Sofoni 2:9 - NYANMIƐN NDƐ'N 1998

⁹ Ɔ man i ti m bɔbɔ min Anannganman bɔ n sie mɛn wunmuan'n, m'an ta nda kɛ sɛ Moab ɔ'a yo-man kɛ Gomɔr sa'n, wuun nán min Izraɛl Nyanmiɛn nin-ɔn. Be lika'n ´kaci njin asiɛ, san ijre tɛtɛ'm be kunngba yɛ be ´fu nun-ɔn, ɔ ´saci mlɔnmlɔnmlɔn. Min nvle nunfuɛ nga be kali'n, be ´fɛn be bo ninnge mun, yɛ be ´fa asiɛ'n yo be liɛ.»

Sofoni 2:9 ပူးပေါင်းရင်းမြစ်များ

Ezai 11:14

Bé bo ´yo kun, be ´tɔ Filistifuɛ mun bɔ be o wia atɔliɛ lɔ'n bé su. Yɛ be ´fɛn be nga be o wia afiliɛ lɔ'n bé bo ninnge mun. Bé sa ´kan Edɔmfuɛ mun nin Moabfuɛ mun. Yɛ Amɔnfuɛ'm be ´yo be kanga.

Ezai 25:10

Afin Anannganman i sa kpa'n wo oka nga su.» Be tiatia Moabfuɛ'm be su kan be o lɛ'n, be tiatia be su kɛ ijre bɔ be tiatia su angrɛ kunman'n nun'n sa.

Ezai 49:18

Amun `man amún nyin'n su be nian-nian, amun mma'm be kwlaa b'a yia be su ba amún sin.» Anannganman seli ekun kɛ: «N kan m bɔbɔ min ti! Sɛ be ti bé wun wlawlalɛ like'n, wuun amun ´fa be wlawla amún wun. Sɛ be ti kplo'n, wuun n ´se kɛ amun ´fa be ci amun afiɛn kɛ bla kun b'ɔ su kɔ aja'n ɔ fɛ i cisu ci i afiɛn'n sa.

Zeremi 46:18

Famiɛn'n bɔ i dunman yɛlɛ Anannganman b'ɔ sie mɛn wunmuan'n i wan yoo: ‹N kan m b'ɔ n wo lɛ titi'n ti. Kɛ Tabɔr oka'n fa ti oka kun nga'm be afiɛn'n kɛ Karmɛl'n fa jin jenvie'n nun zruun'n, i kunngba'n yɛ amun kpɔfuɛ'n ´fa tra amun su-ɔ.

Zeremi 48:1

Moab liɛ'n yɛ. Anannganman b'ɔ sie mɛn wunmuan'n, Izraɛl Nyanmiɛn'n wan yoo: «Nɛbofuɛ'm be yako. Be yako, sa bɔ n ´yo be'n yɛlɛ be klɔ b'ɔ ´nunnun'n. B'a fa Kirzataim, i nunfuɛ'm be si-man wie se kun. Fiawlɛ klɔ sɔ'n, i nunfuɛ'm be si-man wie se kun. Be sa sin ɔ'a bubu be.

Zeremi 49:1

Amɔnfuɛ'm be jasin liɛ yɛ. Anannganman'n usa kɛ yoo: «?Ɔ ju sɛ ti yɛ man amuɛn nga be flɛ i Milkɔm ko fa Gadi fa yoli i liɛ nin-ɔn? ?Ɔ ju sɛ ti yɛ man Milkɔm i nvle'n ko fa Izraɛl klɔ mun fa yoli i liɛ nin-ɔn? ?Wuun wielɛ yɛ Izraɛl lɔfuɛ'm b'a wie ti-ɔ? ?Izraɛlfuɛ'm be ajalɛ nunfuɛ'm b'a wie ti-ɔ?»

Zeremi 49:18

Edɔm ´saci kɛ Sodɔm nin Gomɔr, ɔ nin be asa'n su klɔ mun sa. Ɔ ´tɔ srolo! Sran kun sa su tran-man su kun.»

Zeremi 49:33

«Azɔr klɔ'n ɔ ´kaci nsoso'm be tranwlɛ. Ɔ ´saci mlɔnmlɔn, ɔ su sin-mɛn i osu kun. Sran fi su tran-man su kun. Klɔ sran kun sa su tran-man su kun.»

Zeremi 50:40

Ɔ wa yo kɛ Sodɔm nin Gomɔr, ɔ nin be asa'n su klɔ bɔ Nyanmiɛn'n nunnunnin be'n sa, sran su tran-man su kun. Sran fi su ijɔ-man su kun le.

Amɔs 1:13

Anannganman'n wan yoo: «Amɔnfuɛ'm bé sa tɛtɛ nga b'a yo'n sɔnnin. Ɔ man e nin be y'a nyɛn i. Be mɛn bɔ be kunndɛ kɛ ɔ trɛ'n i dunman nun ti be kpacili Galaad bla wunnzɛfuɛ'm be klun.

Amɔs 2:1

Anannganman'n wan yoo: «Moabfuɛ'm bé sa tɛtɛ nga b'a yo'n sɔnnin. Be yrali Edɔm famiɛn'n i owie'n kɔlikɔlikɔli. Ɔ man e nin be y'a nyɛn i.

Sofoni 2:14

Ɔ ´kaci klɔ nnɛn nin nnɛn wafa-wafa'n kwlakwla be tranwlɛ, ɔ liɛ akpatue'm be ´fɛ i sua'm bé ti buwlɛ lika'n be ´yo be lawlɛ. Sua'm be fenɛtri'm be nun yɛ anunman'm be ´kpan-an. Kɛ a kpɛn sua'm be anuan'm be nun sa'n, a ´wun kɛ ninnge'm b'a saci be tru lɛ. Sɛdri waka'm bé bo ´wie tu.

Sofoni 2:7

I sɔ lika liɛ ng'ɔ o jenvie nuan lɔ'n, Zidafuɛ'm be ´fa be nnɛn'm be ´kɔ didilɛ lɔ, kpɛkuun nnɔsua be ´ko la Askalɔn sua'm be nun lɔ. Afin Anannganman be Nyanmiɛn'n ɔ wa nian be lika, ɔ ´fa be ´sie be osu laa'n nun .

Sofoni 3:13

Izraɛlfuɛ nga be ´ka'n, be su di-man ndrunmun kun, be su bua-man ato, be su lakalaka-man sran'm be kun, be ´di like be ku ´yi, be ´la fɔuun, sran fi su wla-man be srɛ kun.»

Zakari 2:13

E nin be e wa yia nun. Be nga be fɛnnin sran'm bé bo ninnge'n, be wa fɛn be liɛ'n wie kusu.» Kɛ ɔ ko yo sɔ'n, i liɛ amun wa wun i wlɛ sakpa sakpa kɛ Anannganman b'ɔ sie mɛn wunmuan'n yɛ ɔ sunmannin min-ɔn.

Kalɛ 14:21

Sanngɛ n ti Nyanmiɛn bɔ n lafi-man, yɛ min anyrunnyan'n ɔ yi asiɛ wunmuan'n .

Rɔmfuɛ Mun 14:11

Afin be klɛli i kɛ: «E Min Nyanmiɛn seli kɛ: ‹Kɛ min nyin o su'n ti'n, ɔ man sran'm be kwlaa be wa koto min bo, yɛ ɔ wa fite sran'm be kwlaa bé nuan kɛ n ti Nyanmiɛn .› »

Mmla'n 29:22

Be ´wun kɛ lika'n ɔ'a yo kɛ ɔ'a yra sa sufru nin njin'n ti. Ɔ man be di nun fie-ɔ ɔ yo-man ye, nan ´se kɛ aliɛ yɛ be ´nyɛn i nun-ɔn. Be ´wun kɛ ijre fi su fi-man kɛ Sodɔm, nin Gomɔr, nin Adma, ɔ nin Zɛbɔim bɔ Anannganman fali ya nunnunnin be'n be blɛ su sa.

Mmla'n 29:23

Nvle kun nga'm be nunfuɛ'm be usa bé wun kɛ: «?Ɔ yo sɛ ti yɛ Anannganman yoli mɛn nga sɔ-ɔ? ?Ɔ yo sɛ ti yɛ ɔ fɛli i nunfuɛ'm bé wun ya dan kɛ nga sa-a?»