Zeremi 2:15 - NYANMIƐN NDƐ'N 1998

¹⁵ I ti asɔmɔli'm be kpan sa-a, nán sa yolɛ-ɔ. B'a nunkun i mɛn'n mlɔnmlɔn. B'a wɔ i klɔ'm be nun, sin su di be, sran fi tran-man be su kun.

Zeremi 2:15 ပူးပေါင်းရင်းမြစ်များ

Zɔb I Nyrɛnnɛn Wunlɛ 4:10

Be kpanlɛ bɔ be kpan fiaan kɛ asɔmɔli sa'n, Nyanmiɛn man ɔ kpɛ. Asɔmɔli nga b'a kpɛ cro'n be je'm be bubu bɔbɔ.

Jue Mun 57:4

Kɛ ɔ o nglo lɔ'n, ɔ wa uka min. Ɔ wa yo man sran ng'ɔ su min su nin ndɛnngan'n ɔ ´wun nyannzuɛn. Man ɔ yi i klun-ufue b'ɔ wie-man'n i nglo kle min.

Ezai 1:7

Amun mɛn'n ɔ'a bo, sin'n ɔ'a di amun klɔ mun. Aofuɛ'm be fɛn amun bo ninnge mun amun bɔbɔ amun nyrun lɛ. Amun mɛn'n ɔ'a yo kɛ aawlɛ flɛnnɛn'n sa, ɔ ti kɛ sran wie mun b'a wlu mɛn kun nun b'a saci i sa.

Ezai 24:1

Amun `nian, Anannganman wa saci asiɛ'n, ɔ man asiɛ'n i sufuɛ'm be ´wie. Ɔ ´utu i nyin ase, yɛ ɔ ´sanngan be nga be o su'n be nun.

Ezai 5:29

Be kpanlɛ nga be kpan'n, ɔ ti kɛ asɔmɔli bla'm be liɛ'n sa, be kpan kɛ asɔmɔli ba mun sa. Be kpan, be tra be nnɛn'n, be fa kɔ, sran fi kwla de-mɛn i be sa nun.

Ezai 5:9

Amun `nian, sa nga Anannganman b'ɔ sie mɛn wunmuan'n ɔ kan kleli min'n yɛ, i waan: «Sua kpanngban nga'm be wa bubu. Sran su tran-man sua dandan nglanman-nglanman nga'm be nun kun. Sa sɔ'm be ´yo sɔ sakpa!

Ezai 6:11

Yɛ n usali kɛ: «?Anannganman, lele cɛn onin yɛ sa sɔ'm be ´wie-ɔ?» Yɛ ɔ tɛli su kɛ: «Ɔ ´yo sɔ lele san klɔ'm be ´wie saci. Ɔ ´yo sɔ lele san klɔ mun nin sua'm be nun sran'm be ´wie, san asiɛ ng'ɔ sacili'n i su ´tɔ koun.»

Zeremi 10:22

An `tie nganniɛn ng'ɔ tɛ ba'n. Mɛn i sannganlɛ like kun fin mɛn'n i nglo lɔ lika'n nun su ba. Ɔ wa nunnun Zida klɔ mun. Be ´kaci nsoso'm be lawlɛ.

Zeremi 25:30

Anannganman seli min ekun kɛ: «Kan mín nuan ndɛ'n ng'ɔ o lɛ'n kwlaa kle be, yɛ kan gua su kɛ: ‹Anannganman'n wo nglo lɔ ɔ kpan ya su fiaan fiaan. Ɔ o i lika'n nun lɔ ɔ kpan. Ɔ kpan i lika'n nun lɔ, ɔ kpan ya su fiaan fiaan. Ɔ kpan kɛ be bɔ be kpita vinyi mma'n be fa kpan'n sa. Ɔ kpan mɛn nunfuɛ'm be kwlaa be su.

Zeremi 25:9

n wa ko yia amun mɛn'n i nglo lɔ nvle'm be kwlakwla, yɛ n ´yia min sufuɛ Nɛbikadnɛzar b'ɔ ti Babilɔni famiɛn'n. N ´fa be m ´ba kɛ be nin mɛn nga nunfuɛ mun nin mɛn nga be mantan wa'n be nunfuɛ mun be wa kun nan be `bo wa mɛn'n. Ɔ man kɛ sran'm be wa wun amun'n, amun ´yo be sro, be ´fa amun di flɛn, yɛ be ´nunnun amun mlɔnmlɔn.

Zeremi 26:9

?Wan yɛ ɔ tuli wɔ kɛ a se kɛ Anannganman'n waan: ‹Sua nga ´yo kɛ Silo fa yoli'n sa nan ɔ ´nunnun, nan sran su tran-man su kun nin-ɔn?› » Yɛ be kwlaa be ´kpɛ sin yia Zeremi Nyanmiɛn i sua'n i awlo'n nun-ɔn.

Zeremi 33:10

Anannganman'n wan yoo: «Klɔ nga amun waan ɔ'a saci nan sran nin nnɛn fi nun-man su kun'n, Zida klɔ nin Zerizalɛm akpɔ mun bɔ amun waan b'a tɔ srolo man sran nin nnɛn fi nun-man be su kun'n, sran'm be wa bo sro lika sɔ'm be nun, be ´ti be ngan. Be wa ´to aklunjuɛ jue. Yasua annzɛ bla nga b'a ja be wun uflɛ uflɛ'n be ´to jue. Be bɔ be to jue ng'ɔ o yɛ'n, be ´ti be nɛn ekun. Be waan: ‹Man be manman Anannganman b'ɔ sie mɛn wunmuan'n, afin ɔ ti kpa yɛ i klun-ufue'n wo lɛ tititi.› Be nga be fa bo kun yolɛ i su tɛ nnɛn'n be fa ba Anannganman i sua'n nun'n, be ´ti be nɛn'n. Afin mɛn nga nun sran bɔ be trali be lomuɛn'n, n ´fa be m ´ba. N ´fa be n ´sie be osu laa'n nun.» Anannganman'n yɛ ɔ kan sɔ-ɔ.

Zeremi 34:22

N wa ijɔ n ´kle sonja sɔ mun, n ´yo man be sa bé sin be ba klɔ nga su. Be nin i sufuɛ mun be wa kun, be ´fa klɔ'n, be ´fa sin ´yi nun. N ´yo man Zida klɔ'm be ´tɔ srololo, sran fi su ijɔ-man su kun.› »

Zeremi 4:7

Asɔmɔli'n ɔ'a fin susrɛ'n nun ɔ'a fite, mɛnmɛn'm be sacifuɛ'n su ba. Ɔ fin i lika nun lɔ su ba amun mɛn'n i nunkunlɛ. Amun klɔ'm be wa nunnun. Sran fi su tran-man be su kun.

Zeremi 44:22

?Nán amun aeliɛ tɛ sɔ'n nin amun tete sa sɔ'm be ti yɛ Anannganman nin amun b'a sɔn-man yɛ man amun mɛn'n boli bɔ ɔ'a saci mlɔnmlɔn nin-ɔn? ?Nán sa sɔ'm be ti yɛ man ɔ'a tɔ nvati andɛ lɛ-ɔ?

Zeremi 5:6

I sɔ'n ti yɛ asɔmɔli'm be fin bo nun lɔ bɔ be fa be nyin wɔ be nin-ɔn. I sɔ'n ti yɛ blo alua mun bɔ be o lika kpɛtɛkplɛɛ'm be nun'n, be titi be nun nin-ɔn. I sɔ'n ti yɛ kangale'n bu sa be klɔ'm be sin ɔ titi be kwlaa nga be fin lɔ fite'n be nun nin-ɔn. Kannzu bé nyin kekle aeliɛ b'ɔ sɔnnin sa'n ti-ɔ. Be nyin kekle beblebe sa'n ti-ɔ.

Zeremi 50:17

Izraɛl ti kɛ bua bɔ asɔmɔli'm b'a fuɛn i bɔ ɔ'a mlin'n sa. Sran ng'ɔ dun mmua dili i'n yɛlɛ Asiri famiɛn'n. Kpɛkuun Babilɔni famiɛn'n kusu ɔ wa boboli i owie'n.

Zeremi 51:38

Kɛ e ´se yɛ'n, tianlɛ'n yɛ Babilɔnifuɛ mun be tian kɛ asɔmɔli wie bɔ b'a kpɛ cro'n sa. Kpanlɛ yɛ be kpan kɛ nnɛn wie bɔ b'a kpɛ cro'n sa.

Zeremi 6:8

Zerizalɛm: ‹Nian ɔ́ wun. Ɔ'a yo-man sɔ-ɔ, e nin wɔ e ´bu. N ´fa wɔ n kaci aawlɛ flɛnnɛn, sran fi su tran-man wɔ su.› »

Zeremi 9:10

Anannganman waan: «N ´yo man Zerizalɛm nunnun mlɔnmlɔn. Ɔ ´yo nsoso'n be lawlɛ. N ´yo man Zida klɔ'm be tɔ srololo. Sran fi su tran-man be su kun.»

Zeremi 9:11

Sran ng'ɔ si ngwlɛlɛ'n b'ɔ wun sa sɔ'm be wlɛ'n, man ɔ kan. Sran nga Anannganman'n kannin ndɛ kleli i'n, man ɔ kan sa ti bɔ mɛn'n sacili'n, b'ɔ man ɔ'a tɔ srolo'n, bɔ sran fi sin-man nun'n.

Ezekiɛl 36:3

I sɔ'n ti'n, kan be su ndɛ. Se kɛ: ‹Anannganman Nyanmiɛn wan yoo: Nanwlɛ, bue'n kwlaa su be waan be ´saci amun, be waan be ´fa amun nan amun `kaci nvle uflɛ'm be liɛ, i ti be yoli amun finfin, yɛ be kpɛli amun nzowa.›

Ezekiɛl 5:14

N wa bubu Zerizalɛm klɔ'n. Nvle nga be sin yia amun lɛ'n, ɔ nin be nga be ´sin'n amun nyrun lɛ'n, amun ´sokpa be nun .

Ndɛ Nga Nyanmiɛn I Nuan Ijɔfuɛ Oze Kannin'n 11:10

Be nga be bo be sanndili'n, be wa su Anannganman'n su, Anannganman b'ɔ kpan kɛ asɔmɔli sa'n, be ´su i su. Kɛ ɔ ´kpan sa'n, i mma'm bɔ be o jenvie'n i bue kun lɔ'n be ´usu yɛ be ´ba-a.

Ndɛ Nga Nyanmiɛn I Nuan Ijɔfuɛ Oze Kannin'n 5:14

Afin m bɔbɔ min n ´kaci kɛ asɔmɔli sa Efraimfuɛ'm bé wun, n ´kaci kɛ asɔmɔli bɔ ɔ'a kpɛ cro'n sa Zidafuɛ'm bé wun, n ´titi be nun kpɛkuun n su kɔ min nyrun. Kɛ n ´kɔ'n, n ´fa be m ´bo min je nun n ´kɔ, sran fi sa su kwla-man be mín nuan nun de.

Amɔs 3:12

Anannganman'n wan yoo: «Kɛ asɔmɔli tra bua kun'n, i nga bua kankanfuɛ'n kwla de i nuan nun'n, yɛlɛ bua'n i ja nnyɔn, wie kusu-ɔ i sukpɔ nnya'n i bue kan. Sa kunngba sɔ'n yɛ ɔ wa tɔ Izraɛlfuɛ nga be tran Samari'n be su-ɔ. Be bɔ be la bia ndɛnndɛn kpakpa'm be nun'n nin be bɔ be la bɛ fɔkunfɔkun'm be su'n, san be nun kaan sa yɛ be ´nyan bé ti-ɔ.»

Amɔs 3:4

?Kɛ asɔmɔli'n wo bo nun lɔ'n, sɛ ɔ'a tra-man nnɛn wie'n, be ti i kpanlɛ? ?Kɛ asɔmɔli bɔ ɔ'a kpɛ cro'n ɔ wo i lawlɛ nun lɔ'n, sɛ ɔ'a tra-man like'n, ɔ kpan?

Amɔs 3:8

?Kɛ asɔmɔli kun tian sa'n, wan yɛ ɔ se kɛ ɔ bo-man bli-ɔ? ?Sɛ Anannganman Nyanmiɛn'n fa ndɛ wlɛ i sran kun nuan'n, ɔ lɛ atin se kɛ ɔ kan-man?

Naɔm 2:11

Be de ninnge mun, be saci-saci be, be fɛn be! Sran'm bé sa sin ɔ'a bubu be, be jran bé ja'm be su-ɔ, ɔ jran-man kun, be usu sa kpɛkpɛkpɛ, kɛ a wun be nyrun'n a si kɛ srɛ kun be .

Sofoni 1:18

Anannganman i ya cɛn dan nun'n, be sika nin be sika ɔkwlɛ'n be su kwla de-man be. I ya b'ɔ ti kɛ sin sa'n, ɔ ´nunnun mɛn wunmuan'n. Ee, nanwlɛ, ɔ ´yo kekle o! Anannganman ´nunnun asiɛ'n su sran'm be ngba sekeseke .

Sofoni 2:5

Amun bɔ an fin Keret, bɔ an tran jenvie'n nuan'n, amun yako! Afin amún wun ndɛ nga Anannganman'n ɔ'a kan'n, ɔ ti-man blɛblɛ. I waan: «Kanaan bɔ a ti Filistifuɛ'm be mɛn'n, n ´nunnun wɔ, n ´nunkun ɔ́ su sran'n kwlaa.

Sofoni 3:6

«N nunnunnin nvle wie mun mlɔnmlɔnmlɔn, be sasawlɛ sua mun bɔ be ti nglo sua'n, bɔ be o klɔ'm be cɔnjɔ'm be su'n, m bubuli be. Be akpɔ'm be tɔli srololo, m bubuli be klɔ mun, sran fi ijɔ-man be su kun.

Zakari 11:3

Mɛn mma'm bé su kpɛn'm be o kplinlɛ, afin be blɛ liɛ'n ɔ'a wie. Asɔmɔli'm be su kpan, afin be fiawlɛ klanman ng'ɔ san Zurdɛn'n ɔ'a yra.

Jɔlɛ Difuɛ Mun 14:5

Samsɔn nin i si nin i nin be ɔli Timna. Kɛ be juli Timna vinyi fie'n nun lɛ'n, Samsɔn ´nian-an asɔmɔli bɔ b'a kpɛ cro'n kun yɛ ɔ ´kpan bɛ i ndɛnman yɛ.