Zeremi 11:13 - NYANMIƐN NDƐ'N 1998

¹³ Zidafuɛ'm be amuɛn'm be kpanngban nin be klɔ'm be nuan'n sɛ. Yɛ kɛ be klɔ'm be akpɔ'm be nuan'n fa ti'n, i su yɛ be nian be taka be nyannzuɛn like kɛ Baal sa'n i sɔwlɛ mun-ɔn.

Zeremi 11:13 ပူးပေါင်းရင်းမြစ်များ

2 Famiɛn Mun 23:13

Sraka yiwlɛ lika'n bɔ be o Zerizalɛm ndɛnman'n, bɔ Salomɔn b'ɔ ti Izraɛl famiɛn'n kplannin be Olivie Oka'n su'n, Zozias sacili be. Salomɔn kplannin amuɛn sua sɔ mun mannin Astarte b'ɔ ti Sidɔnfuɛ'm be amuɛn'n, ɔ nin Kɛmɔs b'ɔ ti Moabfuɛ'm be amuɛn'n, ɔ nin Milkɔm b'ɔ ti Amɔnfuɛ'm be amuɛn'n. Amuɛn sɔ'm be kwlaa be ti tete like ngunmin.

2 Be Nyoliɛ 28:25

Zida klɔ'm be kwlaa su'n, ɔ yoli sraka yiwlɛ lika mun. Be yra ansans sua sɔ'm be nun man amuɛn mun. Be ko fali amuɛn sɔ mun mɛn wie'm be nun. I sɔ yolɛ nun'n, be fɔkɔli Anannganman be nannan'm be Nyanmiɛn'n i anwlɛn.

Ezai 2:8

Be di-man amuɛn'm be yalɛ bé mɛn'n nun. Be koto ninnge nga be fa bé sa be yi'n be bo. Be su ninnge nga be fa bé sama be yo'n mun.

Zeremi 11:17

Anannganman b'ɔ sie mɛn wunmuan'n b'ɔ tali amun'n, sa tɛ nga Izraɛlfuɛ mun nin Zidafuɛ'm be yoli'n, ansans nga be yra mannin Baal'n ti ɔ'a siesie kɛ nyrɛnnɛn tɔ amun su.

Zeremi 17:1

Zidafuɛ'm bé sa tɛ'n ɔ ti kɛ blalɛ yɛ b'a fa klɛ sa, ɔ ti kɛ diaman kpɛngbɛ yɛ b'a fa klɛ sa, sɛ n ´kwla se, ɔ klɛ be anwlɛn'n nun. Ɔ klɛ be Nyanmiɛn sɔwlɛ like nga be ti kɛ nnɛn wɛ sa'n be su.

Zeremi 18:15

Sanngɛ kpɛkuun min nvlefuɛ'm bé wla ɔ'a fi min. Be yra ansans be fa man ninnge finfin mun. B'a yo man b'a yaci be atin'n lɛ. B'a yaci be atin laa'n lɛ. B'a ko fa atin nga b'a yi-man'n.

Zeremi 19:4

Afin be kacili be sin be sili min. Be yoli lele man a wun lika nga-a, a si-mɛn i kun. Be yrali ansans mannin amuɛn wie mun bɔ bé si mun nin Zida famiɛn mun be si-man be laa'n nan se kɛ be bɔbɔ. Sran nga b'a yo-man sa'n, b'a kun be lele be mmoja'n ɔ'a yi lika sɔ'n.

Zeremi 19:5

B'a siesie Baal i sɔwlɛ'n kɛ be ´yra be mma mun be fa sɔ Baal sɔ'n. Kusu wuun n nian se-man be kɛ be yo i sɔ like le. M'an kɛn-mɛn i sɔ m'an kle-man be, i sɔ akunndan bɔbɔ nian ba-man mín ti nun le.› »

Zeremi 2:28

?Zidafuɛ mun amuɛn nga amun yili be'n be o nin? Sɛ be kwla de amun'n, man be wa de amun blɛ bɔ nyrɛnnɛn'n tɔ amun su'n. Afin amun amuɛn kpanngban nin amun klɔ mun be nuan'n sɛ.»

Zeremi 3:24

Kɛ ɔ fin e kaan nun lele'n, nyannzuɛn like sɔ'n dili ninnge nga é si'm be nyɛnnin i'n. Ɔ dili bé boli nin be bua, ɔ nin be nannin mun. Ɔ dili be mma yasua nin bla mun.

Zeremi 3:25

E la nyannzuɛn nun siɛn'n. Nyannzuɛn'n yɛ e fa kata e su kɛ kondro sa-a. Afin kɛ ɔ fin e kaan nun b'ɔ ´fa ju ndɛ'n, e nin é si mun e fɔnnin Anannganman e Nyanmiɛn'n i wun. Y'a tie-man Anannganman e Nyanmiɛn'n i aniɛn'n.»

Zeremi 32:35

Be kplannin amuɛn Baal i sua Bɛn-Inɔm kongo'n nun yɛ be fa be mma bla nin be mma yasua mun be yi tɛ be man Mɔlɔk-ɔ. Kusu wuun m bɔbɔ min m'an se-man kɛ be yo i sɔ man min. I sɔ akunndan bɔbɔ nian ba-man mín ti nun le. Be yoli tete sa sɔ mun man Zidafuɛ'm be yoli sa tɛ.

Zeremi 44:21

«?Ansans nga amun nin amún si, nin amun famiɛn, nin amun famiɛn i awlo lɔ sran dandan mun, ɔ nin amun mɛn'n nunfuɛ mun amun yrɛli i Zida mɛn'n nun nin Zerizalɛm mmuɛ'm be nun'n, nɛ́n i yɛ ɔ o Anannganman klun yɛ ɔ yoli i ngasi nin-ɔn?

Zeremi 44:5

B'a fa-man bé ti b'a de-man. I sɔ ndɛ liɛ'n guali bé su sin. B'a yaci-man sa tɛtɛ sɔ'n yolɛ, b'a yaci-man amuɛn'm be sɔlɛ.

Zeremi 48:35

Moab lɔ be nga be kɔ kpɔlɛ'm be su ko yra ansans be man amuɛn mun'n, n ´nunnun be ngba.

Zeremi 7:9

Awie wualɛ nin sran kunlɛ, nin sran'm bé yi'm be kunndɛlɛ'n, ɔ nin nda talɛ ato nun'n, yɛ ɔ ti amun junman-an. Amun sɔ amuɛn nga be flɛ i Baal'n. An fa amún wun wla amuɛn bɔ amun si-man be laa bɔ ngbɛn'n bé sa nun.

Ezekiɛl 16:24

a ko kplannin ɔ blɔdɛ sua, yɛ a kplannin ɔ sraka yiwlɛ lika kpɔlɛ'm be kwlaa su.

Ndɛ Nga Nyanmiɛn I Nuan Ijɔfuɛ Oze Kannin'n 10:1

Laa, Izraɛl ti kɛ vinyi fie bɔ ɔ'a bua bɔ ɔ'a su kaka klanman'n sa. Sanngɛ kɛ ɔ ´su mma kpanngban ´kɔ i nyrun'n, wuun i sraka yiwlɛ'm be kusu be ´sɔn be liɛ. Kɛ mɛn'n ´yo klanman ´kɔ i nyrun'n, wuun blɛ li yɛ b'a se kɛ ɔ taka yɛbuɛ nga be sɔ be mun-ɔn.

Ndɛ Nga Nyanmiɛn I Nuan Ijɔfuɛ Oze Kannin'n 12:11

N kannin ndɛ n kleli mín nuan ijɔfuɛ mun. N fali aolia nun ninnge kpanngban n kleli be, n fali nyanndra n wlali bé nuan be kan kleli amun.

Ndɛ Nga Nyanmiɛn I Nuan Ijɔfuɛ Oze Kannin'n 9:10

Anannganman'n waan: «Laa Izraɛl ti min nyrun kɛ aawlɛ flɛnnɛn wie nun vinyi mma sa. Kɛ n niannin amun nannan mun'n, n wunnin kɛ be like bɔ be fɛli i'n blɛ sɔ nun'n, yɛlɛ figie mma klikli nga be nyɛn i figie'n su'n. Sanngɛ be Baal-Pɛɔr lɔ julɛ yɛ, bé wun Baal b'ɔ ti nyannzuɛn like'n i sa nun fa wlalɛ yɛ. Be fali bé wun wlali amuɛn sɔ'n i sa nun, ɔ man be bɔbɔ be kacili tete like kɛ be soman uflɛ sɔ'n sa.