Zeremi 6:7 - NYANMIƐN NDƐ'N 1998

⁷ I klunwi sa'n ɔ nyrɛn kɛ nzue ti b'ɔ nyrɛn viaa'n sa. I wun ndɛ nga be ti'n, i kwlaa ti sa tɛtɛ nin sran mianmianlɛ ndɛ ngunmin. Cɛn kwlaa a ´to ɔ́ nyin-ɔn, ɔ ti sran nga b'a bo be kannin ɔ nin nga be su fɛ'n be ngunmin.

Zeremi 6:7 ပူးပေါင်းရင်းမြစ်များ

Nyanndra Mun 4:23

Ɔ ti'n bɔ a fa bu akunndan'n, sie i kpa tra ninnge'm be kwlaa, afin i nun yɛ nguan'n i bo'n fin-ɔn.

Ezai 1:6

Kɛ ɔ fɛ i amún ja ngbabua'm be su lele b'ɔ fa ju amún ti'n su'n, amun wunnɛn'n i lika fi nun-man lɛ bɔ be kwla se kɛ ɔ ti kpa kan-an. Laa kannin mun nin amun wunnɛn bɔ b'a susu'n, ɔ nin kannin uflɛ-uflɛ mun, sran fi fua-man be, sran fi gua-man be nun ayre, yɛ sran fi cici-man be su.

Ezai 57:20

Sanngɛ be nga be bu-man Nyanmiɛn nin i ndɛ'n be like fi'n, be ti kɛ jenvie'n bɔ aunngban'n keje i b'ɔ kwla jran-man diin, b'ɔ bo ninnge tɛtɛ'm kwlaa gua cenje'n su'n sa.

Ezai 59:6

Ndɛnndɛn bɔ amun to'n, be kwla fa wu-man tannin nan se kɛ be ´kata. Amun yo sa nga be nin yolɛ fata-man'n. Yɛ amun fa amún sa be yo sa kekleekle bɔ be ti tɛtɛ'n mun.

Zeremi 20:8

Ndɛ kwlaa nga n ´kan'n, i agualiɛ su san n ´kpan, san n ´kpan kɛ be ´kun min o! Be `de min o! Anannganman, ɔ ndɛ'n i kanlɛ'n ti min srisrilɛ yɛ be srisri min-ɔn, yɛ min nzowa yɛ be kpɛ i sa cɛn kwlaa-a.

Zeremi 30:12

Anannganman'n wan yoo: «Kannin nga ɔ'a tu wɔ'n, ɔ yo sro. Ɔ wu-ɔ ɔ yo-man ye.

Zeremi 30:13

Sran fi bu-man wɔ akunndan nan se kɛ ɔ ´fua ɔ́ kannin'n. Nán ayre kpa yɛ be ko fa ko ta nun-ɔn.

Zeremi 30:15

?Ɔ yo sɛ yɛ a fɛfɛ ɔ kannin sroesroe'n b'ɔ wu-ɔ ɔ yo-man ye'n ti-ɔ? Ɔ sa tɛ nga a yoli'n sɔnnin ngboko. I ti yɛ n yoli wɔ sɔ-ɔ.

Zeremi 32:31

Anannganman kɛnnin ekun kɛ: «Kɛ ɔ fin cɛn bɔ be kplannin klɔ'n yɛ be sɔtɔli min ya kunlɛ nin min anwlɛn fɔkɔlɛ lele yɛ ɔ'a fa ju ndɛ yɛ. I sɔ'n ti, man klɔ'n ɔ sin jaso lɛ nan n `wun ase .

Zeremi 8:22

?Kannin ayre nun-man Galaad lɔ kun? ?Dɔɔtrɔ nun-man lɔ? ?Ɔ yo sɛ ti yɛ min nvle'n i kannin'n tɛ didi tɛ kɔ kploun sɔ-ɔ ?

Ezekiɛl 21:29

I sɔ'n ti'n, min Anannganman Nyanmiɛn n wan yoo: Amun nyin kekle bɔ amun yi i nglo cɛn kwlaa'n ti'n, n wla kpɛn amun sa tɛ'm be su tititi. Kɛ amu'an yo-man man min wla ɔ'a fi-man amun su'n ti, amun wa tɔ amun kpɔfuɛ'm be sa nun. Amun aeliɛ'n kle kɛ amun fɔn titi.

Ezekiɛl 24:7

Mmoja'n tɛ o klɔ'n nun. Be fa guɛli yɛbuɛ treketreke bɔ like fi nun-man su'n i su. Asiɛ'n ɔ'a nɔnnɔn-man, yɛ sran fi a fa-man aunnyan a gua-man su.

Ezekiɛl 45:9

Anannganman Nyanmiɛn wan yoo: «Izraɛl wlengbi mun, amu'an yo wie ngboko! Amun `yaci sa ukpo-ukpo yolɛ'n nin sran'm bé bo ninnge'm be fɛnlɛ'n, amun `yo sa b'ɔ ti seiin nin ng'ɔ ti i nuan su'n. Amun `yaci min sran'm bé bo ninnge'm be delɛ.» Anannganman Nyanmiɛn'n yɛ ɔ kan sɔ-ɔ.

Ezekiɛl 7:11

Sa ukpo-ukpo yolɛ'n ɔ'a jaso, ɔ ti kɛ klunwi'n i kpɔnman sa. Like fi su ka-man amún sa nun. Be su ti-man amun kpanlɛ kun. Amun sɔnlɛ nga amun sɔnnin'n, ɔ nin i sɔ'n ngba, amun nun kun sa su ka-man lɛ. Be su yi-man ngwlɛ gua-man amun su.

Ezekiɛl 7:23

Bo jrɔkɔ sie i lɛ, afin sran kunfuɛ'm b'a yi mɛn'n piɛ, yɛ sa ukpo-ukpo yofuɛ'm b'a yi klɔ'n piɛ.

Sofoni 3:1

Nyin kekle klɔ, klɔ saciwa, klɔ bɔ i su kpɛnngbɛn'm be mianmian sran'n, n ´yo i yako!