Rɔmfuɛ Mun 2:29 - NYANMIƐN NDƐ'N 1998

²⁹ sanngɛ Zuif kpa'n yɛlɛ sran ng'ɔ ti sɔ i anwlɛn nun'n, yɛ klɛn wlalɛ kpa'n yɛlɛ nga Nyanmiɛn Wawɛ'n wlɛ i sran i anwlɛn'n nun b'ɔ fin-man mmla nga be klɛli nun'n. Nán sran mun yɛ be yi Zuif kpa sɔ'n i ayɛ-ɔ, Nyanmiɛn bɔbɔ yɛ ɔ yi i ayɛ-ɔ.

Nyanmien nde Ufle

²⁹ sannge Juif kpa'n yele swran ng'o ti so i awlen'n nun'n, ye klen wlale kpa'n yele nga Nyanmien Wawe'n wle swran i awlen'n nun b'o fi'an mmla nga bé kleli'n nun'n. Nanh swran mun ye bé yi Juif kpa so'n i ayeo, Nyanmien bobo ye o yi i ayeo.

Rɔmfuɛ Mun 2:29 ပူးပေါင်းရင်းမြစ်များ

1 Be Nyoliɛ 29:17

Min Nyanmiɛn, n si kɛ ɔ liɛ'n, a nian sran'm be anwlɛn'n nun, yɛ sa nga be yo i nanwlɛ nun'n yɛ a klo i-ɔ. Ninnge nga m mannin wɔ'n, n klun su yɛ n fa be m mannin-ɔn. Ɔ sran nga b'a yia wa'n kusu, n wun i kɛ like nga be mannin'n ti be klun su, i ti min klun jɔ klanman.

Jue Mun 45:13

Tirfuɛ mun nin mɛn'n nun anyanbeunfuɛ'm be wa cɛ ɔ like nan a `nian be nyrun.

Zeremi 4:14

«Zerizalɛm, sɛ a klo kɛ a ´fite nun'n, yo wɔ anwlɛn'n saun. ?Cɛn onin ko nan w'a yaci akunndan tɛtɛ bulɛ'n?

Zeremi 4:4

An `wla klɛn nan an `yo Anannganman'n liɛ. Zidafuɛ mun nin Zerizalɛm klɔ'n sufuɛ mun, an `wla amun anwlɛn'n i klɛn. Ɔ'a yo-man sɔ-ɔ, amun nzuɛn tɛ'n ti, min ya'n ɔ wa jue kɛ sin sa. Sɛ ɔ jue kusu-ɔ, sran fi su kwla nuɛn-mɛn i.› »

Zeremi 9:25

sran sɔ mun be yɛ: Eziptfuɛ mun, Zidafuɛ mun, Edɔmfuɛ mun, Amɔnfuɛ mun, Moabfuɛ mun, ɔ nin aawlɛ flɛnnɛn'n nun lɔfuɛ bɔ akanza yilɛ'n ti be nzuɛn'n mun, afin nvle nga be o lɛ'n be wie fi wla-man klɛn. Izraɛlfuɛ'm be kusu sɛ e ´kwla se'n, b'a wla-man be anwlɛn'n i klɛn.»

JÉSUS-CHRIST I DYASIN FE'N BO LUC KLELI'N 11:39

Yɛ e Min'n seli i kɛ: «Amun Farizifuɛ mun, an wunnzin klowa nin talie'm bé sin, sanngɛ amun anwlɛn'n nun ti sa tɛtɛ, yɛ an de sran'm be like wue kekle su.

JÉSUS-CHRIST I DYASIN FE'N BO LUC KLELI'N 17:21

Be su se-man kɛ: ‹An `nian, ɔ o wa annzɛ ɔ o le sa, afin sran nga Nyanmiɛn sie be'n, be o amun nun wa.› »

Jean 12:43

Afin be klo dunman nga sran'm be bo be'n tra nga Nyanmiɛn bo be'n.

Jean 4:23

Sanngɛ cɛn wie lele — cɛn sɔ'n ɔ'a ju bɔbɔ — be bɔ be koto e Si'n bo be mɛnmɛn i sakpa'n, be ´koto i bo be ´mɛnmɛn i be akunndan'n nun nanwlɛ nun, afin be nga be manman e Si'n sɔ'n, be sɔfuɛ mun yɛ ɔ kunndɛ be-ɔ.

Jean 5:44

?Amun bɔ an klo kɛ amun wiengu bo amun dunman'n, bɔ an klo-man kɛ Nyanmiɛn b'ɔ ti kunngba cɛ'n yɛ ɔ bo amun dunman'n, ɔ ´yo sɛ yɛ amun ´kwla lafi i su-ɔ?

Rɔmfuɛ Mun 14:17

Nán kɛ like bɔ sran di'n nin nzan bɔ be nɔn'n yɛ ɔ kle kɛ Nyanmiɛn sie be-ɔ, sanngɛ i Wawɛ'n b'ɔ man sran kaci sran kpa'n, b'ɔ man be di alaje'n, b'ɔ man be klun jɔ'n, yɛ ɔ kle kɛ ɔ sie be-ɔ.

Rɔmfuɛ Mun 2:27

An si mmla'n kwlaa, yɛ be wlali amun klɛn, sanngɛ an tɔn mmla sɔ'n. ?Sɛ ɔ ti sɔ'n, sran nga b'a wlɛ-mɛn i klɛn sanngɛ ɔ fa mmla'n su'n, ɔ se-man kɛ amu'an di fɔ?

Rɔmfuɛ Mun 3:1

?Sɛ ɔ ti sɔ'n, kɛ be se kɛ be ti Zuif'n, nguɛ like yɛ be nyɛn i b'ɔ tra sran wie'm be liɛ nin-ɔn? ?Yɛ nguɛ like yɛ be nyɛn i klɛn wlalɛ nun-ɔn?

Rɔmfuɛ Mun 7:6

Sanngɛ siɛn'n, e di-man mmla'n su kun yɛlɛ kɛ y'a wu, ɔ man like ng'ɔ tra e nun laa'n, e nin i y'a bu. I sɔ'n ti'n, ɔ man e su Nyanmiɛn i sulɛ wafa uflɛ nga i Wawɛ'n kle ye'n su, e su-mɛn i sulɛ wafa laa liɛ nga be klɛli mmla nun'n su kun.

1 Korɛntfuɛ Mun 4:5

I sɔ'n ti'n, nán an dun mmua di sran fi jɔlɛ nan blɛ nga be kleli ɔ'a ju. Amun minndɛ kɛ e Min bla'n ka. Afin sa ng'ɔ o nvialiɛ nun bɔ be wun-mɛn i'n, i yɛ man be ´wun i kwlaa-a. Yɛ akunndan ng'ɔ o sran klun'n, ɔ ´yi i kwlaa nglo. Kɛ ɔ ko yo sɔ'n, like nga sran kun yoli'n, i ti Nyanmiɛn ´yo i mo.

1 Korɛntfuɛ Mun 7:19

Sɛ be wla klɛn o, sɛ b'a wla-man klɛn o, ɔ ti-man sa cinnjin, sa ng'ɔ ti cinnjin'n yɛlɛ Nyanmiɛn mmla'n i su falɛ'n.

2 Korɛntfuɛ Mun 10:18

Afin nanwlɛ, sran ng'ɔ se i bɔbɔ wun kɛ ɔ ti kpa'n, nɛ́n i yɛ ɔ ti kpa nin-ɔn, san sran nga e Min'n bɔbɔ se kɛ ɔ ti kpa'n, i yɛ ɔ ti kpa-a.

2 Korɛntfuɛ Mun 3:6

I kunngba sɔ'n i yɛ man e kwla di aenguɛ uflɛ nga ɔ nin sran'm be trali'n i junman nin-ɔn. Ɔ ti-man mmla bɔ be klɛli-ɔ, sanngɛ ɔ ti Nyanmiɛn Wawɛ'n liɛ. Afin mmla nga be klɛli'n, ɔ man sran wu, sanngɛ Nyanmiɛn Wawɛ'n liɛ'n, ɔ man sran nyan nguan .

Mmla'n 10:16

Ɔ man i ti'n, amun `fa amun wun mɛn i mlɔnmlɔn. Nán amun yo nyin kekle i su kun.

Mmla'n 30:6

Anannganman amun Nyanmiɛn'n i bɔbɔ, ɔ ´yo man amun nin amun osu nunfuɛ mun amun anwlɛn'n ɔ ´yo kpa. Ɔ man amun wa klo i kpa, amun wa fa amun wla'n kwlaa guɛ i su, yɛ amun akunndan'n kwlaa wa trɛn i su, kpɛkuun amun ´tran nguan nun.

Filipfuɛ Mun 3:3

E yɛ e wla klɛn kpa nin-ɔn, afin e su Nyanmiɛn i Wawɛ'n i fanngan nun, e fa Krist-Jésus di é nuan, e fa-man é wla gua-man e wafa nga e ti'n su.

1 Tɛsalonikfuɛ Mun 2:4

E kɛnnin i kɛ Nyanmiɛn kleli ye kɛ e kɛn i su'n sa, afin ɔ bu ye sran ɔ fɛ i jasin fɛ'n wlali é sa nun. Nán kɛ e waan e ´kɛn i sɔ nan sran'm be klun jɔ e wun-ɔn, sanngɛ e waan e ´kɛn i sɔ nan ɔ jɔ Nyanmiɛn b'ɔ si e anwlɛn nun'n i klun.

1 Piɛr 3:4

Sanngɛ man be wun amun klanman'n amun nzuɛn'n, nin amun anwlɛn wɛtɛɛ'n, ɔ nin diin bɔ an ti'n nun. Klanman sɔ'n wie-man, ɔ ti kpa Nyanmiɛn nyrun.

1 Samiɛl 16:7

Sanngɛ Anannganman seli Samiɛl kɛ: «Nán niɛn i nyrun waka'n ti, ɔ nin i tɛnndɛn b'ɔ ti'n ti, nɛ́n i yɛ n kɛn i ndɛ nin-ɔn. Min akunndan nin sran'm be liɛ'n ti-man kun, afin sran'm be nian nga be nyinma wun i'n, sanngɛ min liɛ'n, n nian lele ju anwlɛn'n i bo lɔ.»