Zeremi 28:9 - NYANMIƐN NDƐ'N 1998

⁹ Sanngɛ sɛ Nyanmiɛn nuan ijɔfuɛ kun kan kɛ be wa nyan fɔundi'n, san ndɛ ng'ɔ kannin'n ´ju yɛ sran'm be si sakpa kɛ Anannganman'n yɛ ɔ sunmɛnnin i-ɔ.»

Zeremi 28:9 ပူးပေါင်းရင်းမြစ်များ

Ezai 44:26

Ndɛ nga min sufuɛ'm be kan'n, n jran su. Yɛ sa nga min sunmanfuɛ'm be jaja'n, n yiɛ i nuan.» N se kɛ: «Sran'm be ´tran Zerizalɛm klɔ'n nun ekun.» Yɛ n se ekun kɛ: «Zida klɔ'm be kusu, be ´kplan be uflɛ.» M ´man be talɛ nga be bubuli'n be su ekun.

Zeremi 14:13

Yɛ n tɛli su kɛ: «Ee! Anannganman Nyanmiɛn kpli, Nyanmiɛn nuan ijɔfuɛ'm be seli be kɛ: ‹Alɛ su tɔ-man amun su. Awe su kpɛn-man amun su. Nyanmiɛn'n ´yo man amun ´nyan fɔundi dan lika nga nun wa.› »

Zeremi 4:10

Be ´se kɛ: «Aa! Anannganman Nyanmiɛn w'a se-man e kɛ: ‹Amún wun ´jɔ amun fɔun'n›, kannzu lakalɛ yɛ a lakali nvle nga nunfuɛ nin Zerizalɛmfuɛ mun-ɔn. ?Yɛ ɔ yo sɛ yɛ alɛ'n ɔ'a di ye mlɔnmlɔn sa-a?»

Zeremi 6:14

Be ´fua min nvlefuɛ'm bé kannin nin-ɔn, be fa yo ngowa. Be waan sa fi su ju-man. Be waan lika'n ti fɔun, kusu wuun lika'n ti-man fɔun.

Zeremi 8:11

Be fa min nvlefuɛ'm bé kannin'n i fualɛ'n fa yo ngowa. Be waan: ‹Sa fi su ju-man. Lika'n ti fɔun.› Kusu wuun lika'n ti-man fɔun.

Ezekiɛl 33:33

Sanngɛ kɛ nyrɛnnɛn'n ɔ wa tɔ be su'n, nyrɛnnɛn sɔ'n b'ɔ o balɛ'n, yɛ be wa si jrɛiin kɛ Nyanmiɛn nuan ijɔfuɛ kun wo be nun-ɔn.»

Mmla'n 18:21

Wienun-ɔn, amun ´usa amún wun kɛ: «?E ´yo sɛ nan y'a si kɛ nán Anannganman yɛ ɔ kannin ndɛ nga-a, annzɛ i yɛ ɔ kannin-ɔn?

Mmla'n 18:22

Sran nga i waan ɔ ti Anannganman nuan ijɔfuɛ b'ɔ fa Anannganman dunman fa kan ndɛ wie kpɛkuun ndɛ sɔ'n ɔ'a kpɛn-man su'n, wuun nán Anannganman yɛ ɔ kannin-ɔn. Sran sɔ'n bɔbɔ yɛ ɔ dili wlɛwlɛ kannin ndɛ sɔ nin-ɔn. Nán srɛ kun amun i wun.»