Zeremi 18:11 - NYANMIƐN NDƐ'N 1998

¹¹ Ɔ man se Zidafuɛ mun nin Zerizalɛm klɔ'n sufuɛ'm be kɛ: «Anannganman'n wan yoo: ‹N su siesie amún wun sa kun, n su bu amun wun akunndan tɛ kun. I sɔ'n ti, man amun kwlaa an kaci amun nzuɛn'n. An `nanti klanman kɛ ɔ fata'n sa.› »

Zeremi 18:11 ပူးပေါင်းရင်းမြစ်များ

Bo Bolɛ 11:7

Ɔ man e `wɔ e ko sanngan be aniɛn'n nun, nan nán be ti be wun aniɛn kun.»

1 Famiɛn Mun 22:23

Nian, Anannganman ɔ'a fa ato wawɛ ɔ'a wla wɔ wunnzue yifuɛ'm be kwlaa be nun. Anannganman ɔ'a gugu kɛ ɔ ´fa nyrɛnnɛn ´yi wɔ su.»

2 Famiɛn Mun 17:13

Anannganman fa ndɛ wlɛli i nuan ijɔfuɛ fanunfanun'm be kwlaa bé nuan. I waan be kan kle Izraɛlfuɛ mun, nin Zidafuɛ'm be kɛ be yaci be nzuɛn tɛtɛ mun, nan be fɛ i mmla fanunfanun'm bé su. I mmla sɔ'n, ɔ fa mannin Izraɛlfuɛ'm be nannan mun. I sin ɔ fa wlɛli i nuan ijɔfuɛ bɔ be ti i sufuɛ'n bé nuan kɛ be fa man be kusu be wie.

2 Famiɛn Mun 22:13

«Amun `wɔ be ko wun Anannganman wun, man ɔ kan fluwa nga be wunnin i'n i wun ndɛ kle amun. Amun `wɔ min nin Zidafuɛ mun e dunman nun, afin kɛ n niɛn i sa'n, e nannan'm b'a fa-man fluwa nga nun ndɛ'm be su. B'a nian-man ndɛ sɔ'm be su b'a nanti-man. I ti Anannganman i ya nga ɔ'a fɛ i é wun'n ti-man blɛblɛ.»

2 Famiɛn Mun 5:5

Siri famiɛn'n seli i kɛ: «Kɔ Samari, m ´man wɔ fluwa a ´ko fa man lɔ famiɛn'n.» Yɛ Naaman ɔli-ɔ. Kɛ ɔ ´kɔ'n, ɔ fali jɛtɛ ufue kilo ya nsan, nin sika ɔkwlɛ kilo ablesiɛn, ɔ nin bé wun kacilɛ tralɛ blu.

Ezai 5:5

Ɔ man yoo, n wa kle amun like nga n wa fa yo min vinyi fie'n. M ´bubu i wun talɛ'n, yɛ nnɛn'm be wa di vinyi nga n tali'n. N ´saci awa ng'ɔ si i wun'n, yɛ be nga be ´sin'n be ´tiatia vinyi'n su.

Ezai 57:1

Sran kpa'm be wu, sanngɛ sran fi ndɛ nun-man be ndɛ nun. Sran kpakpa'm be wu, sanngɛ sran fi wun-mɛn i wlɛ kɛ kɛ ɔ ´yo nan nyrɛnnɛn ɔ'a tɔ-man sran'm be su'n, i ti yɛ man be wu sɔ-ɔ.

Zeremi 11:11

I sɔ'n ti Anannganman'n wan yoo: «Nyrɛnnɛn nga n wa fa yi be su'n, be su kwla fin-man nun fite-man. Sɛ be kpan flɛ min-ɔn, m ´bu min sukpɔ nun waka.

Zeremi 11:19

Laa n ti kɛ bua nga ɔ'a kpɛ cro wie bɔ be ´fɛ i kɔ i kunlɛ-ɔ ɔ kpli-man'n sa. Min wun akunndan tɛtɛ wla nga be ´bu'n, n si-man nun. Be ko se kɛ: «E `kun waka'n nin i mma mun, man be jaso lɛ. Nán be bo be ndɛ su di jɔlɛ kun.»

Zeremi 18:18

Be wie'm be se kɛ: «An man e cici Zeremi i wun ndɛ, afin i kunngba'n ti man Nyanmiɛn nyrun jranfuɛ'n su wie-man nan se kɛ mmla'n ´ka lɛ mlin. Ngwlɛlɛfuɛ'm be kusu be su wie-man nan se kɛ e su nyan-man afɔtuɛ manfuɛ kun. Nyanmiɛn nuan ijɔfuɛ'm be su wie-man nan se kɛ e su ti-man Nyanmiɛn nuan ndɛ'n kun. Man e saci i wun. Sɛ ɔ kan ndɛ siɛn'n, nán e sie é su kun.»

Zeremi 19:15

«Anannganman b'ɔ sie mɛn wunmuan'n, Izraɛl Nyanmiɛn'n wan yoo: ‹An `nian, nyrɛnnɛn sa nga n kɛnnin i ndɛ'n, n wa fa yi i klɔ nga nin i asa'n su klɔ'm be kwlaa be su, bé nyin kekle bɔ be yoli'n bɔ n kan ndɛ-ɔ be ti-man'n ti.› »

Zeremi 19:3

Se kɛ: ‹Zida famiɛn mun nin Zerizalɛm klɔ'n sufuɛ mun, an `tie ndɛ bɔ Anannganman'n kan'n. Anannganman b'ɔ sie mɛn wunmuan'n, Izraɛl Nyanmiɛn'n wan yoo: An `nian, n wa fa nyrɛnnɛn sa kun n ´yi i lika nga su. Nyrɛnnɛn sa sɔ'n, sran kwlaa nga be kɛn i ndɛ kle i'n, ɔ kpiti kpli.

Zeremi 25:2

Zeremi kusu wa kan kleli sran mun, ɔ kɛnnin i Zidafuɛ mun nin Zerizalɛmfuɛ'm be nyrun. I waan:

Zeremi 25:5

I nuan ijɔfuɛ'm be seli amun kɛ: ‹Amun kwlaa an `yaci amun nzuɛn tɛ'n, an `yaci amun aeliɛ tɛtɛ'n, i liɛ'n, amun ´ka lika nga Anannganman'n fa mannin amun nannan mun nin amun'n, amun ´ka nun mlɔnmlɔn.›

Zeremi 26:13

Nan i ti an `kaci amun nzuɛn'n nin amun aeliɛ mun. An `tie Anannganman amun Nyanmiɛn'n i aniɛn'n nan sa ng'ɔ kɛnnin i kɛ ɔ ´fa yo amun'n, ɔ'a fa fli amun.

Zeremi 26:3

Nja, sɛ be ti-ɔ, sɛ be kwlaa be ´yaci bé sa tɛ yolɛ nin o. I liɛ'n, wuun akunndan tɛ nga be aeliɛ tɛtɛ'n ti n sunnzunnin i nin be'n, n ´fa fli be.› »

Zeremi 3:1

Anannganman'n usa kɛ: «?Sɛ sran kun yrɛ i yi'n nan bla'n jaso ko ja bian uflɛ'n, kɛ ɔ o lɛ'n, yasua klikli'n kwla sɛ i sin ja bla sɔ'n ekun? ?Sɛ ɔ yo sɔ'n, nán tete yɛ ɔ'a bo i mɛn'n nun-ɔn? Sɛ n ´kwla se'n, a ko bo tekle'n lele, kpɛkuun a sa wɔ sin a ba min jalɛ ekun.

Zeremi 3:22

«Amun bɔ amun ti kɛ bian safuɛ sa'n, an `sa amun sin bla, man n yo nan amún bian sa'n ɔ wie.» «E yɛ e o yɛ, y'a ba ɔ́ sin Anannganman, afin wɔ yɛ a ti e Nyanmiɛn nin-ɔn.

Zeremi 35:15

N sunmannin min sufuɛ bɔ be ti min nuan ijɔfuɛ mun, nán andɛ yɛ m boli be sunmanlɛ bo-ɔ. N waan be `se amun kɛ: ‹Amun kwlaa an `yaci amun nzuɛn tɛ'n nan amun kaci ajalɛ'n. Nán an ko tu amuɛn, nán an sɔ be, i liɛ amun ´ka lika nga n fa mannin amun nin amun nannan mun'n i nun, sanngɛ n kleli mín nuan yalɛ ngbɛn, amu'an sie-man amún su nan se kɛ amun ´fa su.

Zeremi 36:3

I liɛ'n, sa nga n waan n ´fa yo Zidafuɛ mun, sɛ wienun-ɔn be ´yaci be nzuɛn tɛ'n, ɔ man n ´yaci be fɔnlɛ'n ɔ nin be sa tɛ'n n ´cɛ be o.»

Zeremi 36:7

Nja, sɛ be wa kpan be ´kpata Anannganman nin o! Sɛ be ´yaci be aeliɛ tɛtɛ nin o! Afin Anannganman'n kɛnnin i kɛ ya ng'ɔ fɛli i bé wun'n, ɔ ti-man blɛblɛ.»

Zeremi 4:1

Anannganman'n wan yoo: «Izraɛl, sɛ a sa ɔ sin ba min sin'n, sɛ a yi ɔ tete ninnge mun min nyrun lɛ'n, a su wanndi-man kun.

Zeremi 4:14

«Zerizalɛm, sɛ a klo kɛ a ´fite nun'n, yo wɔ anwlɛn'n saun. ?Cɛn onin ko nan w'a yaci akunndan tɛtɛ bulɛ'n?

Zeremi 4:23

Kɛ n nian asiɛ'n, ɔ ti kɛ like fi nun-man su sa. Nglo lɔ'n kusu ɔ kpaja-man kun.

Zeremi 4:6

An `sie nzɔliɛ b'ɔ kle kɛ alɛ su ba Siɔn bue liɛ'n su lɔ. An `wanndi nán an jran. Afin nyrɛnnɛn sa sɔ'n nin sacilɛ dan sɔ'n, n fa fin mɛn'n i nglo lɔ yɛ n fa ba-a.»

Zeremi 51:11

Akunndan nga Anannganman'n ɔ'a fa'n yɛlɛ Babilɔni nunnunlɛ. I yɛ ɔ wlawla Medi famiɛn mun kɛ be nin i be `yia nun nin-ɔn. Ɔ ´kunndɛ kɛ ɔ `tu i klunngbɔ i sua'n dunman nun. An `kpita amun cua'm bé nuan. An `sua be klɔun an `gua be amun pata'm be nun.

Zeremi 7:3

Anannganman b'ɔ sie mɛn wunmuan'n, Izraɛl Nyanmiɛn'n wan yoo: ‹An `yaci ajalɛ bɔ amun tu'n nin nyoliɛ tɛtɛ'n bɔ amun yo'n nan n ´yaci amun lika nga nun wa.

Ezekiɛl 13:22

Afin an bua ato fa sanngan sran kpa'n i akunndan kusu wuun m bɔbɔ m'an sɛnngɛn-mɛn i akunndan. An wla be nga be ti klunwifuɛ'm be fanngan kɛ ɔ ´yo nan bé sa sin ɔ'a bubu-man bé sa tɛ yolɛ'n nun, yɛ kɛ ɔ ´yo nan b'a ka nguan nun'n ti.

Ezekiɛl 18:23

?Amun bu i kɛ n klo kɛ klunwifuɛ'm be wu? Nga n klo'n yɛlɛ kɛ klunwifuɛ'm be kaci be nzuɛn'n nan be nyan nguan.» Anannganman Nyanmiɛn'n yɛ ɔ kan sɔ-ɔ.

Zonas 3:8

E kwlakwla e `wla bajɛ tralɛ, e `kpan kekle e flɛ Anannganman'n nan e `yaci klunwi sa nin sa tɛtɛ'm be yolɛ!

Mise 2:3

I ti man Anannganman wan yoo: «Sran tɛtɛ kɛ amun sa'n, m'an dun mmua m'an bu amún nyrɛnnɛn klelɛ'n i akunndan m'an sie, an su fin-man nun be fite-man. Siɛn'n, sɛ amun ´nanti-ɔ, amun su kwla-man amún ti'n su man kun, afin i sɔ blɛ liɛ'n ´yo nyrɛnnɛn blɛ.»

Sa nga bé yôli'n 26:20

N dun mmua kan ndɛ kleli Damasfuɛ mun, i sin n kan wie n kleli Zerizalɛmfuɛ mun. N kannin wie Zide mɛn wunmuan'n nun yɛ n kan wie n kleli be nga be ti-man Zuif'n kɛ be `kaci be nzuɛn'n nan be `sa be sin Nyanmiɛn wun yɛ be `yo sa b'ɔ kle kɛ b'a kaci be nzuɛn'n.

Jacques 4:13

Amun bɔ an se kɛ: « Ndɛ annzɛ ainman e ´kɔ klɔ nga su, e ´di afuɛ kun lɔ, e ´di aata, yɛ e ´nyan sika'n,» an `sie amun su.

Jacques 5:1

Anyanbeunfuɛ mun, an `sie amún su! Nyrɛnnɛn b'ɔ wa tɔ amún su'n ti'n, an `bo awuyomo, yɛ an `sun!