Zoɛl 2:2 - NYANMIƐN NDƐ'N 1998

² Cɛn sɔ'n ɔ ´yo aosin tritritri, cɛn sɔ'n ɔ ´yo nzue mlanlɛ lika sa tuun yɛ ɔ yo bɔlɛ ufue lika sa munnduun. Kakaa fa fa nga be ba'n, be sɔnnin kpa, be yo wlɛ. Kɛ be ´ba'n, lika'n lu kɛ sɛnzɛ'n su tɔ oka'm be su sa. I sɔ like liɛ'n, be nian wun-man wie asiɛ'n su le, i kusu be su ko wun-man wie asiɛ'n su le mlɔnmlɔn kun.

Zoɛl 2:2 ပူးပေါင်းရင်းမြစ်များ

Jue Mun 10:6

Ɔ se i klun lɔ kɛ: «Sa fi nyan-man min le nan kɛ ɔ ´yo-ɔ ɔ'a yo-ɔ. Nyrɛnnɛn su tɔ-man mín su le.»

Jue Mun 97:2

Nyanmiɛn ble kun bo sin yiɛ i. Sa nuan su yolɛ'n nin ndɛ nanwlɛ dilɛ'n bé su yɛ i sielɛ'n taka-a.

Ezipt Lɔ Tulɛ'n 10:14

Be truli Ezipt mɛn wunmuan'n nun, kpɛkuun be trantrannin lika'n kwlaa nun. Be sɔnnin kaka kpa, be nian wun-man be kaka sɔ le, yɛ be su wun-man be kaka kɛ nga sa kun le.

Ezipt Lɔ Tulɛ'n 10:6

Be wa yi wɔ awlo'n sa piɛ. Be ´yi ɔ mantanfuɛ mun nin Eziptfuɛ'm be kwlaa bé sua mun sa piɛ. Kɛ ɔ fɛ i ɔ nannan'm be blɛ su lele b'ɔ fa ju ndɛ yɛ'n, be nian wun-mɛn i sɔ nyrɛnnɛn kɛ nga sa le.› » Moiz jasoli famiɛn'n wun lɛ, yɛ ɔ ɔli-ɔ.

Ezipt Lɔ Tulɛ'n 20:21

Izraɛlfuɛ'm be kali mmua lɔ, sanngɛ Moiz liɛ'n, ɔ wunngeli sin wɛnsrɛn kpikplikpi bɔ i nun yɛ Nyanmiɛn wo'n i wun lɔ.

Ezai 5:30

I cɛn sɔ nun'n, nganniɛn dan kun ɔ ´tɛ sran sɔ'm be dunman nun wie, ɔ ´tɛ kɛ jenvie yɛ ɔ su bo sa. Kɛ be ´nian mɛn'n, aosin tuun yɛ be ´wun i-ɔ. Nyanmiɛn ble likiliki kpa kun ´kata wia'n i nyrun.

Ezai 8:22

I sin, kɛ be nian asiɛ nin-ɔn, be ´wun kɛ nyrɛnnɛn nin aosin tuun, ɔ nin srɛ b'ɔ kun sran'n yɛ be o su-ɔ. Be ´su bé bo yi i aosin tikitiki'n nun.

Zeremi 13:16

An `manman Anannganman amun Nyanmiɛn'n. Ɔ'a yo-man sɔ-ɔ, aosin'n ´ba. Ɔ man amún ja ´kpla oka mun lika tuun'n ti. Ɔ'a yo-man sɔ-ɔ, amun ´minndɛ kɛ aliɛ'n `cɛn lele ngbɛn. Anannganman ´yo man lika'n ɔ kaci aosin tritri kpa. Ɔ ´kaci i kɛ nyanmiɛn ble tuun'n sa.

Zeremi 13:6

I osu'n cɛli lɔun kpa, kpɛkuun Anannganman'n waan: «Jaso kɔ Efrat nuan lɔ ko fa bé bo kplo bɔ n seli wɔ kɛ a ko fa fia lɔ'n.»

Ngwlɛ Yilɛ 1:12

Ɔ se ekun kɛ: «Amun kwlaa bɔ amun sin wa'n, amun `nian! ?Afɛ ng'ɔ nin min liɛ'n sɛ'n, amu'an wun wie le? Kɛ Anannganman fɛli i ya dan'n, ɔ kleli min nun.

Ezekiɛl 32:7

Kɛ a ´wu cɛ'n, n ´kata nyanmiɛn ng'ɔ la nglo lɔ plaii'n su. N ´nuan nzraama mun. N ´fa nyanmiɛn ble'n n kata wia'n i nyrun. Anglo'n ɔ su kpaja-man kun .

Ezekiɛl 34:12

N ´tian bé nuan kɛ bua su nianfuɛ ɔ tian i nnɛn nga b'a bo b'a sanndi'n bé nuan'n sa. Cɛn nga bɔ nzue tɔ'n, lika kwlaa nga be ɔli lɛ'n, n ´ko kunndɛ be.

Ezekiɛl 38:9

Wɔ nin ɔ sonja mun nin sran kpanngban nga be o wɔ sin'n, amun nin sran sɔ mun ´kun. Amun ´ba be su kɛ aunngban dan wie sa. Amun ´utu be, kɛ nyanmiɛn ble wie b'ɔ kata lika'n su sa.

Daniɛl 12:1

«I blɛ sɔ nun'n, Mikaɛl b'ɔ ti anz'm be su kpɛn'n, b'ɔ sasa ɔ nvle nunfuɛ mun'n, ɔ ´ba. Blɛ sɔ'n wa yo awlaboɛ blɛ. I sɔ awlaboɛ liɛ'n, kɛ ɔ fin cɛn bɔ mɛn'n wo lɛ lele b'ɔ ´fa ju ndɛ yɛ'n, be nian wun-mɛn i sɔ le. Blɛ sɔ nun'n, ɔ nvle nunfuɛ bɔ be klɛli be dunman nguan fluwa'n nun'n be ´fite nun .

Daniɛl 9:12

Like nga ɔ waan a ´yo e nin é su kpɛnngbɛn nga be sie ye'n, a yoli. A fa nyrɛnnɛn yili e bɔ e o Zerizalɛm'n e su. I sɔ nyrɛnnɛn liɛ'n, be nian wun-mɛn i wun su mɛn'n i lika uflɛ le.

Zoɛl 1:6

Kakaa'm be akpasua kun ɔ'a de e mɛn'n. Be yo wlɛ, be sɔnnin kpa. Be je'm be ti kɛ asɔmɔli je sa. Be je dandan'm be ti kɛ asɔmɔli bla'm be liɛ'n sa .

Zoɛl 2:25

Anannganman'n waan: «Amun ninnge nga be sacili'n, n ´sie be osu. Amun fie su ninnge nga ndro'm be dili, nga lalo'm be wa sacili be'n, nga klannan nin aɛcɛ mun be dili'n, i sɔ ninnge liɛ nga kakaa fa ɔklɔɔ nga n sunmannin be'n be wa sacili be'n, n ´sie be kwlaa be osu.

Zoɛl 2:5

Be fin oka kun su be tu be kpɛn kun su. A ti be ngan sa-a, ɔ waan wuun alɛ kunlɛ kakaklolo mun yɛ be su kpla-a, annzɛ sin wie yɛ ɔ'a tɔ ijre kee wie nun yɛ ɔ su tɛtɛ-ɔ. Kɛ be ´ba sa-a ɔ waan wuun alɛ kunfuɛ kpakpa'm wie bɔ b'a lɔngɔ su be su kɔ alɛ kunlɛ-ɔ .

Zoɛl 3:4

Wia'n ɔ ´kaci ble tuun, yɛ anglo'n kusu ɔ ´blo youun kɛ mmoja sa. I sin nan Anannganman i cɛn dan sroesroe'n ɔ'a ju .

Amɔs 4:13

I yɛ ɔ yili oka mun nin aunngban nin-ɔn. Sa ng'ɔ wa yo'n, ɔ dun mmua bo su kle sran mun. Ɔ cɛn aliɛ yɛ ɔ san aliɛ. I dunman'n yɛlɛ Anannganman, b'ɔ ti mɛn wunmuan'n i Nyanmiɛn'n .»

Sofoni 1:7

An `muan amún nuan Anannganman Nyanmiɛn nyrun, Anannganman'n i ya cɛn'n ɔ'a mantan koko. Anannganman'n ɔ'a siesie tɛ yilɛ'n, be nga ɔ ko flɛ be'n, ɔ'a yo be saun .

Zakari 14:6

I sɔ blɛ nun'n, lika'n su kpaja-man, lika'n ´yo munnduun kɛ bɔlɛ sa, i kusu nán bɔlɛ-ɔ.

Matthieu 24:21

Afin blɛ sɔ'n nun'n, nyrɛnnɛn'n ɔ ´yo dan bɔ kɛ ɔ fin mɛn'n i bo bolɛ'n nun lele ndɛ, i wunsu nian yo-man le yɛ i wunsu su yo-man kun le .

Marc 13:19

Afin blɛ sɔ'n wa yo nyrɛnnɛn blɛ kun bɔ kɛ ɔ fin lalaa bɔ Nyanmiɛn yili mɛn'n lele b'ɔ ´fa ju ndɛ'n, i wunsu nian yo-man le, yɛ i wunsu su yo-man kun le .

Mmla'n 32:7

Man amún wla kpɛn sa ng'ɔ juli laa'n bé su. Amun `bu lalafuɛ blɛ'n i akunndan. Amun `usa amún si mun man be koko lalafuɛ nun sa mun kle amun. Amun `usa kpɛnngbɛn mun man be kan wie kle amun.

Hébreu 12:18

Amun liɛ'n nán oka wie bɔ be kɛn i-ɔ ɔ yo ye'n bɔ sin dan nin bɔlɛ tukuu, nin aosin, ɔ nin aunngban dan o su'n i bo yɛ amun ɔli kɛ Izraɛlfuɛ'm be liɛ'n sa-a.

Jude 1:13

Be ti kɛ jenvie'n b'ɔ bo gbuugbuu'n sa, be nyannzuɛn sa nga be yo'n ti kɛ i nyin su nglo'n sa. Be ti kɛ nzraama b'ɔ tu kɔ'n sa, lika nga Nyanmiɛn fa sieli be kɛ be tran nun tititi'n, yɛlɛ aosin tritritri kpa'n.

Sa nglô yile 9:2

Ɔ tikeli kunman dan sɔ'n su, sin wɛnsrɛn dan kpa fin nun fiteli. Wɛnsrɛn'n b'ɔ fin kunman sɔ'n nun fiteli'n, ɔ dunnin wia'n nin nyanmiɛn su lɔ'n tuun .