Zeremi 3:3 - NYANMIƐN NDƐ'N 1998

³ I ti nzue'n ɔ'a tɔ-man. Wawa nun nzue'n ɔ'a tɔ-man. Sanngɛ ɔ waan san tekle'n cɛ yɛ a ´bo-ɔ, nán nyan yɛ a ko sa-a.

Zeremi 3:3 ပူးပေါင်းရင်းမြစ်များ

Bo Bolɛ 19:34

Kɛ aliɛ'n cɛnnin'n, kpɛnngbɛn'n seli i sinma'n kɛ: «Anunman e nin baba e lali. E `mɛn i nzan ekun ndɛ kɔnguɛ man ɔ bo nan a nin i be ko la nan i osu'n ɔ'a nunnun-man.»

Neemi 9:17

Bé nyin ɔ'a yi-man wɔ. Bé wla fili atrɛ fanunfanun nga a yili be'n. Be kpali be bɔbɔ bé su kpɛn. Be waan san be ´sa be sin Ezipt lɔ be ko yo kanga ekun. Sanngɛ ɔ liɛ'n, a ti Nyanmiɛn kun bɔ a yaci sa tɛ'n cɛ. A si aunnvuɛ, sran yo wɔ annvɔ. A fa-man ya ndɛndɛ, ɔ klun-ufue liɛ'n be kan-man, ɔ man w'a yi-man be ase.

Nyanndra Mun 21:29

Sran ng'ɔ yo sa tɛ'n, ɔ lafi i bɔbɔ i wun su. Sran ng'ɔ ti sran ndɛnman su'n, be kwla lafi i su.

Ezai 5:6

N ´saci i, be su kpɛkpɛ-man vinyi'n su kun, be su tutu-man fie'n nun kun. Flɔn nin owie'm be ´fifi nun, yɛ n ´se nzue ng'ɔ mlan'n kɛ nán ɔ tɔ su.

Zeremi 14:1

Nzue b'ɔ ko jran'n i ti yɛ Anannganman'n kannin ndɛ nga kleli Zeremi-ɔ.

Zeremi 14:22

?Nvle nga nunfuɛ'm bé finfin ninnge nga be su be'n, onin cɛ yɛ ɔ kwla tɔ nzue-ɔ? ?Nzue'n fin nglo lɔ tɔ sa ngbɛn? ?Nán wɔ yɛ man nzue'n tɔ-ɔ? Anannganman e Nyanmiɛn, ɔ su yɛ é wla'n wo-ɔ. Afin wɔ yɛ a yo sa ng'ɔ o lɛ i kwlaa nin-ɔn.»

Zeremi 14:3

Sran dandan'm be sunman be sran mun kɛ be ko sa nzue blɛ be. Be kɔ-ɔ, be nyan-man nzue gbo'm be nun lɔ. Be fa be sɛ kee'm be sa be sin ba. Be kata bé ti yɛ be ba-a nyannzuɛn'n dunman nun.

Zeremi 14:4

Nzue'n tɔ-man mɛn'n nun. Asiɛ'n ɔ'a tɛtɛ sa, i ti fie difuɛ'm be si-man wie se, be kata bé ti nyannzuɛn'n dunman nun.

Zeremi 36:2

«Fa fluwa nan Izraɛl, nin Zida, ɔ nin nvle kun'm bé wun ndɛ bɔ n ´kan kleli wɔ'n, klɛ. Kɛ ɔ fin cɛn bɔ m boli ɔ ndɛ kan klelɛ bo'n ɔliɛ Zozias blɛ su b'ɔ ´fa ju ndɛ'n, klɛ i sɔ'n ndɛ liɛ'n kwlakwla.

Zeremi 5:24

An bu-man akunndan se-man kɛ: ‹Man e nyin yi Anannganman e Nyanmiɛn'n, afin i yɛ kɛ nzue'n ju i blɛ'n, ɔ tɔ man ye-ɔ. Ɔ tɔ nzue klikli nin afuɛ nuan nzue kasiɛn'n. I yɛ man afuɛ nuan kwlakwla e nyan blɛ e ti e fie su ninnge mun-ɔn.›

Zeremi 5:25

Amún sa tɛ'n dunman nun ti ninnge sɔ'm b'a yo-man ye. Amun sa tɛ'm b'a tannin like kpakpa sɔ'm be atin.

Zeremi 5:3

Anannganman kusu nanwlɛ'n yɛ ɔ klo i-ɔ. A boli be sanngɛ nán be ndɛ-ɔ. Ɔ waan a ´wiewie be, sanngɛ b'a bua-man nun. Be yoli nyin kekle, be waan nán be yɛ be ko sa be sin be ko ba-a.

Zeremi 6:15

Sa tɛtɛ nga be yoli'n, ɔ yo-man be ya! Like nga be flɛ i nyannzuɛn'n, be si-mɛn i. I sɔ'n ti kusu sran nga be ´tɔ'n, be nin be yɛ be ´tɔ-ɔ. Blɛ nga e nin be e yia nun'n, be ´fin ase.»

Zeremi 8:12

Sa tɛtɛ nga be yoli'n, kɛ ɔ `yo be ya'n, nán be-ɔ! Like nga be flɛ i nyannzuɛn'n, be si-mɛn i. I sɔ'n ti kusu sran nga be ´tɔ'n, be nin be yɛ be ´tɔ-ɔ. Blɛ nga e nin be e ´nyɛn i'n, be ´fin ase.»

Zeremi 9:12

Anannganman'n waan: «Be yili mmla nga n fa mannin be'n i ase'n ti-ɔ. B'a tie-man min aniɛn'n ti-ɔ. B'a nian-man su b'a nanti-man'n ti-ɔ.

Ezekiɛl 3:7

Sanngɛ Izraɛlfuɛ'm be liɛ'n, be su tie-man ɔ ndɛ'n, afin be kunndɛ-man kɛ be ´ti mín nuan nun ndɛ'n, yɛlɛ kɛ bé nyin su ti kekle, yɛ be nzuɛn'n ti tɛ.

Saun Yolɛ 26:19

N ´nunn un amun wun tulɛ'n su. Ɔ man nyanmiɛn su lɔ ɔ ´tannin, nzue su fin-man lɔ tɔ-man kun. I sɔ ti man asiɛ'n ɔ ´mantan, ɔ ´yo kekleke kɛ blalɛ wafa wie sa .

Amɔs 4:7

Kɛ ble kpɛlɛ blɛ'n ka sra nsan nan ɔ'a ju'n, yɛ n jrannin nzue'n amun su-ɔ. N tɔli nzue'n klɔ wie'm be su. Klɔ wie'm be kali lɛ. Nzue'n tɔli fie wie'm be su, sanngɛ wie'm be kali lɛ, be wuli kee.» Anannganman'n yɛ ɔ kan sɔ kle amun-ɔn.

Amɔs 4:8

«Klɔ nnyɔn, wie-ɔ klɔ nsan be sufuɛ'm be ko yia klɔ kunngba su nzue nɛnnɛnlɛ. Be nɛnnɛn kusu-ɔ, ɔ ju-man be nɔnlɛ. Sanngɛ ɔ nin i sɔ ngba'n, amu'an bli-man amun nyin mín wun wa mlɔnmlɔn.» Anannganman'n yɛ ɔ kan sɔ kle amun-ɔn.

Sofoni 2:1

Amun bɔ amun si-man nyannzuɛn'n amun `kan amun anwlɛn'n i ase nan amun `bu akunndan kpa,

Sofoni 3:5

Kusu wuun sa kpa yolɛ ti yɛ Anannganman'n wo klɔ'n su-ɔ, nán sa tɛ yolɛ ti-ɔ. Nglɛmun kwlakwla ɔ yiyi i mmla'n nun, ɔ lɛ-man cɛn. Sanngɛ ɔ nin sɔ ngba'n, aeliɛ tɛfuɛ'm be ´yo sa'n sa-a, nyannzuɛn kaan sa kun-man be.

Ndɛ Nga Nyanmiɛn I Nuan Ijɔfuɛ Aze Kannin'n 1:11

N yoli man ngua wa lika'n nin oka lika'm be wuli kee. Ble fie mun nin vinyi fie, nin olivie fie mun, ɔ nin fie wafa-wafa'n kwlaa, wie fi ɔ'a yo-man ye. Sran nin nnɛn'm be kwlaa be fɛli. Sran'm be junman'n, wie fi ɔ'a yo-man ye.»

Mmla'n 28:23

Nzue su tɔ-man kun, asiɛ'n ´yo kekleke kɛ blalɛ sa.

Hébreu 12:25

An `nian amún wun kpa, nán an kpalo ndɛ nga be kan kle amun'n. Be nga be kpaloli sran ng'ɔ kan ndɛ kleli be asiɛ'n su wa'n i ndɛ'n, b'a fite-man nun. Sɛ e kusu e kaci e sin si sran ng'ɔ o nyanmiɛn su lɔ b'ɔ kan ndɛ kle ye'n, e su fite-man nun mlɔnmlɔn.