Zakari 7:10 - NYANMIƐN NDƐ'N 1998

¹⁰ Nán an kle aika mma nin bla nga be ti angboti'm be yalɛ. Nán an kle aofuɛ nin yalɛfuɛ'm be yalɛ. Nán amun bu amun wiengu wun akunndan tɛ.»

Zakari 7:10 ပူးပေါင်းရင်းမြစ်များ

Jue Mun 140:2

Anannganman, de min sran tɛtɛ'm bé sa nun! Sran nga be yo sran'm be sa kekleekle'm be ti, sasa min.

Jue Mun 21:11

A ´yo man be osufuɛ'm be ´nunnun asiɛ'n su. Be osu'n ɔ ´tu sran'm be afiɛn.

Jue Mun 36:4

Ato bualɛ'n nin sran'm be lakalɛ'n yɛ ɔ wo i nuan'n nun-ɔn. Ɔ bu-man sa kpa yolɛ'n i akunndan bɔ kaan sa.

Jue Mun 72:4

Man famiɛn'n bu yalɛfuɛ'm be ndɛ mun i atin su kɛ ɔ fata'n sa. Man ɔ de nyrɛnnɛnfuɛ mun. Man ɔ nunkun be bɔ be kle sran'm be yalɛ'n.

Ezipt Lɔ Tulɛ'n 23:9

Nán kle aofuɛ bɔ be tran amun afiɛn'm be yalɛ. Afin amun si aofuɛ yolɛ'n i nun ndɛ'n kwlaa yɛlɛ kɛ amun bɔbɔ amun yoli aofuɛ Ezipt mɛn'n nun lɔ.»

Nyanndra Mun 3:29

A nin ɔ wiengu wie be o, bɔ yɛ ɔ o i olɛ bliin'n, nán sunnzun i nin tɛ.

Ezai 1:23

Ɔ famiɛn'n i awlo lɔ sran dandan mun be yo nyin kekle Nyanmiɛn su. Be nin awiefuɛ'm bé bo ti kun. Adi ninnge'n yɛ be kunndɛ-ɔ, siɛn'n be bɔbɔ yɛ be su sran'm be su kɛ be `wla bé sa bo-ɔ. Be di aika mma'm be ndɛ kwlɛ, angboti mmla'n be ndɛ'n nga be fa blɛ be kɛ be di'n, ɔ ti-man be ndɛ.

Zeremi 18:18

Be wie'm be se kɛ: «An man e cici Zeremi i wun ndɛ, afin i kunngba'n ti man Nyanmiɛn nyrun jranfuɛ'n su wie-man nan se kɛ mmla'n ´ka lɛ mlin. Ngwlɛlɛfuɛ'm be kusu be su wie-man nan se kɛ e su nyan-man afɔtuɛ manfuɛ kun. Nyanmiɛn nuan ijɔfuɛ'm be su wie-man nan se kɛ e su ti-man Nyanmiɛn nuan ndɛ'n kun. Man e saci i wun. Sɛ ɔ kan ndɛ siɛn'n, nán e sie é su kun.»

Zeremi 21:12

David awlofuɛ mun, Anannganman'n wan yoo: «Kɛ aliɛ'n cɛn cɛ'n, sɛ amun ´di jɔlɛ'n, amun `nian nanwlɛ'n be di. Amun `de sran mun be nga be fɛn sran'm bé bo ninnge'n bé sa nun. Ɔ'a yo-man sɔ-ɔ, min ya'n ɔ ´jue kɛ sin sa. Sɛ ɔ jue kusu-ɔ, sran fi su kwla nuɛn-mɛn i. Amún sa tɛ'n i nuan akatua nga amun ´nyɛn i'n yɛ ɔ o lɛ-ɔ.

Zeremi 49:11

‹Nán amun koko, amun aika mma'm be ti. M bɔbɔ min n ´nian be lika. Man amun angboti bla'm be lafi min su.› »

Zeremi 5:28

Be wunnɛn'n wo be wun, be ti mlanmlanmlan. Sa tɛ'n wie fi nun-man lɛ bɔ be yo-man-an. Be ndɛ nun-man sa i nuan su yolɛ'n ndɛ nun. Like ng'ɔ ti bɔ be yo man aika mun'n, ɔ ti-man be ndɛ, sanngɛ be yɛ be ndɛ'n yo fɛ-ɔ. Like ng'ɔ ti bɔ be yo man yalɛfuɛ mun'n, ɔ ti-man be ndɛ.

Zeremi 7:6

sɛ an yo-man aofuɛ nin aika ba, ɔ nin angboti bla'm be tɛtɛ'n, sɛ an yaci sran nga b'a yo-man sa'm be kunlɛ lika nga nun wa'n,

Ezekiɛl 18:12

Ɔ bo be nga be ti yalɛfuɛ'n nin be nga be lɛ-man like'n be akpo. Ɔ wua sran mun. Sɛ be wla aowa be mɛn i'n, ɔ yi man-man sran nga i kalɛ o be su bɔ be wlali aowa sɔ'n. Ɔ fɛ i wun man amuɛn sɔlɛ'n, yɛ i blɛ sɔ'n nun ɔ yo tete sa mun.

Ezekiɛl 22:12

Ɔ lɔ'n, be tua sran kalɛ kɛ ɔ ko kun sran. Kɛ be bo sran bosia'n, be kwla-man i asubo'n nun. Be bo be wiengu'm be akpo be fa nyan bé wun. Yɛ min liɛ'n bé wla fi min su mlɔnmlɔnmlɔn. Nga n wunnin i'n yɛ ɔ o lɛ-ɔ.› » Anannganman Nyanmiɛn'n yɛ ɔ kan sɔ-ɔ.

Ezekiɛl 22:29

Sran'm be tɛtɛ yolɛ yɛ nvle'n i nunfuɛ'm be yo-ɔ. Be wua yɛ be bo nyrɛnnɛnfuɛ mun nin yalɛfuɛ'm be akpo. Like ng'ɔ ti-man bɔ be fa yo aofuɛ mun yɛ be fa yo be-ɔ.

Ezekiɛl 22:7

Ɔ lɔ'n, be yo siɛ nin niɛn be finfin. Be yo aofuɛ'm be tɛtɛ. Be bo aika ba nin angboti bla'm be akpo.

Amɔs 4:1

Samari mmla mun, amun bɔ amu'an cɛn kɛ Bazan oka'n su nannin mun sa'n, amun `sie amún su be `ti ndɛ ng'ɔ o mín nuan'n. An di yalɛfuɛ'm be lufle. Amun kle yalɛfuɛ'm be nyrɛnnɛn. Kpɛkuun an se amún wun'm be kɛ yoo: «An `fa nzan'n be bla man e nɔn .»

Zakari 8:17

Nán an bu be wiengu wun akunndan tɛ. Nán an ta nda ngbɛn-ngbɛn. Min ciliɛ mun yɛ be o lɛ.» Anannganman b'ɔ sie mɛn wunmuan'n yɛ ɔ kan sɔ-ɔ.

Malasi 3:5

Anannganman'n b'ɔ sie mɛn wunmuan'n wan yoo: «N su wa ko tran amun afiɛn lɔ nan n ´di amun jɔlɛ. Wunnzue yifuɛ nin be nga be kunndɛ be wiengu'm bé yi mun, ɔ nin bé wun mun'n, n ´kan mín wun ndɛndɛ m ´ba nan n ´fɛ i sɔ ndɛ'n m ´mian bé sa. Be nga be ta ato nda, kpɛkuun i sɔ like'n be yo-mɛn i kun'n, ɔ nin be nga be mianmian bla nga be o angboti nun'n, ɔ nin aika mma mun'n, wie kusu-ɔ be bu aofuɛ'm be lufle'n, ɔ nin be nga be bu-man min like fi bɔ kaan sa'n, n ´kan mín wun m ´ba ndɛndɛ nan n ´fɛ i sɔ ndɛ'n m ´mian bé sa.»

Matthieu 23:13

Amun mmla klefuɛ mun nin Farizifuɛ mun amun ti dunman klofuɛ mun'n, an yako! Yɛlɛ kɛ an man-man sran'm be atin kɛ be fa bé wun man Nyanmiɛn kɛ ɔ `sie be. Amun bɔbɔ an fa-man amún wun man-man Nyanmiɛn kɛ ɔ `sie amun, yɛ be nga be waan be ´yo'n, an kplin-man be su. [

1 Korɛntfuɛ Mun 6:10

nin awiefuɛ mun, nin sran bɔ be nyin yi-man like'n, nin nzanboɛfuɛ mun, nin nzowa kpɛfuɛ mun, ɔ nin sran bɔ be de sran like wue kekle su'n, i sɔ sran liɛ mun Nyanmiɛn su sie-man be mlɔnmlɔn.

Mmla'n 27:19

«Sran ng'ɔ bu aofuɛ annzɛ aika ba, annzɛ angboti bla be lufle'n, nán man ɔ wun ye le.» Kpɛkuun man Izraɛlfuɛ'm be kwlaa be tɛ su kɛ: «Man ɔ yo sɔ!»

Jacques 5:4

Be nga be di amun fie'm bé su junman'n, bɔ amu'an tua-man be kalɛ'n, an `tie be kpanlɛ'n. Be nga be kpɛ amun awie'n be kpan lele be nɛn'n to e Min Nyanmiɛn b'ɔ sie mɛn wunmuan'n lɔ .

1 Jean 3:15

Sran kwlaa ng'ɔ kpɔ i niaan'n, wuun ɔ ti sran kunfuɛ, yɛ an si kɛ sran kunfuɛ'n ɔ lɛ-man anannganman nguan.