Sofoni 2:3 - NYANMIƐN NDƐ'N 1998

³ Mɛn'n nun wɛtɛɛfuɛ mun, amun bɔ amun nanti Anannganman i mmla'n su'n, amun `mantan Anannganman. Amun `yo nanwlɛfuɛ, amun `kan amun wun ase be man Nyanmiɛn'n. Amun `kan amun wun ase be mɛn i, i liɛ'n, nja, sɛ i ya cɛn'n ju-ɔ, amun ´nyan amun ti o.

Sofoni 2:3 ပူးပေါင်းရင်းမြစ်များ

2 Samiɛl 12:22

David waan: «Kɛ ba'n i nyin tɛ o su'n, n cili nglɛmun n sunnin. N waan sɛ wienun-ɔn, Anannganman ´si min aunnvuɛ nan ba'n ko wu-man o!

Jue Mun 105:4

An `fa amun wun mantan Anannganman b'ɔ kwla'n! An `kunndɛ kɛ ɔ nin amun tran tititi.

Jue Mun 149:4

Afin Anannganman i nvlefuɛ'm bé ti, i klun ti jɔwa. Ɔ bu be nga be kan bé wun ase'n be sran, i ti ɔ de be.

Jue Mun 22:26

Anannganman, wɔ yɛ man n kwla manman wɔ sran nga be yia kpanngban'n be nyrun-ɔn. Be nga be fa bé wla be gua ɔ su be nyrun'n, like nga n kan kleli wɔ kɛ n ´yo man wɔ'n, n ´yo.

Jue Mun 31:20

Anannganman, ɔ klun-ufue'n ɔ cɛnnin o! Be bɔ bé nyin yi wɔ'n bɔ be talo wɔ'n, ɔ klun-ufue sɔ'n ti a yo be ye. Kɛ a ´yo be ye sɔ'n, sran kwlaa nyin ta nun.

Jue Mun 45:4

Safunyrɛn, fa ɔ tokofi'n san ɔ nvɛn wun. Ɔ tokofi sɔ'n ti yɛ man be wun kɛ a lɛ nyrun nan a ti gbanflɛn nin-ɔn.

Jue Mun 57:1

Jue nga ti David liɛ. Ɔ o jue tofuɛ'm be su kpɛn'n i fluwa'm be nun wie. Jue'n bɔ be to i kɛ «Nán yaci i lɛ man ɔ saci like'n,» i wafa kunngba'n su yɛ be `nian be fa to-ɔ. Ɔ kan David i wanndilɛ b'ɔ wanndili Sail nyrun'n, b'ɔ ko fiali yɛbuɛ buɛ nun'n i ndɛ . I waan:

Jue Mun 76:9

Kɛ a o nyanmiɛn su lɔ bɔ a ko bu ndɛ'n, kɛ a jaso bɔ a ko de be bɔ be wla'n ti bowa asiɛ'n su'n, srɛ kun sran'm be ngba, be gua sɔ bliin!

Jue Mun 91:1

Sran ng'ɔ ko fia Nyanmiɛn bɔ like fi nun-mɛn i sin'n i sin'n, wuun ɔ'a tran Nyanmiɛn b'ɔ kwla like kwlaa yo'n i fɔnvɔ'n nun.

Ezipt Lɔ Tulɛ'n 12:27

Amun `tɛ bé su kɛ: ‹Ɔ ti tɛ kun bɔ be yi be fa man Anannganman Delɛ-cɛn'n nun. Afin kɛ bɔ Izraɛlfuɛ'm be tɛ o Ezipt lɔ'n, Anannganman fali wie'n yili i Eziptfuɛ'm bé su, sanngɛ kɛ ɔ ´sin'n, ɔ'a jran-man e sua liɛ'm be su wie, ɔ yacili ye awlo'm be lɛ.› » Kɛ ɔ yoli sɔ'n, Izraɛlfuɛ'm be kotoli nan b'a su Anannganman'n.

Nyanndra Mun 18:10

Anannganman ti kɛ awa dan wie bɔ b'a si'n sa. Sran kpa ng'ɔ wanndi ko talo i'n, ɔ nyan manndran.

Ezai 1:17

Amun `suan sa kpa'n i yolɛ, amun `yo sa'm be nuan su. Sran ng'ɔ kle sran'm be nyrɛnnɛn'n, amun `yo man ɔ kaci i sa. Amun `di aika mma'm be jɔlɛ'm be kpa, amun `jran angboti mmla'm bé sin.»

Ezai 11:4

Be nga be ti yalɛfuɛ'n, ɔ ´di be ndɛ'm be kpa. Be nga be kle be yalɛ mɛn'n nun'n, ɔ ´bu be ndɛ mun kɛ ɔ fata'n sa. I ndɛ ng'ɔ fin i nuan ´fite'n ɔ ´yo kɛ waka bɔ be fa bo sran'n sa, ɔ ´fa bo mɛn'n nunfuɛ mun. Ndɛ ng'ɔ fin i nuan fite'n, ɔ ´yo man sran tɛ'm be wu.

Ezai 61:1

Anannganman Nyanmiɛn i Wawɛ'n wo mín su, afin Anannganman guali n su ngo kɛ m `bo jasin fɛ'n n kle yalɛfuɛ mun. Ɔ sunmannin min kɛ n wa cici be nga be anwlɛn'n ɔ'a kpɔtɔ be klun'n be wla, nan n `kan kle be bɔ be trali be lomuɛn'n kɛ be ´nyan be ti, yɛ n `se be nga be ti bisuafuɛ'm be kɛ be ´nyan alaje .

Zeremi 39:18

N ´yo man a ´fite nun. Alɛ'n su di-man wɔ. Min su bɔ a lafili'n ti'n, a ´nyan ɔ́ ti.› » Anannganman'n yɛ ɔ kan sɔ-ɔ.

Zeremi 45:5

I sɔ'n kpɛkuun pɔɔ yɛ a ´kunndɛ kɛ a ´tran nun-ɔn. Nán kunndɛ pɔɔ nun tranlɛ. Nyrɛnnɛn nga n ´fa yi i mɛn'n su'n, like kun ng'ɔ su nyɛn-mɛn i'n, ɔ nun-man lɛ. Ɔ liɛ nga a ´nyɛn i'n yɛlɛ ɔ nguan'n. Kan kwlaa nga ɔ waan a kɔ'n, ɔ́ wun fouun!»

Ezekiɛl 13:5

B'a ko tannin-man talɛ'n i nun toklo mun, b'a kplan-man talɛ nga be fa sisi klɔ'n wun bɔ Anannganman'n i ya blɛ'n nun kɛ alɛ'n ko tɔ'n, ɔ sasa sran mun'n.

Ndɛ Nga Nyanmiɛn I Nuan Ijɔfuɛ Oze Kannin'n 10:12

Sɛ sa nuan su yolɛ'n ti mma'n, wuun n ´se kɛ an gua nan amu'an titi klun-ufue'n i mma. An `sɔn bo uflɛ, min Anannganman min mantanlɛ blɛ'n yɛ ɔ'a ju yɛ. Amun `fa amún wun `mantan min, nan sɛ m ´ba'n, m'an fa ti delɛ'n m'an blɛ amun .

Ndɛ Nga Nyanmiɛn I Nuan Ijɔfuɛ Oze Kannin'n 7:10

Izraɛlfuɛ'm be tutre bɔ be di'n ɔ'a saci bé wun. Izraɛlfuɛ'm b'a sa-man bé sin min Anannganman bɔ n ti be Nyanmiɛn'n mín wun. I kwlaa sɔ nun'n b'a usa-man min osu.

Zonas 3:9

E si-man sɛ Anannganman'n gua i ya'n i ase o! Sɛ wienun-ɔn ɔ ´kaci aniɛn nan ɔ su nunnun-man ye o .»

Zakari 8:19

«Se Zidafuɛ'm be kɛ min Anannganman bɔ n sie mɛn wunmuan'n min waan afuɛ nuan kun nun anglo nnan nin anglo nnun'n su nglɛmun nga be ci'n, ɔ nin anglo nso nin anglo blu'n su nglɛmun nga be ci'n, be `yaci i cilɛ. Siɛn'n, be `fa i sɔ anglo liɛ mun yo cɛn be di. Sanngɛ amun `fa nanwlɛ dilɛ'n `cici amún ti, an `klo fɔundi'n.»

Matthieu 5:5

Be nga be ti wɛtɛɛfuɛ'n, be liɛ su ti ye, afin mɛn'n ɔ wa yo be liɛ!

1 Tɛsalonikfuɛ Mun 4:1

Aniaan mun, min ndɛ'n i atabo'n yɛ: sa nga an yo-ɔ ɔ yo Nyanmiɛn fɛ'n, e kleli amun, an fali su yɛ an wo i yolɛ su, sanngɛ sran wunmuan bɔ e nin e Min Jésus ti'n ti, e ´srɛ amun yɛ e ´kan kle amun kpa kɛ an yo i sɔ tra laa'n.

1 Tɛsalonikfuɛ Mun 4:10

Ɔ man kɛ amun nin e niaan nga be o Maseduani mɛn wunmuan nun'n be kwlaa an klo amun wun sɔ-ɔ, sanngɛ aniaan mun, e ´srɛ amun kɛ an yo i sɔ tra laa'n.

1 Piɛr 1:22

Kɛ an fali ndɛ nanwlɛ'n su'n, bɔ amún wun sa'n wieli'n, ɔ man an klo-man amun niaan Kristfuɛ mun amún nuan bui su. I sɔ'n ti, an `klo amun wun kpa, an `tu amun klun yo sa ng'ɔ kle kɛ an klo amun wun'n.

1 Piɛr 3:4

Sanngɛ man be wun amun klanman'n amun nzuɛn'n, nin amun anwlɛn wɛtɛɛ'n, ɔ nin diin bɔ an ti'n nun. Klanman sɔ'n wie-man, ɔ ti kpa Nyanmiɛn nyrun.

2 Piɛr 3:18

Ye bɔ e Min'n b'ɔ ti e Defuɛ'n yo amun'n ti'n, man be wun kɛ amu'an yo sran, yɛ man be wun kɛ amun nin i tran nan amu'an si i kpa. Kɛ ɔ fin ndɛ'n, man be yi i ayɛ tititi. Man ɔ yo sɔ!