Zeremi 4:2 - NYANMIƐN NDƐ'N 1998

² Kɛ a ta nda se kɛ: ‹N kan Anannganman Nyanmiɛn.› Sɛ a tɛ i nanwlɛ su kpa weiin'n, nvle kun nga'm be ´fa min dunman'n yɛ be ´fa yra be wiengu nguan-an. Kpɛkuun be ´bo min dunman'n be ´sin.

Zeremi 4:2 ပူးပေါင်းရင်းမြစ်များ

Bo Bolɛ 22:18

Mín nuan ndɛ bɔ a fali'n ti, n ´sin wɔ anunman'm be nun n ´yo asiɛ'n su nvle-nvle'm be kwlaa be ye .»

1 Famiɛn Mun 3:6

Salomɔn waan: «Kɛ a ko yo mín si David b'ɔ ti ɔ sufuɛ'n i kpa'n yɛ a yoli-ɔ. Yɛ i kusu ɔ yoli sran nanwlɛfuɛ, i nantilɛ'n yoli sɛsɛ, ɔ'a fɔn-man wɔ atin'n su. Ɔ man a kpɔci-mɛn i, a mɛnnin i ba yasua kun b'ɔ su di i aja kɛ e ´se yɛ'n.

Jue Mun 72:17

Nán famiɛn'n i dunman'n nunnun le. Man ɔ cɛ kɛ wia'n sa. Man sran'm be fɛ i dunman'n be yra be wiengu nguan. Man mɛnmɛn'm be nunfuɛ'm be kwlaa be se i kɛ: «Nja ɔ liɛ su ti ye!»

Jue Mun 99:4

Man be manman famiɛn'n b'ɔ kwla'n, b'ɔ klo nanwlɛ dilɛ'n. Wɔ yɛ a sieli mmla ng'ɔ ti bɔ e nanti su nin-ɔn. Wɔ yɛ a sieli ndɛ siesielɛ'n i wafa'n nin sa nuan su yolɛ'n Izraɛl mɛn'n nun-ɔn.

Ezai 45:23

M bɔbɔ n ta mín wun nda, ndɛ ng'ɔ ti su'n yɛ ɔ fin mín nuan fite-ɔ, ndɛ sɔ'n n su kaci-mɛn i, sran'm be kwlaa be ´koto ḿ bo yɛ be kwlaa be ´ta nda min dunman nun .

Ezai 45:25

Sanngɛ Anannganman ɔ ´bu Izraɛlfuɛ'm be sran kpa, yɛ be ´fɛ i sɔ'n di bé nuan.

Ezai 65:16

Mɛn'n nga nun wa'n, be nga be klo kɛ be `yra be nguan'n, be ´se kɛ be `bo min Nyanmiɛn bɔ n ti nanwlɛfuɛ'n min dunman yɛ be `fa yo-ɔ. Be nga be waan be ´ta nda'n, be ´bo min Nyanmiɛn bɔ n ti nanwlɛfuɛ'n min dunman yɛ be ´fa ta-a .› » «Bé wla wa fi laa nyrɛnnɛn liɛ mun, n su wun-man nyrɛnnɛn sɔ mun kun.

Zeremi 10:10

Anannganman'n ɔ ti Nyanmiɛn sakpa. Ɔ ti Nyanmiɛn kun b'ɔ lafi-man. I kunngba'n ti famiɛn b'ɔ ti adudua. Kɛ ɔ ko fa ya sa'n, asiɛ wunmuan'n keje. Nvle-nvle'm be nunfuɛ'm be yo i like'n wie fi-ɔ ɔ yo-man ye.

Zeremi 12:15

Sanngɛ kɛ n ko tu be n ko wɔ'n, i sin n wa si be aunnvuɛ. N ´fa be n sa be sin be lika kunngun mun nin mɛn kunngun'm be nun.

Zeremi 12:16

Laa, be kleli min nvlefuɛ mun kɛ be `fa Baal dunman'n be ta nda, sanngɛ sɛ be suan min nvlefuɛ'm be nantilɛ'n nan sɛ be fa min dunman'n be ta nda be se kɛ: ‹N kan Anannganman'n, n ´fa be n ´sie i min nvlefuɛ'm be nun.

Zeremi 16:19

Anannganman, wɔ bɔ a man wunmiɛn'n, bɔ a ti kɛ min sasawlɛ klɔ'n sa, kɛ sa tɔ'n, ɔ́ sin yɛ n fia-a. Nvle-nvle'm be ´fin mɛn'n i bue kun lɔ be ´ba ɔ sin be ´se kɛ: «Like nga e nannan'm be yaci é si'm bé sa nun'n, ɔ ti ato like, ɔ yo-man sa fi ye.

Zeremi 3:17

I blɛ sɔ nun'n, be ´flɛ Zerizalɛm klɔ'n kɛ: Anannganman I Famiɛn Bia. Nvle'm be kwlaa be ´ba min wun wunlɛ Zerizalɛm lɛ. Be ´yaci be akunndan tɛtɛ bɔ i cɛ yɛ be waan be ´fa su'n.

Zeremi 33:9

Kpɛkuun klɔ nga man n klun wa jɔ, ɔ wa man min kɔmin su, ɔ wa yo kɛ min kɔmin njuaba sa asiɛ'n su nvle'm be nunfuɛ'm be nyrun. Kɛ nvle'm be nunfuɛ sɔ'm be wa ti nɛnnɛn dan nga n wa di klɔ sɔ'n, be akunndan'n ´sanngan bé wun. Be ´usu kpa.»

Zeremi 5:2

Sran'm be ta nda be se kɛ: «N kan Anannganman'n» ato yɛ be buɛ i sɔ-ɔ.

Zeremi 7:5

Sɛ an yaci ajalɛ tɛtɛ nin nyoliɛ tɛtɛ'n, sɛ an yo ng'ɔ fata'n be man be wiengu'n,

Zeremi 9:24

Anannganman'n waan: «Cɛn wie wa ju bɔ e nin be nga be wla be klɛn liɛ'n be wunnɛn nun ngbɛn'n e ´nyɛn i,

Ndɛ Nga Nyanmiɛn I Nuan Ijɔfuɛ Oze Kannin'n 2:19

N ´yo man Baal nin amuɛn kun nga mun be dunman'n ´mlin i nuan nun. Bé wla ´fi be dunman'm be su mlɔnmlɔnmlɔn.

Zoɛl 2:12

Anannganman wan yoo: «An `sa amun sin bla mín sin. Kɛ ɔ o yɛ'n, i blɛ nian sin-man. Amun `tu amun klun bla, an `ci nglɛmun, an `sun, yɛ an `kpata min.»

Zakari 8:8

N ´ko fa be lɔ m ´ba nan be wa tran Zerizalɛm. Be ´yo min nvle nunfuɛ, yɛ min kusu n ´yo be Nyanmiɛn. N ´nian be su klun-ufue su klanman.»

Malasi 1:11

Afin kɛ ɔ fɛ wia afiliɛ lɔ lele b'ɔ fa ju wia atɔliɛ'n lɔ'n, sran'm be kwlaa be si kɛ min dunman'n ti dan. Lika'n kwlakwla be yra ansans be man min. Like ng'ɔ nin min fata'n yɛ be fa man min-ɔn. Min dunman'n ti dan mɛn'n kwlaa'n nun. M bɔbɔ min Anannganman bɔ n sie mɛn wunmuan'n yɛ n kan n kle amun-ɔn.

1 Korɛntfuɛ Mun 1:31

Afin be klɛli i kɛ: «Sran nga i waan ɔ ´di i nuan'n, man ɔ fa e min Nyanmiɛn'n di i nuan .»

2 Korɛntfuɛ Mun 10:17

Afin be klɛli i Nyanmiɛn Ndɛ'n nun kɛ: «Sran nga i waan ɔ ´di i nuan'n, man ɔ fa e Min Nyanmiɛn'n di i nuan .»

Galasifuɛ Mun 3:8

Yɛ be boli su Nyanmiɛn Ndɛ nga be klɛli'n nun kɛ cɛn wie be nga be ti-man Zuif bɔ be lafi Nyanmiɛn su'n, ɔ ´bu be sran kpa, ɔ man ɔ boli ndɛ fɛ sɔ'n su kleli Abraam, ɔ seli i kɛ: «Ɔ ti'n, n ´yo nvle-nvle'm be kwlaa be nunfuɛ'm be ye .»

Mmla'n 10:20

Amun `nyin yi Anannganman amun Nyanmiɛn'n, amun `su i, amun `fa amún wun `mɛntɛn i. Amun `fɛ i dunman yɛ amun fa ta nda-a.

Mmla'n 4:30

Kɛ sa nga n kannin be ndɛ'n be ´ju amún su, bɔ nyrɛnnɛn ´tɔ amun su'n, amun ´sa amun sin Anannganman amun Nyanmiɛn'n i sin. Amun ´fɛ i ndɛ'm bé su.

Mmla'n 6:13

Amun `nyin yi Anannganman amun Nyanmiɛn'n, amun `su i. Sɛ amun ´ta nda'n, amun `fɛ i dunman'n yɛ amun fa ta-a.

Filipfuɛ Mun 3:3

E yɛ e wla klɛn kpa nin-ɔn, afin e su Nyanmiɛn i Wawɛ'n i fanngan nun, e fa Krist-Jésus di é nuan, e fa-man é wla gua-man e wafa nga e ti'n su.

Rit I Wun Ndɛ 3:13

La wa man aliɛ'n cɛn wɔ. Ainman nglɛmun sɛ ɔ klo kɛ ɔ kpɔ ɔ́ ti'n, ɔ ´kpɔ. Sɛ kusu i waan ɔ kpɔ-man, m bɔbɔ min n ko kpɔ. Nyanmiɛn lafi-man. Nan i ti'n, la wa man aliɛ'n cɛn.»

1 Samiɛl 20:3

David waan: «?Yɛ b'ɔ si kɛ a klo min'n, ɔ ´kan kle wɔ sɛ? Atrɛkpa-a, ɔ kan kɛ: ‹Sɛ Zonatan ti'n, ɔ ´sɛnngɛn i akunndan.› N kan Nyanmiɛn nin wɔ be ti, m'an wu a wie. »