Zeremi 7:23 - NYANMIƐN NDƐ'N 1998

²³ Ndɛ nga n fa sieli be nyrun'n yɛlɛ kɛ: sɛ an tie mín nuan ndɛ'n, n ´yo amun Nyanmiɛn, amun kusu amun ´yo min sran mun. An `nian atin nga n `kle amun'n cɛ be `fa su nan amu'an di alaje.

Zeremi 7:23 ပူးပေါင်းရင်းမြစ်များ

Zɔb I Nyrɛnnɛn Wunlɛ 36:11

Sɛ be kplin su nan be kan be wun ase'n, be ´di ye lele be nguan'n ɔ ´fa wie.

Jue Mun 119:3

Be yo-man sa ng'ɔ fata-man'n, Anannganman i atin'n su seiin yɛ be fa-a.

Jue Mun 40:6

Anannganman min Nyanmiɛn, abonuan sa nga a yoli'n, be sɔnnin. Yɛ akunndan kpakpa nga a bu i e wun'n, be sɔnnin. Like fi nin wɔ sɛ-man. Min waan n ´di sa sɔ'm be wun lalo n ´sin. Be sɔnnin dan, n kwla ka-man be ngba.

Jue Mun 81:13

Yɛ n yacili be bé nyin kekle tantrantan sɔ'n nun. Ɔ man be fali be bɔbɔ be akunndan'n be nantili !

Ezipt Lɔ Tulɛ'n 15:26

Ɔ seli be kɛ: «Sɛ amún nyin yi min Anannganman bɔ n ti amun Nyanmiɛn'n nan amun yo like nga be ti kpa min nyrun'n, sɛ amun sie amún su min mmla'm bé bo nan amun kwlaa amun fa bé su'n, tukpacɛ nga n fa yili i Eziptfuɛ'm bé su lɔ'n, n su fa yi-man amún su wie. Afin min yɛ n ti Anannganman bɔ n yo amun juejue nin-ɔn.»

Ezipt Lɔ Tulɛ'n 16:32

Moiz waan: «Ndɛ nga Anannganman kan'n yɛ: ‹Amun `fa mani'n be sie like wie nun, be `sie i lɛ be sie amun mma nga amun ´wu be mun. Kɛ ɔ yo sɔ liɛ'n, be ´wun kpaun nga n fa tali amun aawlɛ flɛnnɛn'n nun lɔ'n kɛ amun fin Ezipt lɔ ba'n.› »

Ezai 3:10

Amun `se kɛ: «Sran nga Nyanmiɛn bu i sran kpa'n, ɔ wo atin kpa'n su, i sa kpa ng'ɔ yo'n, ɔ ´nyɛn i nuan like.

Zeremi 11:7

Kɛ ɔ fin cɛn bɔ n fali amun nannan mun Ezipt mɛn'n nun m bali'n yɛ m boli ndɛ nga mun be kan klelɛ'n bo-ɔ. Lele ndɛ n tɛ kan n tɛ kle be. N se be kɛ: An `tie min aniɛn'n,

Zeremi 13:11

Afin n fali Izraɛl nvle wunmuan'n ɔ nin Zida akpasua wunmuan'n n cili mín bo kɛ sran fa bé bo kplo ci i bo'n sa. N waan n ´yo sɔ nan be `yo min nvle nan n ´nyan dunman, nan be `yo min anyrunnyan like, nan n `fa be di min gbanflɛn, sanngɛ b'a fa-man bé ti b'a de-man.› »

Zeremi 22:21

Blɛ nga sa fi nian ju-man'n yɛ n kan kleli wɔ-ɔ. A waan: ‹N tie-man.› Kɛ ɔ fin ɔ kaan nun lele'n, kɛ a yoli sɔ-ɔ. N kan ndɛ n kle wɔ-ɔ, a ti-man.

Zeremi 22:3

Anannganman'n wan yoo: ‹An `di jɔlɛ nanwlɛ nun. An `de sran mun be nga be fɛn sran'm be bo ninnge'n be sa nun. Nán an yo aofuɛ nin aika ba ɔ nin angboti bla'm be tɛtɛ. Sran nga bɔ b'a yo-man sa'n, nán an kun be lika nga nun wa.

Zeremi 24:7

M ´man be ngwlɛlɛ man be si kɛ min yɛ n ti Anannganman nin-ɔn. Sɛ b'a nian-man bɛ nin fama nan be ba min wun mlɔnmlɔn'n, be wa yo min sran yɛ n kusu n ´yo be Nyanmiɛn.

Zeremi 31:33

Anannganman kɛn i ekun kɛ: «Aenguɛ nga cɛn wie e nin Izraɛl nvle'n e ´tra'n yɛ: n ´fa min mmla'n n ´wla be akunndan'n nun. Sɛ n ´kwla se'n, n ´fa klɛ be anwlɛn'n nun. N ´yo be Nyanmiɛn, be kusu be ´yo min sran.

Zeremi 32:23

Be wa fali mɛn sɔ'n, sanngɛ kpɛkuun b'a tie-man wɔ aniɛn'n. B'a nian-man ɔ mmla'n su b'a nanti-man, like nga ɔ waan be yo'n, b'a yo-man. I sɔ'n ti yɛ man a fali nyrɛnnɛn nga kwlakwla yili be su nin-ɔn.

Zeremi 38:20

Zeremi tɛli i su kɛ: «Be su fa-man wɔ be wla-man bé sa nun. Ndɛ nga Anannganman'n kan'n, ɔ li fa ɔ́ su tie. Sɛ a fa ɔ́ su tie'n, ɔ ´uka wɔ, a ´fite nun.

Sofoni 3:2

Be kan ndɛ be kle i-ɔ, ɔ guɛ i su sin, be kle i ngwlɛlɛ-ɔ, ɔ fɛ-mɛn i su sie-mɛn i bo, ɔ fɛ-mɛn i wla gua-man Anannganman su.

Zakari 6:15

Sran'm be ´fin mmua lɔ be ´ba Anannganman i sua'n i kplanlɛ. Kpɛkuun amun wa wun i wlɛ sakpa sakpa kɛ Anannganman b'ɔ sie mɛn wunmuan'n yɛ ɔ sunmannin min amun wun wa-a. Sɛ amún nyin yi Anannganman amun Nyanmiɛn'n sakpa'n, i sɔ sa liɛ nga lɛ mun be kwlaa be ´yo.

Zakari 7:7

?I nun nga bɔ sran ba'n tɛ jin Zerizalɛm'n su, bɔ wuun klɔ nga be mɛntɛn-mɛntɛn i lɛ mun be o be olɛ bliin'n, bɔ sran'm be tɛ o ngua lɔ lika'n nun nin lika kpɛtɛkplɛɛ'n nun lɔ'n, nán ndɛ nga Anannganman fa wlɛli i nuan ijɔfuɛ'm bé nuan laa bɔ be kannin'n yɛ ɔ lɛ-ɔ?

Rɔmfuɛ Mun 16:26

Sanngɛ siɛn'n, fluwa nga i nuan ijɔfuɛ'm be klɛli'n man y'a wun i wlɛ weiin. Anannganman Nyanmiɛn'n sieli i sɔ nan be kwlaa nga be ti-man Zuif'n be lafi i su yɛ bé nyin yi i.

2 Korɛntfuɛ Mun 10:5

yɛ like nga b'ɔ man sran'm be si-man Nyanmiɛn'n e saci be kwlaa, yɛ e yo man sran'm be kwlaa, sɛ be akunndan'n ti sɛ ti sɛ o, be yaci be akunndan sɔ'n bé nyin yi Krist.

Mmla'n 11:27

Sɛ amun fa Anannganman amun Nyanmiɛn'n i mmla nga n fa man amun ndɛ yɛ'n bé su'n, amun ´nyan muae.

Mmla'n 13:4

nán amun tie sran nga i waan ɔ ti Nyanmiɛn nuan ijɔfuɛ sɔ'n, annzɛ i ti'n wuun ase'n i ndɛ mun. Amun si kɛ Anannganman amun Nyanmiɛn'n yɛ ɔ su sa amun nian-an, sɛ amun klo i kpa kɛ ɔ fata'n sa o, sɛ amun fa amun wla'n kwlaa guɛ i su o, yɛ sɛ amun akunndan kwlaa o i su o.

Mmla'n 13:5

Anannganman amun Nyanmiɛn'n yɛ amun `su i-ɔ. Amun nyin `yi i, amun `fɛ i mmla'm bé su, amun `tie i aniɛn'n, amun `su i, yɛ amun `fa amún wun mɛntɛn i kpa.

Mmla'n 30:2

Amun wa sa amún sin amun ´ba Anannganman amun Nyanmiɛn'n i sin ekun, amun ´ti i aniɛn'n. Ndɛ nga n ´kan kle amun ndɛ yɛ'n, amun nin amun osu nunfuɛ mun, amun ´fa amun wla'n guɛ i kwlaa'n su, yɛ amun akunndan'n ɔ ´tran su.

Mmla'n 30:20

Amun `klo Anannganman amun Nyanmiɛn'n, amun `fɛ i nuan ndɛ'n su, amun `fa amún wun mɛntɛn i. I liɛ'n, amun ´kwla tran mɛn ng'ɔ tali amun nannan Abraam, nin Izaak, nin Zakɔb be nda kɛ ɔ ´fa man be'n i nun, yɛ amun ´cɛ.

Mmla'n 30:8

Kpɛkuun, amun wa sa amun sin amun ´ba Anannganman amun Nyanmiɛn'n i sin ekun, amun nyin ´yi i yɛ amun ´fɛ i mmla nga n ´fa man amun ndɛ yɛ'n i kwlaa su.

Mmla'n 4:10

Nán amún wla fi cɛn nga amun jrannin Anannganman amun Nyanmiɛn'n i nyrun Orɛb lɔ'n i su. Ɔ seli min kɛ: «Flɛflɛ sran mun man be bla min wun wa. N ´kan ndɛ kle be nan be nyin ɔ'a yi min titi kɛ be o Kanaan asiɛ'n su wa'n. Be kusu ndɛ nga n kan'n, ɔ fata kɛ be fa kle be osu nunfuɛ mun.»

Mmla'n 4:40

Ɔ man i mmla nin i ndɛ bɔ n ´fa man amun yɛ'n, amun `fa bé su. I liɛ'n, amun nin amun osu nunfuɛ nga be wa jaso su'n, amun ´nyan ye, yɛ amun nguan nyanman'n ɔ ´yo tɛnndɛn mɛn nga Anannganman amun Nyanmiɛn'n ɔ'a fa man amun mlɔnmlɔn'n i nun.

Mmla'n 5:16

Bu ɔ́ si nin ɔ́ nin be sran kɛ min Anannganman ɔ Nyanmiɛn'n n kan kleli wɔ'n sa, nan ɔ nguan nyanman'n ɔ'a yo tɛnndɛn nan ɔ wun ɔ'a jɔ wɔ fɔuun mɛn nga min Anannganman ɔ Nyanmiɛn'n fa man wɔ'n i nun'n ti.

Mmla'n 5:29

Sɛ ɔ ti kɛ bé nyin yi min sa titi yɛ be fa mín nuan ndɛ'm be kwlaa su'n, wuun nga, be nin be osu nunfuɛ'm be ´nyan ye sa tititi.

Mmla'n 5:33

Amun `fa atin nga Anannganman amun Nyanmiɛn'n kleli amun'n su seiin nan amu'an wu-man, nan amun wun ɔ'a jɔ amun fɔuun, nan amun nguan nyanman'n ɔ'a yo tɛnndɛn mɛn nga amun wa fa'n nun.»

Mmla'n 6:3

Izraɛlfuɛ mun, amun `fa amun su sie mmla sɔ'm be su nan amun `fa bé su. I liɛ'n, amun wun ´jɔ amun fɔuun, kpɛkuun amun ´trɛ dan kɛ Anannganman amun Nyanmiɛn'n kannin'n sa. Ɔ seli amun kɛ mɛn ng'ɔ ´fa man amun'n, i asiɛ'n ɔ ´yo like ye kpa, yɛ i kunngba'n ɔ ti nnɛn tawlɛ klanman.

Hébreu 5:9

Kɛ ɔ yoli sran wafa nga Nyanmiɛn klo kɛ ɔ `yo'n, ɔ man be kwlaa nga bé nyin yi i'n, be ´nyan bé ti mlɔnmlɔn,

1 Samiɛl 15:22

Yɛ Samiɛl waan: «?Tɛ'm be yilɛ'n li yɛ Anannganman kunndɛ-ɔ, annzɛ i ndɛ'm be su falɛ nin-ɔn? Nian, ainyiɛ'n flunman tra tɛ yilɛ'n, yɛ i ndɛ'm be su falɛ'n flunman tra bua'm be lui'n.