Zoɛl 1:13 - NYANMIƐN NDƐ'N 1998

¹³ Nyanmiɛn nyrun jranfuɛ mun, an `wla bajɛ tralɛ, amun `koko. Amun bɔ be jran Nyanmiɛn nyrun'n, an `bo awuyomo. Nyanmiɛn i junman difuɛ mun, an `tran awlaboɛ nun kɔnguɛ lele man aliɛ'n cɛn amun. Yɛlɛ kɛ like nga be fa ko mɛn i i sua nun lɔ'n, ɔ nin nzan nga be guɛ i ase be mɛn i'n, ɔ nun-man nun sɔ kun.

Zoɛl 1:13 ပူးပေါင်းရင်းမြစ်များ

2 Samiɛl 12:16

David srɛli Nyanmiɛn mannin bakan'n. Ɔ cili nglɛmun. Kɔnguɛ kɛ ɔ ju i sua lɔ'n, ɔ la asiɛ wun.

1 Famiɛn Mun 21:27

Kɛ Akab tili i sɔ ndɛ'n, ɔ titili i wun tralɛ'm be nun. Ɔ wlali bajɛ tralɛ, kpɛkuun ɔ kpɛli srɛ nun. Ɔ fa bajɛ'n yɛ ɔ la-a. Ɔ nanti sa blɛblɛblɛ.

Ezai 22:12

I cɛn sɔ nun'n, Anannganman b'ɔ sie mɛn wunmuan'n, ɔ seli amun kɛ amun `sun yɛ amun `la kondo, i waan amun `kpu amún ti'n su yɛ amun `wla bajɛ tralɛ.

Ezai 61:6

Sanngɛ amun liɛ'n, be ´flɛ amun kɛ Anannganman i Nyrun Jranfuɛ mun. Be ´se kɛ amun liɛ'n, amun ti Nyanmiɛn'n i junman difuɛ mun. Amun ´di nvle-nvle'm be nunfuɛ'm bé bo ninnge'm bé su. Yɛ be nyrun bɔ be lɛ i'n, ɔ ´kaci amun liɛ .

Zeremi 4:8

I ti-ɔ, an `wla bajɛ tralɛ. An `sun, an `man sunlɛ jue'n su, afin é wun ya dan bɔ Anannganman fali'n, ɔ nian wie-mɛn i klun.

Zeremi 9:10

Anannganman waan: «N ´yo man Zerizalɛm nunnun mlɔnmlɔn. Ɔ ´yo nsoso'n be lawlɛ. N ´yo man Zida klɔ'm be tɔ srololo. Sran fi su tran-man be su kun.»

Ezekiɛl 21:12

Kɛ be ´usa wɔ kɛ: ‹?Ɔ yo sɛ ti yɛ a kplin-ɔn?› Tɛ be su kɛ: ‹Yɛlɛ kɛ ndɛ kun su ba, sran'm be kwlaa be anwlɛn'n ɔ wa kpɔtɔ be klun. Sran'm be kwlaa bé sa'm be ´glɔ be wun, sran'm be su nyan-man anwlɛn kun. Bé ja nannglunman'm be ´sisi be wiengu. Yɛ ɔ ba lɛ-ɔ, ɔ'a ba!› » Anannganman Nyanmiɛn'n yɛ ɔ kan sɔ-ɔ.

Ezekiɛl 27:31

Be ´kpu bé ti'n su ɔ dunman nun. Be ´wla bajɛ tralɛ. Be anwlɛn'n ɔ ´kpɛ be klun, be ´sun wɔ ti. Be ´bo awuyomo, be kɔnviabo ´bo be kpɔlɛ.

Ezekiɛl 7:18

Be ´wla bajɛ tralɛ, yɛ srɛ'n ´kun be kpo. Be kwlaa be ´wun nyannzuɛn. Be kwlaa be ´yi bé ti'n.

Ndɛ Nga Nyanmiɛn I Nuan Ijɔfuɛ Oze Kannin'n 9:5

?Anyia cɛn'n b'ɔ ti Anannganman'n i cɛn'n, sɛ ɔ ju'n, amun ´yo i sɛ?

Zoɛl 2:12

Anannganman wan yoo: «An `sa amun sin bla mín sin. Kɛ ɔ o yɛ'n, i blɛ nian sin-man. Amun `tu amun klun bla, an `ci nglɛmun, an `sun, yɛ an `kpata min.»

Zoɛl 2:14

Atrɛkpa-a, ɔ ´kwla kaci aniɛn, kpɛkuun ɔ ´yo amun ye. Kpɛkuun siɛn'n, an ´kwla fa ble nin nzan be ko mɛn i.

Zoɛl 2:17

Man Nyanmiɛn nyrun jranfuɛ'm bɔ be jrɛn i nyrun'n, be sun i sua'n i nyrun gbaun'n nin i sɔwlɛ'n be afiɛn'n nun lɛ. Man be srɛ Nyanmiɛn se kɛ: «Anannganman, ɔ sran mun yɛlɛ ye, si e aunnvuɛ. Ɔ liɛ yɛlɛ ye, nán yo man e wun nyannzuɛn nan nvle kun'm be nunfuɛ'm be srisri e be se kɛ: ‹?Ai, be Nyanmiɛn liɛ kpa'n, ɔ o nin?› »

Kalɛ 28:14

Nzan nga be guɛ ase'n kusu, litri nsan yɛ be `fa sie i nannin tola kun su-ɔ, litri nnyɔn yɛ be `fa sie i bua nene kun su-ɔ, yɛ litri kun yɛ be `fa sie i bua nga ɔ'a kpɛ cro'n kun su-ɔ. Kɛ amun wlu anglo uflɛ kwlaa nun'n, tɛ ng'ɔ fata kɛ amun yi'n yɛ ɔ o lɛ-ɔ. Amun `yi i sɔ afuɛ nuan kun nun anglo'n kwlaa nun.

Kalɛ 28:4

Man be fa bua bɔ ɔ'a kpɛ cro klikli'n be yi tɛ nglɛmun, yɛ i nnyɔn su'n, be `fa yi tɛ nnɔsua.

Kalɛ 28:7

Man be fa nzan litri kun nin sin be `uka bua bɔ ɔ'a kpɛ cro nga be fa yi nglɛmun nun tɛ'n i su. Nzan sɔ'n, man be guɛ i ase man min, be guɛ i ase min lika kpa i nun.

Kalɛ 29:6

Man be yi tɛ sɔ'n be fa uka tɛ ng'ɔ o yɛ'n bé su: anglo kwlaa i cɛn klikli'n su tɛ'n bɔ be yrɛ i nnɛn'n kɔlikɔli'n, nin tɛ nga be yi i cɛn kwlakwla'n, ɔ nin bé su ble sanmlɛn mlɛnnɛnnɛn kpa bɔ ngo yɛ be fa fɔtɔli'n, yɛ be `su nzan nga be kleli bɔ be guɛ i ase'n. Tɛ sɔ'm be ti tɛ bɔ be yra be nnɛn'n kɔlikɔli'n bɔ be bɔn min bue nun fannin.»

1 Korɛntfuɛ Mun 4:1

I sɔ'n ti, man sran'm be si kɛ e ti Krist i ukafuɛ bɔ e nian like nga Nyanmiɛn fiɛli i sran'm be nyrun'n be su.

1 Korɛntfuɛ Mun 9:13

?An si-man kɛ be nga be di junman Nyanmiɛn i sua'n nun'n i nun ninnge'n yɛ be fa ta bé wun-ɔn, yɛ amun si-man kɛ be nga be jran Nyanmiɛn nyrun'n be nyan be ninnge liɛ'n nga be fa man Nyanmiɛn'n i nun ?

2 Korɛntfuɛ Mun 11:23

M ´ma kan ndɛ kɛ m'an jinmin sa: Sɛ be ti Krist junman difuɛ'n, n kusu n ti i junman difuɛ'n wie dan. N di junman trali be, be wlali min bisua trali be, be boli min trali su. Cɛn kwlaa n trannin wie'n i nuan,

2 Korɛntfuɛ Mun 3:6

I kunngba sɔ'n i yɛ man e kwla di aenguɛ uflɛ nga ɔ nin sran'm be trali'n i junman nin-ɔn. Ɔ ti-man mmla bɔ be klɛli-ɔ, sanngɛ ɔ ti Nyanmiɛn Wawɛ'n liɛ. Afin mmla nga be klɛli'n, ɔ man sran wu, sanngɛ Nyanmiɛn Wawɛ'n liɛ'n, ɔ man sran nyan nguan .

2 Korɛntfuɛ Mun 6:4

Sanngɛ sa kwlaa nun e fa é wun kle kɛ e ti Nyanmiɛn junman difuɛ. Sɛ afɛ wo e su o, sɛ é sa mian o, sɛ e wun nyrɛnnɛn o, sa sɔ'n kwlaa nun, e tra ye anwlɛn.

Sa nglô yile 11:3

N yo man min ndɛ kanfuɛ nnyɔn'm be ´wla bajɛ tralɛ, be ´kan min ndɛ'n cɛn ba akpi kun cɛn ba ya nnyɔn cɛn ba ablesiɛn (1.260).»