Zeremi 3:25 - NYANMIƐN NDƐ'N 1998

²⁵ E la nyannzuɛn nun siɛn'n. Nyannzuɛn'n yɛ e fa kata e su kɛ kondro sa-a. Afin kɛ ɔ fin e kaan nun b'ɔ ´fa ju ndɛ'n, e nin é si mun e fɔnnin Anannganman e Nyanmiɛn'n i wun. Y'a tie-man Anannganman e Nyanmiɛn'n i aniɛn'n.»

Zeremi 3:25 ပူးပေါင်းရင်းမြစ်များ

Jue Mun 106:6

E yoli sa tɛ kɛ e si'm be sa. E fɔnnin, e yoli klunwi.

Jue Mun 106:7

Atrɛ nga a yili be Ezipt lɔ'n, é si'm b'a wun-mɛn i wlɛ. Ye dandan nga a yoli be'n, bé wla ɔ'a kpɛn-man su. Be yoli nyin kekle Ndɛma jenvie'n i nuan lɔ.

Jue Mun 109:29

Be bɔ be kan min wun ndɛ tɛtɛ'n, man bé nyin gua ase. Man nyannzuɛn'n ɔ sra be kɛ tralɛ sa.

Nyanndra Mun 13:18

Sran nga i waan nán be tu i fɔ'n, ɔ yaci-man yalɛ dilɛ, nyannzuɛn kusu yaci-mɛn i kunlɛ le. Sran nga kusu bɔ be tu i fɔ-ɔ ɔ fa sie'n, be yaci-mɛn i mo yolɛ le.

Nyanndra Mun 5:13

?Ɔ yo sɛ bɔ m'an sie-man mín su min like klefuɛ'm bé nuan bo m'an ti-man be aniɛn-ɔn? ?Ɔ yo sɛ bɔ m'an sie-man mín su ngwlɛlɛ klefuɛ'm bé nuan bo-ɔ?

Ezai 48:8

B'a kan kle-man amun, amu'an ti-man nun ndɛ fi, amún su wa ti-man nun mlɔnmlɔn. Afin n si kɛ amun ti gblɛfuɛ. Kɛ amun wo amún nin klun bɔbɔ'n, be flɛ amun kɛ: Nyin Keklefuɛ mun.

Ezai 50:11

Amun kwlaa nga amun sɔ sin nuan'n, bɔ amun sɔ ta mma'm be nuan'n, amun ´wlu amun bɔbɔ amún sin sɔ'n nun, amun ´wlu ta mma nga amun sɔli be nuan'n be afiɛn. Anannganman yɛ man amun ´yo sɔ-ɔ. Amun ´tran nyrɛnnɛn'n nun.

Zeremi 11:13

Zidafuɛ'm be amuɛn'm be kpanngban nin be klɔ'm be nuan'n sɛ. Yɛ kɛ be klɔ'm be akpɔ'm be nuan'n fa ti'n, i su yɛ be nian be taka be nyannzuɛn like kɛ Baal sa'n i sɔwlɛ mun-ɔn.

Zeremi 12:13

Be guali ble, sanngɛ like nga be kpɛ'n yɛlɛ owie. Be fɛli lele ngbɛn, be su nyan-man like. Anannganman i ya dan b'ɔ fali'n ti'n like nga amun luali'n i su mma nga amun tili'n ti, man nyannzuɛn ´kun amun.»

Zeremi 14:20

Anannganman, e si kɛ e ti-man sɛsɛ ɔ nyrun. E si kɛ é si'm be yoli sa tɛ. Nanwlɛ e fɔnnin ɔ́ wun.

Zeremi 14:7

«Kɛ e nian e sa tɛ mun'n, e si kɛ y'a fɔn, sanngɛ Anannganman, nian ɔ dunman'n ti uka ye. E yoli nyin kekle'n sunman. E fɔnnin ɔ wun.

Zeremi 2:17

?Izraɛl nvle, nán ɔ bɔbɔ yɛ man i sɔ sa'n ju wɔ su-ɔ? Afin Anannganman bɔ yɛ ɔ ti wɔ atin klefuɛ'n, a kacili ɔ sin sili i.

Zeremi 2:19

Ɔ klunwi'n i su sa'n yɛ ɔ taka ɔ́ ti su lɛ-ɔ. Wɔ ajalɛ tɛ nga a tuli'n i su afɛ'n yɛ a ´fɛ i lɛ-ɔ. A wa wun kɛ kannzu min Anannganman bɔ n ti ɔ Nyanmiɛn'n min ase yilɛ'n, ɔ nin ɔ́ nyin b'ɔ yi-man min'n, ɔ ti sa tɛ dan kpa.» Anannganman Nyanmiɛn b'ɔ sie mɛn wunmuan'n yɛ ɔ kan sɔ-ɔ.

Zeremi 2:2

«Ko se Zerizalɛmfuɛ'm be kɛ: ‹Anannganman'n waan: Mantanlɛ nga kɛ amun tɛ yo kɛ talua sa'n amun nin min mantannin'n, klolɛ nga amun fa kloli min kɛ be fa klo bla bɔ b'a jɛ i uflɛ sa'n b'ɔ man an suli min su aawlɛ flɛnnɛn, bɔ be kwla di-man nun fie'n i nun'n, mín wla o su.

Zeremi 2:26

Cɛn kun Izraɛlfuɛ'm be wa wun nyannzuɛn kɛ awiefuɛ bɔ b'a trɛ i'n sa, i sran ngbɛn mun o, i famiɛn mun o, i famiɛn i awlo lɔ sran dandan mun o, i Nyanmiɛn nyrun jranfuɛ mun o, i Nyanmiɛn nuan ijɔfuɛ mun o, be wa wun nyannzuɛn.

Zeremi 20:18

Sɛ m'an fin-man min nin klun m'an fite-man'n, wuun i li flunman tra nyrɛnnɛn nga n ´wun i yɛ nin fɛlɛ nga n ´fɛ yɛ'n, ɔ nin nyannzuɛn nga n ´wun i cɛn kwlaa sa'n .

Zeremi 22:21

Blɛ nga sa fi nian ju-man'n yɛ n kan kleli wɔ-ɔ. A waan: ‹N tie-man.› Kɛ ɔ fin ɔ kaan nun lele'n, kɛ a yoli sɔ-ɔ. N kan ndɛ n kle wɔ-ɔ, a ti-man.

Zeremi 3:13

Ɔ man i ti'n, di ɔ́ sa tɛ'n i nanwlɛ: Nyin kekle nga a yoli i min Anannganman ɔ Nyanmiɛn'n min su'n, kan. A wanndi ɔli nvle uflɛ'm be amuɛn'm bé sin, a ɔli waka nga be lɛ nnya'n be kwlaa be bo. W'a tie-man min aniɛn'n.› » Anannganman'n yɛ ɔ kan sɔ-ɔ.

Zeremi 31:19

E kacili é sin sili wɔ, siɛn'n, y'a kaci ajalɛ'n. E bɔbɔ e wun kɛ nga e yoli'n ɔ'a yo-man kpa. Ɔ man e fin e wue'n nun. E gbanflɛn nun sa nga e yoli'n ɔ yo e nyannzuɛn.›

Zeremi 6:26

«Min sran mun, an `wla bajɛ tralɛ. An `la kondo ndutre nun. An `yo sɛ kɛ amun wa klikli'n ɔ'a wu sa. An `to sɛ jue ng'ɔ kle sunlɛ kpa'n, yɛlɛ kɛ like sacifuɛ'n su wa fu amun nun ɔ ´tɔ amun su.»

Zeremi 7:19

Anannganman wan yoo: «?Like nga be yo i lɛ'n, min yɛ be su yo min-ɔn? Be bɔbɔ yɛ be su yo be wun-ɔn. Ɔ ti be bɔbɔ be nyrun nyannzuɛn.»

Zeremi 8:14

?Ɔ yo sɛ ti yɛ e titi ase-ɔ? Amun man e yia e wlu klɔ nga be si bé wun'n be nun. E `ko wu lɔ. Afin Anannganman e Nyanmiɛn'n waan san wulɛ yɛ e ´wu-ɔ. Ɔ'a man e nzue nga duwlɛ o nun'n kɛ e `nɔn, sa tɛ bɔ e yoli i'n i dunman nun ti.

Zeremi 9:18

«Ngwlɛ yilɛ tɛ Siɔn lɔ: ‹Nguɛ nyrɛnnɛn liɛ yɛ e wun i sɔ-ɔ! Nguɛ nyannzuɛn liɛ yɛ e wun i sɔ-ɔ! E su tu é mɛn'n nun e ´kɔ. B'a bubu é sua mun.›

Ngwlɛ Yilɛ 5:16

E ti sika kle'n ɔ tu tɔli. Sa tɛ nga e yoli'n ti'n, y'a wun nyrɛnnɛn.

Ngwlɛ Yilɛ 5:7

E nannan'm bɔ be yoli be sa tɛ'n be nun-man nun kun. I sɔ'n kpɛkuun é ti su yɛ bé sa tɛ sɔ'n i trɔ'n ɔ'a taka-a .

Ezekiɛl 2:3

Ɔ seli min kɛ: «Klɔ sran, n su sunman wɔ Izraɛlfuɛ'm be sin. Akpasua tɛ sɔ'm bɔ bé nyin kekle'n ti-man kaan'n, b'a jaso mín wun ekun. Like kunngba nga be nannan'm be fa yoli min'n yɛ be kusu be fa yo min-ɔn. B'a yaci-man min gblɛ kpɛlɛ le, lele yɛ ɔ'a fa ju ndɛ yɛ.

Ezekiɛl 36:32

Man amun si kɛ nán amun ti yɛ n ´yo sɔ-ɔ. Min Anannganman Nyanmiɛn yɛ n kan sɔ-ɔ. Izraɛlfuɛ mun, man nyannzuɛn kun amun kpa liɛ su amun nzuɛn tɛ'n ti.»

Ezekiɛl 44:13

Be su jran-man min nyrun be ko di-man n junman'n kun, yɛ be su mantan-man like nga be ti n liɛ klonglo'n kun nin min lika'n kun. Be nyannzuɛn sa'n nin be tete sa nga be yoli'n, be su afɛ'n yɛ ɔ o lɛ-ɔ.

Ezekiɛl 7:18

Be ´wla bajɛ tralɛ, yɛ srɛ'n ´kun be kpo. Be kwlaa be ´wun nyannzuɛn. Be kwlaa be ´yi bé ti'n.

Daniɛl 12:2

Sran kpanngban bɔ be o ndia nun'n be ´jaso. Wie'm be ´nyan anannganman nguan, wie'm be kusu be ´wun nyannzuɛn b'ɔ lɛ-man awieliɛ'n.

Ndɛ Nga Nyanmiɛn I Nuan Ijɔfuɛ Oze Kannin'n 9:10

Anannganman'n waan: «Laa Izraɛl ti min nyrun kɛ aawlɛ flɛnnɛn wie nun vinyi mma sa. Kɛ n niannin amun nannan mun'n, n wunnin kɛ be like bɔ be fɛli i'n blɛ sɔ nun'n, yɛlɛ figie mma klikli nga be nyɛn i figie'n su'n. Sanngɛ be Baal-Pɛɔr lɔ julɛ yɛ, bé wun Baal b'ɔ ti nyannzuɛn like'n i sa nun fa wlalɛ yɛ. Be fali bé wun wlali amuɛn sɔ'n i sa nun, ɔ man be bɔbɔ be kacili tete like kɛ be soman uflɛ sɔ'n sa.

Sofoni 1:17

«N ´fa nyrɛnnɛn'n n ´yi i sran'm be su, be ´nanti kɛ anyansifuɛ mun sa. Fɔnlɛ bɔ be fɔnnin Anannganman wun'n ti, be mmoja'n ´sonji lika'n nun kɛ nzue sa, yɛ be fuɛn'n ´kplɔ kɛ ofuɛ su like sa.»

Rɔmfuɛ Mun 6:21

?Sa nga an yoli be laa bɔ siɛn'n be yo amun nyannzuɛn'n, nguɛ like yɛ an nyɛnnin i nun-ɔn? Sa sɔ'm be agualiɛ'n yɛlɛ wie.

Jɔlɛ Difuɛ Mun 2:2

Amun kusu n seli amun kɛ nán amun nin nvle nga i nun sran mun be tra aenguɛ. Amun `bubu be amuɛn sɔwlɛ mun. N seli amun sɔ, sanngɛ amu'an ti-man min aniɛn'n. ?Ɔ yoli sɛ ti yɛ amun yoli sɔ-ɔ ?