Zeremi 2:17 - NYANMIƐN NDƐ'N 1998

¹⁷ ?Izraɛl nvle, nán ɔ bɔbɔ yɛ man i sɔ sa'n ju wɔ su-ɔ? Afin Anannganman bɔ yɛ ɔ ti wɔ atin klefuɛ'n, a kacili ɔ sin sili i.

Zeremi 2:17 ပူးပေါင်းရင်းမြစ်များ

1 Be Nyoliɛ 28:9

Min wa Salomɔn, ɔ liɛ'n, kplin ɔ́ nyin nan si Nyanmiɛn nga n su i'n kpa. Gua ɔ wla ase nan su i kpa, nán fa like uflɛ ukɛ i su, afin Anannganman nian kɛ e anwlɛn'n fa ti'n. Ɔ si e klun akunndan'n kwlaa. Sɛ a fa ɔ wun mɛntɛn i'n, ɔ ´yi i wun nglo ´kle wɔ, sanngɛ sɛ a kaci ɔ sin a si i'n, ɔ ´yi wɔ blo mlɔnmlɔnmlɔn.

2 Be Nyoliɛ 15:2

Azaria ko toli Aza-a. Ɔ seli i kɛ: «Nannan Aza, a nin Zidafuɛ mun, nin Bɛnzamɛnfuɛ mun kwlaa, amun `tie, n ´kan ndɛ. Sɛ amun nin Anannganman o nun'n, i kusu nin amun wo nun. Sɛ amun fa amun wun mɛntɛn i'n, ɔ ´yo man amun ´wun i. Sɛ amun kpɔci i'n, ɔ ´kpɔci amun.

Zɔb I Nyrɛnnɛn Wunlɛ 34:27

Yɛlɛ kɛ be kacili bé sin be sili i. Be waan be fɛ-mɛn i ndɛ'm be su.

Zɔb I Nyrɛnnɛn Wunlɛ 4:8

Nga m'an sie i nzɔliɛ kpa'n yɛlɛ nga: sran nga sa tɛ'n yɛ ɔ ti be junman yɛ be di'n, bɔ sa ng'ɔ ti-man su'n yɛ ɔ ti kɛ be like sa yɛ be lua'n, san be ´ti i su mma'n.

Jue Mun 107:7

Ɔ fali be sinnin atin trele wie su kɛ ɔ ´yo nan b'a ko fite klɔ bɔ sran tran su'n i su'n ti.

Jue Mun 136:16

Ɔ fɛli i nvle'n nunfuɛ mun sinnin aawlɛ flɛnnɛn'n nun lɔ, afin i klun-ufue'n wo lɛ tititi.

Jue Mun 77:20

A kpɛ wɔ atin'n jenvie'n nun. A yili wɔ sinwlɛ'n nzue dan'n nun. Sanngɛ b'a wun-man ɔ osu.

Nyanndra Mun 15:10

Sran nga b'ɔ yaci atin kpa'n ɔ ko fa tɛ'n, i sɔfuɛ'n, be `tu i fɔ kpa. Nga kusu bɔ be tu i fɔ-ɔ ɔ fa-man'n, san wie'n cɛ yɛ ɔ ´kun i-ɔ.

Ezai 1:4

Nvle b'ɔ ti sa tɛ yofuɛ, nvle bɔ sran kunlɛ'n ti i nzuɛn'n, nvle bɔ i nunfuɛ'm be ti kakajefuɛ ngunmin kokoko'n, amu'an wie wu mlɔnmlɔnmlɔnmlɔn, amun yako! Amu'an yi min Anannganman min ase, amu'an yo min bɔ n ti Izraɛl i Nyanmiɛn kunngba'n min finfin, amu'an kaci amun sin b'a si min.

Ezai 59:13

E nyin yi-man Anannganman, e kpɛ i gblɛ, e kan ndɛ kekleekle bɔ be ti tɛtɛ'n, e jaso i wun, gblɛ kpɛlɛ'n yɛ ɔ wo e nun-ɔn, ɔ man e bua ato.

Zeremi 13:22

A wa usa ɔ́ wun kɛ: ‹?Nguɛ ti yɛ sa nga'm be ju min su-ɔ?› Sɛ a ti bla'n, wuun n ´se kɛ sa tɛ dan bɔ a yoli'n ti yɛ be trali wɔ bɔ be nin wɔ lali kekle nun nin-ɔn.

Zeremi 19:4

Afin be kacili be sin be sili min. Be yoli lele man a wun lika nga-a, a si-mɛn i kun. Be yrali ansans mannin amuɛn wie mun bɔ bé si mun nin Zida famiɛn mun be si-man be laa'n nan se kɛ be bɔbɔ. Sran nga b'a yo-man sa'n, b'a kun be lele be mmoja'n ɔ'a yi lika sɔ'n.

Zeremi 2:13

Afin min nvle'n ɔ'a yo sa tɛtɛ nnyɔn, yɛlɛ kɛ min bɔ n ti kɛ nzue ti b'ɔ wie-man nun sa'n, be yaci min lɛ, kpɛkuun be ko kplan nzue guawlɛ b'ɔ tɛtɛli bɔ be gua nun nzue-ɔ, ɔ ´jran-man.› »

Zeremi 2:19

Ɔ klunwi'n i su sa'n yɛ ɔ taka ɔ́ ti su lɛ-ɔ. Wɔ ajalɛ tɛ nga a tuli'n i su afɛ'n yɛ a ´fɛ i lɛ-ɔ. A wa wun kɛ kannzu min Anannganman bɔ n ti ɔ Nyanmiɛn'n min ase yilɛ'n, ɔ nin ɔ́ nyin b'ɔ yi-man min'n, ɔ ti sa tɛ dan kpa.» Anannganman Nyanmiɛn b'ɔ sie mɛn wunmuan'n yɛ ɔ kan sɔ-ɔ.

Zeremi 4:18

«Sa ti b'ɔ yo sɔ'n yɛlɛ ɔ nzuɛn'n nin wɔ aeliɛ mun. Sa sɔ'n b'ɔ ju wɔ su'n, sa tɛ bɔ a yoli'n ti-ɔ, a wun i ya kpa. Ɔ wlu ɔ wun kpa sa fiaan!»

Zeremi 44:3

Sa ti bɔ n yoli be sɔ'n, yɛlɛ sa tɛ bɔ be yoli be fa klɔklɔli min'n. Amuɛn nga bé si'm b'a si-man be bɔ be bɔbɔ kusu be si-man be laa'n, be ko yrali ansans mannin be, be sɔli be.

Zeremi 5:25

Amún sa tɛ'n dunman nun ti ninnge sɔ'm b'a yo-man ye. Amun sa tɛ'm b'a tannin like kpakpa sɔ'm be atin.

Ezekiɛl 39:24

N niannin kɛ be sa tɛtɛ'm be fa ti'n i su yɛ n yoli be sa nin-ɔn. N kacili mín sin n sili be.»

Ndɛ Nga Nyanmiɛn I Nuan Ijɔfuɛ Oze Kannin'n 13:9

Izraɛlfuɛ mun, amun nunnunlɛ'n ɔ fin min wun bɔ amun jasoli'n. ?Wan yɛ ɔ wa uka amun-ɔn?

Mise 1:5

Sa ti bɔ i sɔ ninnge'm be ´yo'n, yɛlɛ sa tɛ bɔ Zakɔb i osu nunfuɛ mun be yoli'n, yɛlɛ tɛ bɔ Izraɛl nvle'n yoli'n. ?Zakɔb i osu nunfuɛ'm bé sa tɛ'n bɔ be yo'n i bo'n ɔ fin wan? I bo'n fin Samarifuɛ mun. ?Zidafuɛ'm be kusu be amuɛn sɔlɛ'n i bo'n ɔ fin wan? I bo'n fin Zerizalɛmfuɛ mun.

Kalɛ 32:23

Sanngɛ sɛ amu'an yo-mɛn i sɔ'n, wuun amu'an fɔn Anannganman'n i wun. Kusu man amun si jrɛiin kɛ, sa tɛ nga amun yoli'n, amun wa fɛ i su afɛ'n.

Mmla'n 32:10

Aawlɛ flɛnnɛn'n nun lɔ yɛ ɔ ko fiteli Izraɛl'n i su-ɔ, lika sɔ'n nun lɔ'n, nnɛn mun yɛ be ti be kpanlɛ-ɔ. Ɔ ko fali Izraɛl, ɔ niɛnnin i lika, ɔ sɛsɛli i. Ɔ niɛnnin i su kpa kɛ be fa nian be nyinma ba'n su sa.

Mmla'n 32:19

Kɛ Anannganman wunnin kɛ i wa yasua mun, nin i wa bla sɔ'm be fɔkɔ i anwlɛn'n, kpɛkuun bé wun ɔ yoli i tɛ.