-man fɛ ngowa'n, ɔ kali lɛ ngbɛn.»