Zeremi 32:21 - NYANMIƐN NDƐ'N 1998

²¹ A yili atrɛ, a yoli abonuan sa mun. Izraɛl b'ɔ ti ɔ nvle'n, a fa fin Ezipt lɔ bali. Ɔ man be wun kɛ a ti dan nan like nga ɔ waan a ´yo'n, a kwlɛ i yo.

Zeremi 32:21 ပူးပေါင်းရင်းမြစ်များ

2 Samiɛl 7:23

Nvle fi nun-man lɛ bɔ be kwla fa sunnzun Izraɛl nvle nin-ɔn. Izraɛl mɛn'n kunngba yɛ a ko kpɔli i Eziptfuɛ mun nin be amuɛn'm be sa nun-ɔn. A fɛ i yoli ɔ nvle. Yɛ wɔ man i dunman'n ɔ fuli, afin a yoli sa dandan mun, nin abonuan sa mun mɛnnin i mɛn nga nun wa.

1 Be Nyoliɛ 17:21

Nvle fi nun-man lɛ bɔ be kwla fa sunnzun Izraɛl-ɔ. Izraɛl kunngba yɛ a ko deli i, yɛ a fa yoli ɔ nvle-ɔ. A yoli sa dandan mun nin sa sroesroe mun, ɔ man ɔ dunman'n fuli. Ɔ sran bɔ a deli be Ezipt lɔ'n be ti a fuannin mɛn wie nun sran mun.

Jue Mun 105:37

Kpɛkuun ɔ yoli man i nvlefuɛ'm be fin mɛn sɔ'n nun fiteli. Be ´fite-ɔ, be di-man jɛtɛ ufue'n nin sika ɔkwlɛ'n i yalɛ bé sa nun. Be kwlaa be ti juejuejue be akpasua'm be kwlaa su.

Jue Mun 105:43

Kɛ ɔ ´yi i nvle'n nunfuɛ mun Ezipt lɔ fite'n, be klun'n jɔ-man blɛblɛ. Be b'ɔ kpali be sɔ'n, be klun b'ɔ jɔli'n ti b'a bo b'a sro-man ngowa.

Ezipt Lɔ Tulɛ'n 13:14

Sɛ cɛn kun amun mma'm be usa amun kɛ: ‹?Ɔ yo sɛ ti yɛ be yo sa nga-a?› Amun `tɛ bé su kɛ: ‹Anannganman i tinmin bɔ be jrɛn i nyrun-ɔn, ɔ yo-man ye'n ti ɔ fali e Ezipt lɔ bali. Kɛ ɔ ´yo sɔ'n, wuun e o kanga nun.

Ezipt Lɔ Tulɛ'n 13:9

Cɛn sɔ'n wa yo amún wla kpɛnlɛ like kɛ amún sa'n i su annzɛ amun ngban su nzɔliɛ wie sa. Man ɔ kpɛn amún wla kɛ ɔ fata kɛ amun kan Anannganman i mmla'n i ndɛ. Afin i yɛ ɔ fali i tinmin bɔ be jrɛn i nyrun-ɔn ɔ yo-man ye'n, ɔ fali amun Ezipt lɔ bali.

Ezipt Lɔ Tulɛ'n 3:20

I ti'n, m ´ba yasua su Eziptfuɛ'm be afiɛn, kpɛkuun n ´fa abonuan sa nga n ´yo be'n n ´fa kle be nyrɛnnɛn. I sin famiɛn'n ´yaci amun nun amun ´kɔ.

Ezipt Lɔ Tulɛ'n 6:1

Anannganman seli Moiz kɛ: «Blɛ li yɛ a wa wun like nga n wa fa yo Ezipt famiɛn nin-ɔn. N wa miɛn i kɛ ɔ `yaci Izraɛlfuɛ'm be nun man be wɔ. Kɛ n wa miɛn i'n, ɔ wa kan bé bo kɛ be jaso i mɛn'n nun bɔbɔ.»

Ezipt Lɔ Tulɛ'n 6:6

I sɔ'n ti, n ´kan kle wɔ kɛ a `se be kɛ: ‹N ti Anannganman, n wa yo man amun ´nyan amún ti junman kekleekle nga Eziptfuɛ'm be mian amun kɛ amun di'n be nun. Min tinmin dan bɔ sran kwla jrɛn-mɛn i nyrun'n ti'n, m ´bu be fɔ, kpɛkuun n ´de amun.

Ezai 63:12

Ɔ fɛli i sa b'ɔ yo nyɛnmɛn'n ɔ suannin Moiz i sa fama'n i bo. Ɔ kpacili nzue'n nun be nyrun, ɔ man ɔ nyannin dunman b'ɔ nunnun-man'n.

Mmla'n 11:3

Amun wunnin atrɛ ng'ɔ yili mun nin junman ng'ɔ dili be Ezipt lɔ'n. Amun wunnin sa ng'ɔ fa yoli Ezipt famiɛn'n nin i mɛn wunmuan'n.

Mmla'n 26:8

Ɔ man Anannganman fali e Ezipt lɔ bali. Ɔ ´fa e ´ba'n, sran fi ɔ'a kwla jrɛn-mɛn i nyrun. Ɔ yoli sa sroesroe mun. Ɔ yoli abonuan sa mun. Ɔ yili atrɛ mun.

Mmla'n 4:34

?Amuɛn onin yɛ ɔ'a ko de nvle kun nvle uflɛ sa nun kanga nun le-ɔ? Anannganman amun Nyanmiɛn'n ɔ ko fali amun Ezipt lɔ kanga nun bali. I sin nan ɔ'a ko yi amun ɔ'a fite'n, ɔ fali sa kekle mun yili Eziptfuɛ'm be su, ɔ nin be kunnin kunlɛ kpa, ɔ yili atrɛ mun, ɔ yoli abonuan sa mun nin sa sroesroe mun. Sa sɔ'm be yoli amun nyrun.

Mmla'n 7:19

Kɛ Anannganman amun Nyanmiɛn'n ɔ ´yi amun Ezipt lɔ fite'n, amun wunnin nyrɛnnɛn sa dandan ng'ɔ fa yili Eziptfuɛ'm be su'n, amun wunnin atrɛ ng'ɔ yili be mun nin abonuan sa ng'ɔ yoli be mun'n, amun wunnin kɛ sran fi ɔ'a kwla jrɛn-mɛn i nyrun. Sa kunngba sɔ'm be yɛ Anannganman amun Nyanmiɛn'n ɔ wa fa yo nvle nga amun sro be yɛ'n be kwlakwla-a.