Rɔmfuɛ Mun 8:30 - NYANMIƐN NDƐ'N 1998

³⁰ Be ng'ɔ sieli be sɔ'n, ɔ flɛli be, yɛ be ng'ɔ flɛli be'n, ɔ buli be sran kpa, yɛ be nga ɔ buli be sran kpa'n, ɔ man be nyannin nyrun kɛ i liɛ'n sa.

Nyanmien nde Ufle

³⁰ Bé ng'o siéé bé so'n, o flee bé, ye bé ng'o flee bé'n, o buu bé swran kpa, ye bé nga o buu bé swran kpa'n, o man bé nyaan nyrun ke i lie'n sa.

Rɔmfuɛ Mun 8:30 ပူးပေါင်းရင်းမြစ်များ

Ezai 41:9

amun bɔ n ko fali amun asiɛ'n i awieliɛ lɔ'n, amun bɔ n ko flɛli amun mmua-mmua lɔ m bali'n, amun bɔ n seli amun kɛ: «Amun ti min sran mun, n kpali amun, n su yi-man amun blo,»

Jean 17:22

N yoli man be nyannin nyrun kɛ a yoli man n nyannin nyrun'n sa nan be `kaci sran wunmuan kɛ min nin wɔ e ti sran wunmuan'n sa.

Jean 17:24

Min Si, lika nga n wo lɔ'n, n klo kɛ be nga a fa be mannin min'n, be `tran lɔ wie nan be wun nyrun nga wɔ man n lɛ i'n, afin i sin nan w'a yi mɛn'n yɛ a sɔtɔ n klolɛ-ɔ.

Jean 5:24

Nanwlɛ, sran ng'ɔ tie min ndɛ'n nan ɔ lafi sran ng'ɔ sunmannin min'n su'n, ɔ lɛ Anannganman nguan, be su fɛ i kɔ-man jɔlɛ difuɛ'n i ja su. Ɔ'a nyɛn i ti wie'n sa nun, yɛ ɔ'a nyan nguan.

Rɔmfuɛ Mun 1:6

Amun bɔ Nyanmiɛn flɛli amun kɛ an yo Jésus-Krist liɛ'n, an wo sran sɔ'm be nun wie.

Rɔmfuɛ Mun 11:29

Afin kɛ Nyanmiɛn fa like man sran'n, yɛ kɛ ɔ flɛ sran'n, ɔ koko-mɛn i sin.

Rɔmfuɛ Mun 8:1

I sɔ'n ti siɛn'n be nga be nin Krist-Jésus b'a kaci sran wunmuan'n, Nyanmiɛn su bu-man be fɔ kun .

Rɔmfuɛ Mun 8:21

yɛlɛ kɛ cɛn kun like sɔ'm be kwlaa be ´nyan be ti, be su saci-man kun, yɛ nyrun nga Nyanmiɛn mma'm be ´nyɛn i cɛn nga be ´nyan alaje'n, be dunman'n ´tɛ nun wie.

Rɔmfuɛ Mun 8:28

E si kɛ sa kwlaa nga b'ɔ ju'n, e bɔ e klo Nyanmiɛn b'ɔ flɛli e yɛlɛ kɛ ɔ bu ye akunndan sieli laa'n, e kpa yolɛ ti yɛ ɔ man sa sɔ'm be yo-ɔ.

1 Korɛntfuɛ Mun 1:2

e ´klɛ fluwa nga blɛ amun bɔ an ti Nyanmiɛn i asɔnunfuɛ Korɛnt lɔ. Amun b'ɔ flɛli amun kɛ an ´kaci i liɛ mlɔnmlɔn sran wunmuan bɔ amun nin Jésus-Krist amu'an yo'n ti'n, amun nin be kwlaa nga be bo Jésus-Krist b'ɔ ti e kwlaa e Min'n i dunman'n, amun yɛ e klɛ blɛ amun-ɔn.

1 Korɛntfuɛ Mun 1:9

Nyanmiɛn b'ɔ flɛli amun kɛ amun nin i Wa Jésus-Krist b'ɔ ti e Min'n an di anuansɛ'n, ɔ ti nanwlɛfuɛ.

1 Korɛntfuɛ Mun 2:7

Nyanmiɛn i ngwlɛlɛ b'ɔ yi-mɛn i nglo b'ɔ fiɛli i sran'm be nyrun'n, b'ɔ dun mmua sie mannin ye kɛ ɔ ba e nyrun nyan ka nan ɔ'a yi mɛn'n, i ndɛ yɛ e kan-an.

1 Korɛntfuɛ Mun 6:11

Kɛ laa amun nun sran wie'm be ti sɔ-ɔ. Sanngɛ siɛn'n, e Nyanmiɛn a wunnzin amun, ɔ'a fa amun a kaci i liɛ mlɔnmlɔn, yɛ ɔ'a bu amun sran kpa e Min Jésus-Krist dunman nun nin i Wawɛ'n i fanngan nun.

2 Korɛntfuɛ Mun 4:17

Nyrɛnnɛn kaan nga e wun i yɛ'n ɔ man e ´nyan tranwlɛ kpa nyanmiɛn su lɔ, e su jao-man nun le.

Galasifuɛ Mun 1:15

Sanngɛ Nyanmiɛn dun mmua fali min nan min nin a gua min ase, yɛ i klun-ufue'n ti ɔ flɛli min .

Galasifuɛ Mun 1:6

Kɛ e ´se yɛ'n, amu'an kaci amún sin a si Nyanmiɛn b'ɔ flɛli amun'n ye bɔ Krist yoli amun'n ti'n yɛ amu'an fa jasin uflɛ su-ɔ. I sɔ'n ɔ bo min nuan kpa.

Galasifuɛ Mun 5:8

Ndɛ nga be kan kleli amun'n, ɔ fin-man Nyanmiɛn b'ɔ flɛli amun'n.

Efɛzfuɛ Mun 1:11

Like kwlaa nga Nyanmiɛn klo kɛ ɔ yo'n, ɔ yo, ɔ man kɛ e nin Krist e kacili sran wunmuan'n ɔ fa e kacili i liɛ, afin i bɔbɔ yɛ ɔ sieli i sɔ-ɔ.

Efɛzfuɛ Mun 1:5

Klolɛ b'ɔ klo ye'n ti, ɔ dun mmua buli ye akunndan kɛ sa nga Jésus-Krist yoli'n ti ɔ ´fa e kaci i klun ba. I klun jɔli su kɛ ɔ ´yo i sɔ'n ti yɛ ɔ yoli sɔ

Efɛzfuɛ Mun 2:6

Sran wunmuan bɔ e nin Krist-Jésus é ti'n ti, Nyanmiɛn man e nin i e cɛnnin, yɛ ɔ ´yo man e nin i e ´tran nyanmiɛn su lɔ

Efɛzfuɛ Mun 3:11

Kɛ ɔ yoli sɔ'n, sa ng'ɔ dun mmua buli i akunndan lalafuɛ nun kɛ ɔ man e Min Krist-Jésus yo'n, ɔ kpɛnnin su.

Efɛzfuɛ Mun 4:4

Kɛ Nyanmiɛn flɛli amun bɔ like nga an fa amún wla gua su'n ti kunngba'n, i kunngba nin-ɔn, wunnɛn'n ti kun, yɛ Nyanmiɛn Wawɛ'n kusu ti kun.

Kolɔsfuɛ Mun 3:4

Kɛ Krist bɔ amun nguan'n wo i sa nun'n ɔ wa yi i wun nglo'n, ɔ ´yi amun nglo wie, yɛ nyrun ng'ɔ ´nyɛn i'n, amun ´nyan wie.

1 Tɛsalonikfuɛ Mun 2:12

afin e mannin amun afɔtuɛ, e wlali amun fanngan, yɛ e kan kleli amun kɛ an yo sa ng'ɔ ti Nyanmiɛn b'ɔ flɛli amun kɛ an di i famiɛn'n wie nan an nyan nyrun kɛ i liɛ'n sa'n, i klun sa.

2 Timote 2:11

Ndɛ nga n wa kɛn i yɛ'n ti nanwlɛ weiin: Sɛ e nin i yɛ e wuli'n, e nin i yɛ e ´cɛn-ɔn.

Hébreu 9:15

I sɔ'n ti yɛ Krist ti aenguɛ uflɛ nga Nyanmiɛn waan ɔ nin sran'm be tra i nun jranfuɛ nin-ɔn. I wulɛ b'ɔ wuli'n ti'n, be nga be fa aenguɛ klikli nga Nyanmiɛn ɔ nin sran'm be ´trali'n su, bɔ be yo sa tɛ'n, ɔ de be i su saɛ'n nun. Ɔ man be nga Nyanmiɛn flɛli be'n, be ´nyan like kpakpa ng'ɔ wie-man mlɔnmlɔn bɔ i waan ɔ ´fa man be'n.

1 Piɛr 2:9

Sanngɛ amun liɛ'n, an ti sran bɔ Nyanmiɛn fali amun, an ti Famiɛn Nyanmiɛn'n i nyrun jranfuɛ mun, an ti Nyanmiɛn i nvle'n nun sran mun, yɛ an ti i liɛ mlɔnmlɔn. Ɔ fali amun kɛ an yi i b'ɔ flɛli amun kɛ an jao aosin nun, an bla lika ng'ɔ kpaja kpa nun'n i ayɛ .

1 Piɛr 3:9

Sɛ sran yo amun tɛ'n, nán an yo i wie, sɛ be kpɛ amun nzowa'n, nán an yi man be, sanngɛ an `yra be nguan, afin kɛ Nyanmiɛn flɛli amun'n, ɔ seli kɛ ɔ ´yra amun nguan. Be klɛli i Nyanmiɛn Ndɛ'n nun kɛ:

1 Piɛr 5:10

Kɛ an wun nyrɛnnɛn le nnyɔn kun'n, Nyanmiɛn aklunyefuɛ kpli'n, b'ɔ flɛli amun kɛ an `nyan nyrun titi'n sran wunmuan bɔ an nin Krist amu'an kaci'n ti'n, i bɔbɔ man amun ´yo sran kpa mlɔnmlɔn. Ɔ ´yo man amun ´jran kekle, ɔ ´wla amun fanngan, ɔ man amun wun su usu-man amun.

2 Piɛr 1:10

Aniaan mun, i sɔ'n ti, an `bu flɛlɛ nin falɛ bɔ Nyanmiɛn fali amun'n i akunndan kpa nan an `jran kekle. Sɛ an yo sɔ'n, an su fɔn-man mlɔnmlɔn.

Sa nglô yile 17:14

Be nin Bua Gbanflɛn'n be ´kun, sanngɛ Bua Gbanflɛn'n nin be nga ɔ flɛli be'n, b'ɔ fali be'n, bɔ be fa bé wun mɛntɛn i kpa'n, be ´kwla be blu sɔ'n, afin i yɛ ɔ sie be kwlaa nga be sie sran'n nin famiɛn mun-ɔn .»

Sa nglô yile 19:9

Anz'n seli min kɛ: «Klɛ kɛ: ‹Be nga be yiali be Bua Gbanflɛn'n i atɔnvlɛ falɛ'n i aliɛ dilɛ'n bo'n, be liɛ su ti ye!› » Yɛ ɔ seli min kɛ: «Ndɛ sɔ'm be ti Nyanmiɛn ndɛ sakpa.»