Zeremi 20:10 - NYANMIƐN NDƐ'N 1998

¹⁰ N ti mín wun ndɛ tɛtɛ bɔ sran sunman be kan'n. Be flɛ min: Nyrɛnnɛn'n ´Bo Sin Yia Amun. Wie'm be se kɛ: «An `sɛnmɛn i,» yɛ wie'm be sɔ su kɛ: «Ɛɛn, man e sɛnmɛn i.» Be kwlaa nga be nin min tran klanman laa'n, be su minndɛ kɛ n tɔ. Be waan: «Nga, ɔ ´fɔn le. E ´kwlɛ i yɛ e ´tu e klunngbɔ i su.»

Zeremi 20:10 ပူးပေါင်းရင်းမြစ်များ

1 Famiɛn Mun 19:2

Zezabɛl sunmannin sran kun kɛ ɔ ko se Eli kɛ: «Sɛ ainman dɔ kunngba nga su'n, m man b'a kun-man wɔ kɛ a fa kunnin Baal i nuan ijɔfuɛ'm be sa'n, man amuɛn'm be kun min.»

1 Famiɛn Mun 21:20

Eli ɔli, ɔ ko kannin ndɛ'n kleli Akab. Yɛ Akab seli i kɛ: «Nja b'ɔ kpɔ min, e nin wɔ y'a yia ekun.» Eli kusu waan: «Ɛɛn! Kɛ bɔ like ng'ɔ kun Anannganman i ya'n i cɛ yɛ ɔ waan a ´yo'n, i ti yɛ m bali-ɔ.

1 Famiɛn Mun 22:27

Nan se be kɛ: ‹Famiɛn'n waan: Amun `wla bian nga bisua. Amun `mɛn i kpaun kan tititi nin nzue nɔnwa lele man n fɛ i alɛ'n nun lɔ m ´bla juejuejue.› »

1 Famiɛn Mun 22:8

Izraɛl famiɛn'n tɛli Zozafat su kɛ: «Kun tɛ o lɛ, sanngɛ i wun yo-man min fɛ, afin min wun ndɛ liɛ ng'ɔ kan kle min'n, wie fi ti-man kpa. Be flɛ i kɛ Mise, Zimla i wa-a.» Zozafat tɛli i su kɛ: «Famiɛn, ɔ li nán kan sɔ.»

Zɔb I Nyrɛnnɛn Wunlɛ 19:19

Be nga n kan n klun ndɛ n kle be laa'n, min wun yo be kwlaa be tɛ. Be nga n klo be'n, b'a jaso min wun.

Jue Mun 31:13

Bé wla fi min kɛ sran bɔ ɔ'a wu'n sa. N ti min liɛ kɛ like wie bɔ ɔ'a mlin'n sa.

Jue Mun 31:14

Sran sunman be kan mín wun ndɛ tɛtɛ, n ti. Be wla min srɛ lika'n kwlakwla nun. Be cici min wun ndɛ. Min kunlɛ akunndan yɛ be bu-ɔ.

Jue Mun 41:10

Min janvuɛ kpa bɔbɔ nga e nin i e ti koko nnya nun-ɔn ɔ ti-man, bɔ n fa min wla'n n guɛ i su'n, bɔ e nin i e wla asa'n, ɔ'a kaci min kpɔfuɛ .

Jue Mun 41:9

Be se kɛ: «Like tɛ kpa bɔ yɛ ɔ'a tɔ i su lɛ-ɔ! Nga, lalɛ ng'ɔ la lɛ'n, nán kɛ ɔ ´jaso ekun ti-ɔ!»

Jue Mun 57:4

Kɛ ɔ o nglo lɔ'n, ɔ wa uka min. Ɔ wa yo man sran ng'ɔ su min su nin ndɛnngan'n ɔ ´wun nyannzuɛn. Man ɔ yi i klun-ufue b'ɔ wie-man'n i nglo kle min.

Nyanndra Mun 10:18

Sran nga bɔ i wiengu wun kpɔɛ o i klun b'ɔ fia su'n, i sɔ sran liɛ'n ɔ ti gblɛfuɛ. Yɛ sran nga kusu b'ɔ tɔn sran suɛn sin'n, i sɔ sran liɛ'n ɔ ti sinnglinfuɛ.

Ezai 29:21

Be nga be ndɛ bɔ be kan nun be bu sran wie fɔ jɔlɛ diwlɛ lɔ'n, be nga be sua jɔlɛ difuɛ'm bé bo aya'n, yɛ be nga be yo man be bu sran nga be ndɛ yo fɛ'n be fɔ ngbɛn'n, be sɔfuɛ'm be su tran-man lɛ kun.

Zeremi 1:19

Be nin wɔ be ´kun, sanngɛ be su kwla-man wɔ, afin n jin ɔ́ sin, n ´de wɔ.» Anannganman'n yɛ ɔ kan sɔ-ɔ.

Zeremi 11:19

Laa n ti kɛ bua nga ɔ'a kpɛ cro wie bɔ be ´fɛ i kɔ i kunlɛ-ɔ ɔ kpli-man'n sa. Min wun akunndan tɛtɛ wla nga be ´bu'n, n si-man nun. Be ko se kɛ: «E `kun waka'n nin i mma mun, man be jaso lɛ. Nán be bo be ndɛ su di jɔlɛ kun.»

Zeremi 11:21

Ɔ man Anatɔtfuɛ mun bɔ be kunndɛ kɛ n wu'n bɔ be waan: « Nán kan Anannganman'n i nuan ndɛ'n, ɔ'a yo-man sɔ-ɔ, e ´kun wɔ'n,»

Zeremi 18:18

Be wie'm be se kɛ: «An man e cici Zeremi i wun ndɛ, afin i kunngba'n ti man Nyanmiɛn nyrun jranfuɛ'n su wie-man nan se kɛ mmla'n ´ka lɛ mlin. Ngwlɛlɛfuɛ'm be kusu be su wie-man nan se kɛ e su nyan-man afɔtuɛ manfuɛ kun. Nyanmiɛn nuan ijɔfuɛ'm be su wie-man nan se kɛ e su ti-man Nyanmiɛn nuan ndɛ'n kun. Man e saci i wun. Sɛ ɔ kan ndɛ siɛn'n, nán e sie é su kun.»

Zeremi 20:3

Kɛ aliɛ'n cɛnnin'n, Pasir nyannjili Zeremi kpɛkuun Zeremi seli i kɛ: «Anannganman'n flɛ-man wɔ Pasir kun, ɔ ´flɛ wɔ Magɔr-Misabib siɛn'n, i bo'n yɛlɛ kɛ Nyrɛnnɛn Bo Sin Yia Amun.

Zeremi 37:13

Kɛ ɔ ko juli anuan'n nga be flɛ i kɛ Bɛnzamɛn anuan'n nun lɔ'n, wuun Anania i wa Selemia i wa liɛ Zirɛiza b'ɔ ti gladi difuɛ'm be kpɛn'n, yɛ ɔ o lɛ-ɔ. Yɛ ɔ tra Zeremi-ɔ, i waan: «Ee! ?A su fa ɔ wun ´ko man Babilɔnifuɛ mun?»

Zeremi 6:25

Nán amun fite be wɔ blo lɔ. Nán an wɔ atin'm be su. E kpɔfuɛ'm be o lɔ, be ´ko kun amun. Ɔ lɛ-man lika kun nga nyrɛnnɛn'n nun-man lɛ-ɔ.

Ezekiɛl 22:9

Ɔ lɔ'n, sran wie'm be o lɔ be saci sran'm be dunman nan be `kun be. Sran nga be o ɔ lɔ'n, be di amuɛn aliɛ oka'm be su. Be fa wlaka yolɛ'n be cici bé ti.

Daniɛl 6:4

Daniɛl i junman ng'ɔ di'n ɔ trɛ i wiengu nnyɔn'm be liɛ'n yɛ ɔ tra akpasua'm bé su kpɛn'm be kpɛnngbɛn'm be kwlaa be liɛ'n. Afin wawɛ ng'ɔ o i nun'n i dan tra be liɛ'n. I sɔ'n ti, famiɛn waan ɔ ´fɛ i fa sie i famiɛn diwlɛ wunmuan'n su.

JÉSUS-CHRIST I DYASIN FE'N BO LUC KLELI'N 20:20

Ɔ man be sɛsɛ i, be sunmannin sran wie'm be kɛ be ko kplɛ i nian, sran sɔ'm be yoli bé wun kɛ sran nanwlɛfuɛ mun sa, be waan be ´tie i nuan bo ndɛ, nan be ´fɛ i man jɔlɛ difuɛ mun nin kpɛnngbɛn'n.

Sa nga bé yôli'n 24:13

Sa nga ti yɛ be sanmannin min ndɛ'n, b'a wun-man sa fi bɔ be kwla jran su b'ɔ kle kɛ be ndɛ'n ti nanwlɛ-ɔ.

Sa nga bé yôli'n 5:33

Kɛ be tili ndɛ sɔ'n, ya kunnin be dan kpa, i sɔ'n ti be waan be ´kun be.

Sa nga bé yôli'n 7:54

Kɛ be tili ndɛ sɔ'n, be fali ya dan kpa yɛ be trili.