Zeremi 17:18 - NYANMIƐN NDƐ'N 1998

¹⁸ Min yalɛ klefuɛ mun be yɛ ɔ ti bɔ be wun nyannzuɛn-ɔn, nán min-ɔn. Be yɛ ɔ ti bɔ be klun titi be-ɔ, nán min-ɔn. Yo man nyrɛnnɛn blɛ'n ju, man ɔ tɔ be su. Fa nyrɛnnɛn fa nnyɔn yi be su.

Zeremi 17:18 ပူးပေါင်းရင်းမြစ်များ

Zɔb I Nyrɛnnɛn Wunlɛ 16:14

Ɔ'a bo bo min kannin sa trutrɛɛ. Ɔ su min su kɛ alɛ kunfuɛ sa.

Jue Mun 35:4

Be nga be kunndɛ kɛ be ´kun min'n, man bé nyin gua ase, man be wun nyannzuɛn. Be nga be gugu kɛ be ´yo min sa'n, man nyannzuɛn kun be, nan be bli be sa bé sin be wɔ.

Jue Mun 35:8

Man nyrɛnnɛn'n fu be nun tɔ be su. Man aya nga be suali'n, ɔ yaci tra be bɔbɔ. Man be tɔ kunman nga be kpɛli'n nun nan be wun nyrɛnnɛn.

Jue Mun 40:14

Anannganman, yaci, de min! Anannganman, bla ndɛndɛ wa uka min!

Jue Mun 70:2

Ee Nyanmiɛn, bla wa de min. Anannganman, kan ɔ́ wun bla wa uka min.

Jue Mun 71:1

Anannganman, ɔ sin yɛ n kunndɛ n fia-a, nán man n wun nyannzuɛn ngbɛn mlɔnmlɔn.

Zeremi 1:17

Nan i ti'n, tanndan wɔ wun, jaso ko kan ndɛ nga n ´fa wla ɔ́ nuan yɛ'n kle be. Nán srɛ kun wɔ bé wun, ɔ yo sɔ-ɔ, n ´yo man srolɛ nga a sro be'n ɔ ´yo dan tra su.

Zeremi 11:20

Yɛ Anannganman b'ɔ sie mɛn wunmuan'n, kusu b'ɔ ti jɔlɛ difuɛ kun b'ɔ di ndɛ nanwlɛ, akunndan nga sran'm be bu i be klun lɔ'n, ɔ si. Kɛ a ´tu ɔ klunngbɔ be su'n, ɔ ´yo min nyrun. Ɔ sa nun yɛ min ndɛ'n ɔ wo-ɔ.

Zeremi 12:3

N liɛ'n, a si min, Anannganman, a wun min, a si kɛ min anwlɛn'n wo ɔ su. Sran sɔ'm be liɛ'n, yi be sie be lɛ kɛ nnɛn bɔ be su wa ko kun be'n sa. Sie be ngunmin man be minndɛ be kunlɛ cɛn'n.

Zeremi 14:17

«Se be kɛ yoo: ‹Mín nyinmuɛn'n bu kɔnguɛ nin wia nun. Nán ɔ yaci bulɛ le. Afin nyrɛnnɛn dan kpa ɔ'a tɔ min nvle'n bɔ sɛ ɔ ti bla-a, wuun n ´se kɛ ɔ nian si-man bian le'n su. Kannin ng'ɔ ɔ'a tu i'n ti-man blɛblɛ.

Zeremi 16:18

N ´dun mmua m ´man bé sa tɛ'n i akatua sɔ fa nnyɔn min mɛn bɔ be yoli i fiɛn'n ti, ɔ nin be tete like bɔ be lɛ-man nguan bɔ be fa bali min lika'n nun'n ti.»

Zeremi 17:13

Anannganman, wɔ bɔ ɔ su yɛ Izraɛl i wla'n wo'n, be bɔ be kaci be sin be si wɔ'n be ´wun nyannzuɛn. Be bɔ be yaci wɔ lɛ kɔ like uflɛ sin'n, be ti kɛ dunman bɔ b'a klɛ i aunnyan nun bɔ i nunnunlɛ ɔ yo-man ya'n sa. Afin Anannganman b'ɔ ti kɛ nzue ti kun bɔ i nun nzue'n ti klengle b'ɔ wie-man nun le sa'n, b'a yaci i lɛ.

Zeremi 17:16

Kusu nán kɛ min yɛ n suli wɔ bo kɛ a fa nyrɛnnɛn'n yi ye su-ɔ. Nán kɛ n klo kɛ nyrɛnnɛn sa'n bla-a. Ndɛ ng'ɔ fin mín nuan fite'n yɛ ɔ wo lɛ-ɔ, ɔ bɔbɔ a si.

Zeremi 17:19

Anannganman'n seli min kɛ yoo: «Kɔ ko jran sran kpa'm be anuan'n nun kan Zida famiɛn'm be sin lɛ'n, jran Zerizalɛm anuan'n kwlaa nun.

Zeremi 20:11

Sanngɛ Anannganman'n b'ɔ ti kɛ safunyrɛn sa'n, ɔ jin min sin. Min kpɔfuɛ'm be wa tɔ. Nán be yɛ be ´kwla-a. Be su nyan-man jranwlɛ, ɔ man be ´wun nyannzuɛn. Nyannzuɛn nga be wun i'n, ɔ su titi-man le. Bé wla su fi-mɛn i le.

Mmla'n 33:11

Anannganman, nán man be fanngan'n i su kpɛ le. Junman kwlaa nga be fa be sa wla nun'n, man ɔ yo ye. Nán man be nga be jaso bé wun'n be nyan jranwlɛ be nyrun. Sɛ be kpɔfuɛ'm be tɔ'n, nán be kwla bé wun su man kun.»

Sa nglô yile 18:6

Sa ng'ɔ fa yoli amun'n, an `nian su yo i wie, an `yo i wunsu sɔ kpɛ nnyɔn! Klowa ng'ɔ su nzan nun mannin amun'n, an `su nzan nga i kekle'n trɛ i liɛ'n kpa'n wie nun mɛn i .