Zeremi 28:3 - NYANMIƐN NDƐ'N 1998

³ Nan yoo, ɔ ka afuɛ nnyɔn sɛsɛsɛ, Anannganman i sua'n nun ninnge nga famiɛn Nɛbikadnɛzar fa ɔli Babilɔni'n, n ´fa be m ´ba lika nga nun ekun.

Zeremi 28:3 ပူးပေါင်းရင်းမြစ်များ

Bo Bolɛ 47:28

Zakɔb dili afuɛ blu-nin-nso Ezipt lɔ. I afuɛ'n kwlakwla yoli afuɛ ya afuɛ ablanan-nin-nso.

Bo Bolɛ 47:9

Zakɔb tɛli i su kɛ: «M'an tu m'an tran mɛnmɛn wie'm be nun lele afuɛ ya afuɛ ablasan. Sa yalɛ sunman nyannin min, i ti m'an yo oke ndɛ. N su cɛ-man kɛ mín si'm be sa, kusu be yoli wlan-wlan sinfuɛ wie kɛ min sa.»

2 Famiɛn Mun 24:13

Nɛbikadnɛzar fali Anannganman i sua'n nin famiɛn sua'm be nun ninnge kpakpa mun, kɛ Anannganman fa kannin'n sa. Ɔ sacili sika ɔkwlɛ ninnge nga Salomɔn yoli bɔ be fa be sieli Anannganman i sua'n nun kɛ be fa su Anannganman'n.

2 Be Nyoliɛ 36:10

I afuɛ nuan b'ɔ ´yia ekun'n, Nɛbikadnɛzar man be fɛ ɔli Babilɔni. Be fali Nyanmiɛn i sua'n nun ninnge kpakpa mun ɔli wie. Ɔ fali Zozakin niaan Sedesias sieli Zidafuɛ mun nin Zerizalɛmfuɛ'm be famiɛn.

2 Be Nyoliɛ 36:7

Ɔ fali Anannganman i sua'n nun ninnge wafa-wafa wie mun ɔli Babilɔni. Ɔ ko fa be sieli i famiɛn sua'n nun.

Jue Mun 90:10

Sɛ be waan y'a cɛ o, wuun y'a di afuɛ ableso. Be nga be lɛ wunmiɛn kpa'n be kwla di afuɛ ablaɔcuɛ. Sanngɛ afɛ nin nyrɛnnɛn ngunmin yɛ e wun i-ɔ. E nguan'n sin ndɛndɛ, wie'n fa e ndɛndɛ.

Daniɛl 1:2

Anannganman fali Zozakim b'ɔ ti Zida famiɛn'n wlali i sa nun, yɛ Nɛbikadnɛzar fali Nyanmiɛn i sua'n nun lɔ ninnge bɔ sika ɔkwlɛ ɔ nin jɛtɛ ufue yɛ be fa yoli be'n, be nun wie mun. Ɔ fali be ɔli Babilɔni mɛn'n nun lɔ. Yɛ ɔ sieli ninnge sɔ mun kan ɔ guɛ i amuɛn mma'm be ninnge liɛ'm be lɔ'n .