Zeremi 2:11 - NYANMIƐN NDƐ'N 1998

¹¹ ?Awlanmannun, nvle wie o lɛ b'ɔ kaci i amuɛn mun-ɔn? ?Kannzɛ bɔ be ninnge sɔ'm be ti-man amuɛn kpa'n be kaci be? Sanngɛ kpɛkuun min nvle bɔ n dili i nɛnnɛn n yoli i Nyanmiɛn'n, ɔ yaci min lɛ cɛ ɔ ko fa like nga be yo-man sa fi ye'n.

Zeremi 2:11 ပူးပေါင်းရင်းမြစ်များ

1 Famiɛn Mun 11:33

Sa ti bɔ n ´yo sɔ'n, yɛlɛ kɛ be kacili be sin sili min, be ko sɔli Astarte b'ɔ ti Sidɔnfuɛ'm be amuɛn'n, ɔ nin Kɛmɔs b'ɔ ti Moabfuɛ'm be amuɛn'n, ɔ nin Milkɔm b'ɔ ti Amɔnfuɛ'm be amuɛn'n. B'a fa-man min atin'n su b'a yo-man nga n klo i'n. B'a fa-man min mmla fanunfanun'm bé su kɛ Salomɔn i si David liɛ'n sa,

2 Famiɛn Mun 1:3

Yɛ Anannganman i anz kun wa seli Eli b'ɔ fin Tisbɛ'n kɛ: «Samari famiɛn'n i sunmanfuɛ mun be yɛ be ´ba lɛ-ɔ. Ko bu be nyrun, nan usa be kɛ: ‹?Nyanmiɛn nun-man Izraɛl wa ti yɛ amun su ko usa Baal-Zɛbib b'ɔ ti Ekrɔnfuɛ'm be amuɛn'n i sa-a?›

2 Be Nyoliɛ 13:9

Amun fuannin Nyanmiɛn nyrun jranfuɛ kpakpa mun, amun fuannin Aarɔn osu'n nunfuɛ mun nin Levifuɛ mun. Yɛ amun sieli amuɛn'm be nyrun jranfuɛ mun kɛ mɛn kun nga'm be nunfuɛ'm be sa. Sɛ sran kun fa nannin yasua kun b'ɔ ɔ'a kpɛ cro'n, nin bua nene nso ba kɛ be sie i amuɛn nyrun jranfuɛ'n, kpɛkuun amun fɛ i sie amuɛn mun bɔ be ti-man like fi'n be nyrun.

Jue Mun 106:20

Ɔ liɛ nannin bɔ ijre yɛ ɔ di'n yɛ be fɛli i nzɔliɛ'n be kacili Nyanmiɛn b'ɔ lɛ nyrun nin-ɔn.

Jue Mun 115:4

Mɛn sɔ'm be nunfuɛ'm be amuɛn'm be liɛ'n, be fa jɛtɛ ufue nin sika ɔkwlɛ yɛ be yo-ɔ, be ti sran sa nuan like.

Jue Mun 3:3

Sran kpanngban be kan min wun ndɛ se kɛ: «Nga, Nyanmiɛn su de-mɛn i!»

Ezai 37:19

Be guali lɔ amuɛn'm be sin nun, be wɔli be nun, yɛlɛ kɛ be ti-man Nyanmiɛn, afin sran sa yɛ ɔ yoli be-ɔ, waka ɔ nin yɛbuɛ yɛ be fa yoli be-ɔ.

Zeremi 16:20

?Sran kun kwla yi like b'ɔ kwla niɛn i su-ɔ? ?Sɛ ɔ kwla yi'n, i sɔ like'n kwla niɛn i su?»

Zeremi 18:13

I sɔ'n ti Anannganman'n wan yoo: «?An `kpɛn n sin usa nvle-nvle'm be nun nian sɛ b'a kan ndɛ sa'n wie amu'an ti i le o? Sa nga Izraɛl yoli'n i tɛ liɛ'n ɔ lɛ-man wunsu.

Zeremi 2:5

Anannganman'n wan yoo: «?Nguɛ sa tɛ yɛ amun nannan'm be wunnin min wun, b'ɔ man b'a mantan-man min kun, bɔ be ko suli ninnge finfin'm be su, bɔ b'a yo finfin sa-a?

Zeremi 2:8

Nyanmiɛn nyrun jranfuɛ'm b'a usa-man kɛ: ‹?Anannganman kpa'n wo nin?› Be bɔ mmla'n wo bé sa nun'n, b'a si-man min. Amun su kpɛnngbɛn'm be jasoli mín wun. Nyanmiɛn nuan ijɔfuɛ'm be yoli Baal nuan ijɔfuɛ. Like nga be yo-man like fi ye'n, bé wun yɛ be fali bé wun mantannin-ɔn.

Zeremi 5:7

«?N ´yaci ɔ wun sa'n cɛ wɔ sɛ? Zerizalɛm bɔ ɔ fuɛ'm be yili min ase'n, bɔ amuɛn mun yɛ be bo be dunman be fa ta nda'n, like ng'ɔ nin be fata'n, n fa mannin be tratrali su bɔbɔ, sanngɛ kpɛkuun be ko kunndɛ bian min bo. Be kpli yɛ be kɔ tekle bla'n i awlo lɔ-ɔ.

Ezekiɛl 14:5

Tɛlɛ nga n ´tɛ i su sɔ'n, ɔ ´sanngan Izraɛlfuɛ nga amuɛn'm be klolɛ'n ti be kacili be sin sili min'n be akunndan.›

Ezekiɛl 5:7

I sɔ'n ti Anannganman Nyanmiɛn'n wan yoo: ‹Amún sa sukusuku nga an yo be'n be tra nvle nga be sin yia amun lɛ'm be liɛ mun. An nian nanti-man atin nga n kle amun'n su le, amu'an di-man min mmla liɛ'm be su, nvle nga be mantan amun lɛ'n be mmla liɛ'm bé su yɛ an dili-ɔ .

Mise 4:5

Like nga nvle kun nga'm be ko yo nan ɔ'a jɔ be amuɛn'm be klun'n, yɛ be yo-ɔ. E kusu e liɛ nga e ko yo nan ɔ ko jɔ Anannganman e Nyanmiɛn'n i klun titi'n yɛ e yo-ɔ.

Rɔmfuɛ Mun 1:23

Be yaci Nyanmiɛn b'ɔ ti anannganman b'ɔ lɛ nyrun lɛ be yo ninnge mun, kɛ sran sa, wie'm be ti kɛ nnɛn sa, wie'm be kusu be ti kɛ anunman sa, yɛ wie'm be ti kɛ wuo sa, be taka be, yɛ be sɔ be .

1 Korɛntfuɛ Mun 8:4

I sɔ'n ti'n, nga b'ɔ ti amuɛn nnɛn'n i dilɛ i wun ndɛ liɛ'n, e si kɛ amuɛn'n ti-man like nanwlɛ, yɛ kusu e si kɛ Nyanmiɛn ti kunngba cɛ .

Galasifuɛ Mun 4:8

Laa an si-man Nyanmiɛn, ɔ man an su ninnge nga be nin sulɛ fata-man'n.

Mmla'n 32:16

Izraɛlfuɛ'm be fali nvle wie'm be nun amuɛn mun fɔkɔli i anwlɛn, be yoli tete sa mun ɔ man ya kunnin i.

Mmla'n 32:21

Kɛ bɔ be fali like ngbɛn-ngbɛn nga be ti-man Nyanmiɛn'n be fa fɔkɔli min anwlɛn b'ɔ man ya kunnin min'n ti'n, n kusu n ´yo man be nyin ´ci nvle kun b'ɔ ti-man nvle kpa'n, yɛ n ´yo man nvle bɔ i nunfuɛ'm be si-man ngwlɛlɛ'n be ´fita be anwlɛn su.

Mmla'n 33:29

Izraɛlfuɛ mun amun liɛ su ti ye. ?Wan yɛ ɔ nin amun sɛ-ɔ? Amun ngunmin yɛ Anannganman deli amun-ɔn. Ɔ ti kɛ amun nyrɛn sa. Ɔ ti kɛ amun tokofi sa bɔ man amun nyan kwlalɛ-ɔ. Sɛ amun kpɔfuɛ'm be ba amun yaci selɛ'n, amun wa tia be amuɛn sɔwlɛ'm be su.»

1 Piɛr 1:18

Afin an si like nga be fa toli amun'n, b'ɔ man an nyan amún ti sa ngbɛn-ngbɛn nga amun nannan'm be fa kleli amun'n be nun'n. Nán like b'ɔ saci-ɔ, nán jɛtɛ ufue-ɔ, yɛ nán sika ɔkwlɛ-ɔ.

1 Samiɛl 4:21

Ɔ flɛli ba'n kɛ I-kabɔd, afin Nyanmiɛn i anyrunnyan ng'ɔ fa mannin Izraɛl nvle'n ɔ'a tu be afiɛn. Nyanmiɛn i alaka'n bɔ be fali'n ɔ nin i sia nin i wun bɔ be wuli'n i ti yɛ ɔ flɛli i sɔ-ɔ.