Zeremi 25:3 - NYANMIƐN NDƐ'N 1998

³ «Amɔn b'ɔ ti Zida famiɛn'n i wa Zozias i sielɛ'n i afuɛ blu-nin-nsan'n su yɛ Anannganman'n fɛli i ndɛ'n wlali mín nuan-an. Kɛ ɔ fɛ i lɛ b'ɔ ´fa ju ndɛ'n ɔ ti i afuɛ ablaɔn-nin-nsan. M'an sɔtɔ i kanlɛ m'an kan m'an flan nun lele nán tilɛ yɛ an ko ti-ɔ.

Zeremi 25:3 ပူးပေါင်းရင်းမြစ်များ

Bo Bolɛ 22:3

Yɛ Abraam ´jaso nglɛmun ndɛ yɛ ɔ ´fa aflunmun i su tranlɛ like'n ɔ ´fa sie i su-ɔ. Ɔ fɛli i sufuɛ'm be nun nnyɔn nin i wa Izaak. Yɛ ɔ ´kpaci yie ng'ɔ ko yi tɛ'n su nin-ɔn. Yɛ ɔ ´fa lika nga Nyanmiɛn kleli i'n i atin nin-ɔn.

1 Famiɛn Mun 22:3

Izraɛl famiɛn'n usɛli i mantanfuɛ'm be kɛ: «?Amun si kɛ Ramɔt ng'ɔ o Galaad lɔ'n ti e liɛ kɛ? Sanngɛ e kɛn-mɛn i Siri famiɛn'n i sa nun delɛ ndɛ.»

2 Famiɛn Mun 17:13

Anannganman fa ndɛ wlɛli i nuan ijɔfuɛ fanunfanun'm be kwlaa bé nuan. I waan be kan kle Izraɛlfuɛ mun, nin Zidafuɛ'm be kɛ be yaci be nzuɛn tɛtɛ mun, nan be fɛ i mmla fanunfanun'm bé su. I mmla sɔ'n, ɔ fa mannin Izraɛlfuɛ'm be nannan mun. I sin ɔ fa wlɛli i nuan ijɔfuɛ bɔ be ti i sufuɛ'n bé nuan kɛ be fa man be kusu be wie.

2 Be Nyoliɛ 24:19

Anannganman sunmɛnnin i nuan ijɔfuɛ mun kɛ be ko yo nan be sa bé sin blɛ i sin. Nyanmiɛn nuan ijɔfuɛ'm be kannin sa tɛ nga be yo'n i su ndɛ kleli be, sanngɛ sran fi ɔ'a fa-man be ndɛ sɔ'n.

2 Be Nyoliɛ 34:1

Kɛ Zozias ´yo famiɛn'n, wuun ɔ lɛ afuɛ mɔcuɛ. Ɔ trannin Zerizalɛm afuɛ ablasan-nin-kun.

2 Be Nyoliɛ 34:3

Kɛ ɔ yoli famiɛn'n, i afuɛ mɔcuɛ su'n, bɔ wuun ɔ tɛ yo gbanflɛn'n, ɔ fɛli i wun mantannin i nannan David i Nyanmiɛn'n. Sraka yiwlɛ lika mun nin waka nga be kplan be bɔ be sɔ be'n, ɔ nin amuɛn wafa-wafa'n kwlaa, i afuɛ nnan su'n, ɔ yili be Zerizalɛm lɔ nin Zida mɛn wunmuan'n nun.

2 Be Nyoliɛ 34:8

Kɛ Zozias yoli famiɛn'n, i afuɛ blu-nin-mɔcuɛ su'n, cɛn kun ɔ sunmannin Azalia wa Safan, nin Maazeza b'ɔ ti klɔ'n su kpɛn'n, ɔ nin Zɔakaz wa Zɔak b'ɔ ti famiɛn'n i nuan ijɔfuɛ'n. Ɔ seli be kɛ be ko siesie Anannganman i Nyanmiɛn'n i sua'n i ye. Afin i waan ɔ ´yo mɛn'n nin Nyanmiɛn i sua'n be saun.

2 Be Nyoliɛ 36:15

Anannganman b'ɔ ti be nannan'm be Nyanmiɛn'n, b'ɔ klo i nvle nunfuɛ mun nin i sua'n, ɔ sunmɛnnin i sran mun kpalɛ sunman kɛ be ko kɛn i nuan su ndɛ'n be kle be.

Jue Mun 81:13

Yɛ n yacili be bé nyin kekle tantrantan sɔ'n nun. Ɔ man be fali be bɔbɔ be akunndan'n be nantili !

Ezipt Lɔ Tulɛ'n 8:20

Anannganman yoli i kɛ ɔ fa kannin'n sa. Ngɔnsiɛn bɔ be nuan yo ya'n be bali kaka kpa, be fali Ezipt mɛn wunmuan'n, be wluli famiɛn'n i sua'n nun lɔ, ɔ nin i mantanfuɛ'm be liɛ'm be nun. Ngɔnsiɛn sɔ'm be sacili Ezipt mɛn'n.

Ezai 55:2

?Ɔ yo sɛ ti yɛ amun fa sika to aliɛ ng'ɔ ta-man sran nin-ɔn? ?Ɔ yo sɛ ti yɛ amun kle amún wun yalɛ be kunndɛ like ng'ɔ yi-man sran ku nin-ɔn? Sɛ amun ti ndɛ nga n kan be'n, amun ´nyan like kpa be ´di, aliɛ kpakpa mun yɛ amun ´di-ɔ .

Zeremi 1:2

Anannganman kannin ndɛ kleli i famiɛn Zozias i sielɛ'n i afuɛ blu-nin-nsan'n su. Amɔn b'ɔ ti Zida famiɛn'n i wa yɛlɛ Zozias.

Zeremi 11:7

Kɛ ɔ fin cɛn bɔ n fali amun nannan mun Ezipt mɛn'n nun m bali'n yɛ m boli ndɛ nga mun be kan klelɛ'n bo-ɔ. Lele ndɛ n tɛ kan n tɛ kle be. N se be kɛ: An `tie min aniɛn'n,

Zeremi 19:15

«Anannganman b'ɔ sie mɛn wunmuan'n, Izraɛl Nyanmiɛn'n wan yoo: ‹An `nian, nyrɛnnɛn sa nga n kɛnnin i ndɛ'n, n wa fa yi i klɔ nga nin i asa'n su klɔ'm be kwlaa be su, bé nyin kekle bɔ be yoli'n bɔ n kan ndɛ-ɔ be ti-man'n ti.› »

Zeremi 22:21

Blɛ nga sa fi nian ju-man'n yɛ n kan kleli wɔ-ɔ. A waan: ‹N tie-man.› Kɛ ɔ fin ɔ kaan nun lele'n, kɛ a yoli sɔ-ɔ. N kan ndɛ n kle wɔ-ɔ, a ti-man.

Zeremi 25:4

Anannganman'n ɔ sunmannin i sufuɛ mun sanngɛ nán ndɛ-ɔ. Ɔ sunmannin i nuan ijɔfuɛ mun, nán ndɛ-ɔ. Amun waan nán amun yɛ an ko ti-ɔ. Amun waan amun sie-man amún su be tie-man.

Zeremi 26:5

Amun `sie amún su min sufuɛ bɔ yɛlɛ min nuan ijɔfuɛ bɔ n sunmannin be amun sin'n be ndɛ bɔ be kan'n i bo. N sɔtɔli be sunmanlɛ nan andɛ sa-a, sanngɛ amun waan nán amun yɛ amun ko tie-ɔ.

Zeremi 29:19

Sa ti bɔ n ´yo be sɔ'n yɛlɛ min ndɛ bɔ n kan kleli be bɔ b'a tie-man'n.» Anannganman'n yɛ ɔ kan sɔ-ɔ. Ɔ kɛn i ekun kɛ: «N sunmannin min sufuɛ bɔ yɛlɛ min nuan ijɔfuɛ mun be sin, n sɔtɔli be sunmanlɛ-ɔ nán andɛ-ɔ. Sanngɛ be waan nán be yɛ be ko ti-ɔ.

Zeremi 32:33

B'a kpɛ-man bé nyin mín wun wa. Bé sin yɛ be kaci sili min-ɔn. Nán kɛ b'a kle-man be ngwlɛlɛ-ɔ. Nán andɛ yɛ be boli be ngwlɛlɛ klelɛ'n bo-ɔ. Sanngɛ nán kɛ be wa sie be su nan se kɛ be ´tie ndɛ nga be kan'n ti-ɔ.

Zeremi 35:14

«An `nian, ndɛ nga Zɔnadab b'ɔ ti Rekabfuɛ'n kan kleli i mma'm be kɛ nán be nɔn nzan'n, lele ndɛ be nɔn-man. Nga be nannan'n kan kleli be'n, be fali su. Sanngɛ min liɛ'n, m'an kan ndɛ m'an kle amun lele ngbɛn, nɛ́n i su yɛ an ko fa-a.

Zeremi 35:15

N sunmannin min sufuɛ bɔ be ti min nuan ijɔfuɛ mun, nán andɛ yɛ m boli be sunmanlɛ bo-ɔ. N waan be `se amun kɛ: ‹Amun kwlaa an `yaci amun nzuɛn tɛ'n nan amun kaci ajalɛ'n. Nán an ko tu amuɛn, nán an sɔ be, i liɛ amun ´ka lika nga n fa mannin amun nin amun nannan mun'n i nun, sanngɛ n kleli mín nuan yalɛ ngbɛn, amu'an sie-man amún su nan se kɛ amun ´fa su.

Zeremi 36:1

Zozias b'ɔ ti Zida famiɛn i wa Zozakim i sielɛ'n i afuɛ nnan'n su yɛ Anannganman'n kannin ndɛ yɛ'n kleli Zeremi-ɔ. I waan:

Zeremi 36:2

«Fa fluwa nan Izraɛl, nin Zida, ɔ nin nvle kun'm bé wun ndɛ bɔ n ´kan kleli wɔ'n, klɛ. Kɛ ɔ fin cɛn bɔ m boli ɔ ndɛ kan klelɛ bo'n ɔliɛ Zozias blɛ su b'ɔ ´fa ju ndɛ'n, klɛ i sɔ'n ndɛ liɛ'n kwlakwla.

Zeremi 44:4

N sunmannin min sufuɛ'm be kwlaa bɔ be ti min nuan ijɔfuɛ mun bé wun. M'an yaci-man be sunmanlɛ le. N yoli man be seli be kɛ: tete sa'n ɔ ti min ciliɛ, nán amun yo be.

Zeremi 7:13

Amun kusu, sa nga amun yoli i lɛ'n ti'n, m boli amun ndɛ kan klelɛ'n bo nglɛmun nun. N kan n flannin nun lelele, nán tielɛ yɛ an ko tie-ɔ. N flɛli amun lelele, nán min su yɛ an ko tɛ-ɔ.

Zeremi 7:25

Kɛ ɔ fin cɛn bɔ amun nannan'm be tuli Ezipt lɔ lele b'ɔ ´fa ju ndɛ'n, m'an yaci-man min sufuɛ'm be sunmanlɛ amun wun. M boli mín nuan ijɔfuɛ'm be sunmanlɛ bo nán ndɛ-ɔ.

Ezekiɛl 33:4

Sɛ sran kun ɔ ti awɛ'n i bolɛ'n nan ɔ bu-mɛn i ndɛ nan ɔ yaci i wun lɛ nan be kun i'n, i bɔbɔ yɛ ɔ kunnin i wun-ɔn, i bɔbɔ i ndɛ-ɔ.

Zakari 1:4

Nán an yo kɛ amun nannan'm be sa. Laa'n min nuan ijɔfuɛ'm be seli be kɛ m bɔ n sie mɛn wunmuan'n min waan be `gua be nzuɛn tɛ nin be aeliɛ tɛtɛ'm be ase. Sanngɛ b'a ti-man, b'a fa-man bé ti b'a de-man. Nán an yo kɛ be sa.

Marc 1:35

Nglɛmun ndɛ kpa'n kɛ lika'n tɛ dun'n, ɔ jao fitɛli, ɔ ɔli aawlɛ flɛnnɛn nun lɔ lika kun b'ɔ ti diin'n nun, ɔ nin Nyanmiɛn be ko koko yalɛ.

Jean 8:2

Kɛ aliɛ cɛnnin nglɛmun kpa'n, ɔ sɛli i sin Nyanmiɛn i sua'n nun lɔ ekun. Sran'm be kwlaa be bɛli i wun lɛ. Ɔ trannin ase yɛ ɔ sɔli be like klelɛ'n su-ɔ.

Jean 8:47

Sran ng'ɔ ti Nyanmiɛn liɛ'n, ɔ tie ndɛ ng'ɔ kan'n. Kɛ bɔ an ti-mɛn i liɛ'n ti yɛ ndɛ ng'ɔ kan'n an ti-man nin-ɔn.»

2 Timote 4:2

sɛ a nyan ɔ́ ti o, sɛ a nyan-man ɔ́ ti o, kan Nyanmiɛn ndɛ'n jran su kpa kle sran mun man be wun i wlɛ. Sran ng'ɔ yo sa'n ijɔ i, wla be fanngan, tra wɔ anwlɛn kpa kle be.