Zeremi 50:6 - NYANMIƐN NDƐ'N 1998

⁶ Min nvle'n yoli kɛ bua fa kun bɔ b'a mlin'n sa. Be kankanfuɛ'm be mlinnin be. Ɔ man be wlan oka'm be su sa daan! Be fu oka nga su, be jra be ko fu kpɔlɛ nga su. Be si-man be osu atin'n kun .

Zeremi 50:6 ပူးပေါင်းရင်းမြစ်များ

Jue Mun 116:7

I kpa'n bɔ, man mín wla'n gua ase fɔuun ke! Anannganman ɔ'a yo min ye a wie!

Jue Mun 119:176

N ti kɛ bua b'ɔ wlan daan sa. Kunndɛ min bɔ n ti ɔ sufuɛ'n, afin n wla fi-man ɔ mmla'm bé su .

Jue Mun 23:2

Ɔ man n de wunmiɛn lika bɔ ijre nɔnman o lɛ'n nun. Nzue ba bɔ be nuan ti fɔun'n, lɛ yɛ ɔ fa min kɔ-ɔ.

Jue Mun 32:7

A ti min fiawlɛ, a sasa min, ɔ man nyrɛnnɛn tɔ-man min su. Kɛ a de min'n, n klun ti jɔwa, yɛ wɔ man jue ngunmin yɛ n sro-ɔ.

Jue Mun 90:1

Moiz b'ɔ ti Nyanmiɛn sunmanfuɛ'n i srɛlɛ b'ɔ srɛli'n. I waan: Min Min, kɛ ɔ fɛ i e nannan'm be blɛ su lele b'ɔ ´ju e blɛ liɛ'n su yɛ'n, a yoli e fiawlɛ tititi.

Jue Mun 91:1

Sran ng'ɔ ko fia Nyanmiɛn bɔ like fi nun-mɛn i sin'n i sin'n, wuun ɔ'a tran Nyanmiɛn b'ɔ kwla like kwlaa yo'n i fɔnvɔ'n nun.

Ezai 1:3

Nannin'n ɔ si sran ng'ɔ lɛ i'n, yɛ aflunmun'n kusu ɔ wun like nga i min'n ɔ fa sie i lɛ kɛ ɔ di nun'n i wlɛ, sanngɛ Izraɛl si-man sa, min nvle'n i nunfuɛ'm be wun-man sa fi wlɛ.

Ezai 30:15

Sa nga Anannganman Nyanmiɛn b'ɔ ti Izraɛl Nyanmiɛn'n ɔ kan'n yɛ. I waan: «Sɛ amun sa amún sin amun ba min sin ekun'n, yɛ sɛ amun tran diin'n, yɛ amun ´nyan amun ti-ɔ. Sɛ amun gua amun wla ase, yɛ sɛ amun lafi min su'n, yɛ amun ´nyan wunmiɛn-ɔn. Sanngɛ amun klo-man kɛ amun ´yo sɔ.

Ezai 32:2

Be ngba be wa yo kɛ like bɔ be fiɛ i bo bɔ kɛ aunngban'n ɔ ´fita'n ɔ nyan-man be'n sa. Be ´yo kɛ lika bɔ be fia nun, bɔ kɛ aunngban dan'n ɔ ´tu'n, ɔ kan-man be'n sa. Be ´yo kɛ nzue ba b'ɔ sonji lika kee nun'n sa. Be ´yo kɛ yɛbuɛ dan wie b'ɔ man fɔnvɔ lika bɔ waka fi fifi-man lɛ'n sa.

Ezai 53:6

E kwlaa e ti kɛ bua bɔ b'a bo je'n sa, sran kun fɛ i bɔbɔ klun klo atin, yɛ Anannganman'n fali e kwlaa e fɔnlɛ bɔ e fɔnnin'n i su afɛ'n fa guɛli i su-ɔ.

Zeremi 10:21

Bé su kpɛn mun yɛ be yoli-ɔ. Be yoli sinnzin, b'a mantan-man Anannganman'n, i ti yɛ b'a si-mɛn i yo bɔ sran nga be nian be su'm be bo sanndili-ɔ.

Zeremi 13:16

An `manman Anannganman amun Nyanmiɛn'n. Ɔ'a yo-man sɔ-ɔ, aosin'n ´ba. Ɔ man amún ja ´kpla oka mun lika tuun'n ti. Ɔ'a yo-man sɔ-ɔ, amun ´minndɛ kɛ aliɛ'n `cɛn lele ngbɛn. Anannganman ´yo man lika'n ɔ kaci aosin tritri kpa. Ɔ ´kaci i kɛ nyanmiɛn ble tuun'n sa.

Zeremi 2:20

«Izraɛl nvle, a jasoli min wun nán ndɛ-ɔ. A kpɛli nyanman nga n fa wlali ɔ kɔmin'n nun ɔ'a cɛ. Ɔ fiteli ɔ́ nuan kɛ yoo: ‹N su-man wɔ kun.› Siɛn'n, kpɔlɛ kanngan'm be kwlaa'm be su waka nga be lɛ nnya'm be kwlaa be bo yɛ a la a bo tekle nin-ɔn.

Zeremi 2:32

?Talua kun wla kwla fi i talua ninnge'm be su? ?Talua bɔ b'a jɛ i uflɛ'n i wla kwla fi i njuaba'n su? Sanngɛ min nvlefuɛ'm be liɛ'n, be wla fili min, be si-mɛn i afuɛ.

Zeremi 23:1

Anannganman wan yoo: «Be nga be dun nvlefuɛ'm be nyrun mmua'n be yako! Amun bɔ amun ti kɛ min bua mun sa bɔ amun yoli man min sran mun bɔ be ti kɛ min kuku nun bua mun sa'n b'a bo b'a sanndi, bɔ b'a mlin'n, amun yako!»

Zeremi 3:23

Sakpa, amuɛn nga be sɔ be kpɔlɛ'm be su lɔ'n, nin oka'm bé su'n i nganniɛn ng'ɔ gua e su wa'n ɔ ti ngbɛn. Sakpa Anannganman e Nyanmiɛn'n i kunngba i fanngan nun yɛ e kwla nyan é ti-ɔ.

Zeremi 3:6

Famiɛn Zozias i blɛ su'n, Anannganman'n seli min kɛ: «?A wun sa nga Izraɛl b'ɔ ti kɛ bian safuɛ'n sa'n, ɔ yo'n? Ɔ lɛ-man oka kun ng'ɔ fu-man su-ɔ, ɔ lɛ-man waka b'ɔ lɛ nnya b'ɔ kɔ-mɛn i bo ko bo-man tekle-ɔ .

Zeremi 33:12

Anannganman b'ɔ sie mɛn wunmuan'n wan yoo: «Lika nga ɔ'a nunnun bɔ sran nin nnɛn fi nun-man nun'n, nnɛn sunianfuɛ'm be wa nyan be lika bɔ i nun yɛ nnɛn'm be ´la-a. Be ´nyan wie lika sɔ'n i klɔ dandan'm be su kusu.

Zeremi 50:17

Izraɛl ti kɛ bua bɔ asɔmɔli'm b'a fuɛn i bɔ ɔ'a mlin'n sa. Sran ng'ɔ dun mmua dili i'n yɛlɛ Asiri famiɛn'n. Kpɛkuun Babilɔni famiɛn'n kusu ɔ wa boboli i owie'n.

Zeremi 50:19

N ´fa Izraɛl n sɛ i sin i osu. N ´fɛ i n sɛ i sin Karmɛl nin Bazan lɔ didiwlɛ'm be nun. I klun ´jɔ Efraim oka'm be su nin Galaad mɛn'n nun.

Ezekiɛl 13:10

Be nga be tɔn be wun suɛn kɛ be ti min nuan ijɔfuɛ'n be laka min sran mun, be se be kɛ: ‹Aunjuɛ'n su ba!› Kusu wuun aunjuɛ nun-man lɛ. Min nvle'n i nun sran'm b'a kplan talɛ kun, kpɛkuun be nga be tɔn be wun suɛn sɔ'm be liɛ nga be si i'n yɛlɛ i ayre kanlɛ'n bɔ ngunmin cɛ.

Ezekiɛl 34:14

N ´fa be n kɔ didiwlɛ kpa nun, be didiwlɛ'n ɔ ´tran oka fleiin'm be su Izraɛl lɔ. Lɛ yɛ be ´de wunmiɛn fɔun yɛ be ´di like kpa Izraɛl oka'm be su-ɔ!

Ezekiɛl 34:15

N ´yo min bua'm be tafuɛ, n ´sasa be. Min Anannganman Nyanmiɛn yɛ n kan sɔ-ɔ.

Ezekiɛl 34:16

N ´kunndɛ nnɛn nga be mlin'n, n ´fa be ´sa be sin. Nnɛn nga be boli be kannin'n n ´cici be kannin'n su, yɛ nga be wunnɛn yo be ya'n, m ´man be wunmiɛn, sanngɛ nga be ti lugbɔɔ nin nga be lɛ wunmiɛn tra su'n, n ´nunnun be.» N ta min nnɛn mun kɛ ɔ fata'n sa.

Matthieu 10:6

sanngɛ an `wɔ Izraɛl osu'n nun bua'm bɔ b'a mlin'n bé sin.

Matthieu 15:24

Yɛ i waan: «Izraɛl osu'n nun bua'm bɔ b'a mlin'n bé sin yɛ be sunmannin min-ɔn.»

Matthieu 9:36

Kɛ Jésus wunnin sran mun'n, be yoli i annvɔ, afin be ti afɛfuɛ yɛlɛ kɛ b'a bo je kɛ bua bɔ be lɛ-man sunianfuɛ'n sa .

1 Piɛr 2:25

Laa an ti kɛ bua bɔ b'a bo nzanndri'n sa, sanngɛ siɛn'n amu'an sa amún sin amun Tafuɛ b'ɔ ti amun Sunianfuɛ'n i sin .