Ngwlɛ Yilɛ 1:6 - NYANMIƐN NDƐ'N 1998

⁶ Siɔn i anyrunnyan like'n kwlaa yɛ b'a fa be be su fa kɔ yɛ. I famiɛn i awlo lɔ sran dandan'm be ´kɔ sa ɔ waan flete wie bɔ b'a nyan-man ijre b'a di-man bɔ be su wanndi fakafaka koniɛn difuɛ i nyrun'n sa.

Ngwlɛ Yilɛ 1:6 ပူးပေါင်းရင်းမြစ်များ

2 Famiɛn Mun 19:21

Nan nga m bɔbɔ n ´fa tɛ i su'n yɛ: Sankerib, Siɔnfuɛ'm be bu-man wɔ like fi, srilɛ yɛ be sri wɔ-ɔ! Kɛ be wun wɔ'n, be keje be ti'n sɛkɛsɛkɛ.

2 Famiɛn Mun 25:4

Babilɔnifuɛ'm be kpɛli klɔ'n wun talɛ'n nun toklo. Kɔnguɛ'n, famiɛn Sedesias nin i alɛ kunfuɛ'm be kwlaa be fin klɔ'n nun fiteli, nan b'a wanndi. Be sinnin anuan ng'ɔ o famiɛn'n i fie'n i wun lɛ'n nun. Ɔ o talɛ nnyɔn'm be afiɛn'n nun. Be fali lika kpɛtɛkplɛɛ'n i atin'n, sanngɛ kɛ ɔ ´yo sɔ'n, wuun Babilɔnifuɛ'm b'a sin b'a yia klɔ'n.

2 Famiɛn Mun 25:5

Babilɔni sonja'm be suli famiɛn'n su, be ko toli i i lika kpɛtɛkplɛɛ ng'ɔ o Zeriko wun lɔ'n nun. I sonja'm be yacili i lɛ be bo sanndili.

Jue Mun 50:2

Siɔn b'ɔ ti klanman dan'n, i nun lɔ yɛ Nyanmiɛn'n ɔ fin-ɔn. Ɔ kpaja weiin yɛ ɔ ba-a.

Jue Mun 96:9

Kɛ ɔ yi i wun nglo nyannyan'n, amun `koto i bo. Asiɛ'n sufuɛ mun kwlaa, kɛ amun o i nyrun lɛ'n, amun `usu.

Ezai 1:21

?Nguɛ sa yɛlɛ nga? ?Ɔ yo sɛ yɛ man Zerizalɛm ɔ'a kaci kɛ tekle bla sa-a? Laa ɔ ti klɔ kpa, i nunfuɛ'm be fa mmla'n su yɛ be yo sa mun i nuan su, sanngɛ siɛn'n, ɔ'a kaci sran kunfuɛ'm be klɔ.

Ezai 12:6

Siɔnfuɛ mun, amun klun b'ɔ ti jɔwa'n nin amun wun b'ɔ kpaja amun'n ti, amun `bo sro. Afin Izraɛl Nyanmiɛn'n b'ɔ wo amun afiɛn'n ɔ ti kpli!

Ezai 4:5

kpɛkuun ɔ ´yo nyanmiɛn ble nin wɛnsrɛn, be ´jran Siɔn oka wunmuan'n nin i sran bɔ b'a yia'm bé ti su nglo lɛ wia'n nun. Kɔnguɛ'n, ɔ ´yo sin b'ɔ jue kpa'n, ɔ ´kpaja be su. Afin Anannganman i nyrun nyannyan'n, ɔ kata be kwlaa be su,

Zeremi 13:18

Se famiɛn'n nin i nin be kɛ: «An `bubu gua asiɛ wun gblo. Afin amun famiɛn kle klanman'n ɔ'a fin amún ti su ɔ'a tɔ.

Zeremi 29:4

«Anannganman b'ɔ sie mɛn wunmuan'n, Izraɛl Nyanmiɛn'n waan be se be kwlaa nga be trali be lomuɛn Zerizalɛm fa ɔli Babilɔni'n be kɛ:

Zeremi 47:3

Kɛ siɛ'm be ti nnɛn kpanngɔ'm bé ja bo nganniɛn'n, kɛ be ti kakaklolo'm be kplalɛ'n, kɛ be ti kakaklolo'm bé nganniɛn'n, be si-man wie se kun. Bé wla ´fi be mma mun mlɔnmlɔn.

Zeremi 48:41

Be klɔ'm b'a tɔ. Be klɔ nga be si be wun'n b'a tɔ. Siɛn'n Moab safunyrɛn'm be wla ɔ'a bo yɛ srɛ kun be kɛ wunnzɛfuɛ wie b'ɔ o ba wulɛ su'n sa.

Zeremi 52:11

Kpɛkuun Nɛbikadnɛzar sɔ'n man be boli Sedesias i nyinma'n. Ɔ man be fali jrɔkɔ be cili i, nan ɔ'a fɛ i ɔ'a ɔ Babilɔni. Be wlɛli i bisua, ɔ kali bisua lɔ wuli .

Zeremi 52:13

Ɔ wɔli Anannganman i sua'n nin famiɛn sua'n, ɔ nin Zerizalɛm sua'm be ngba be nun. Sran kpakpa'm bé sua mun'n, ɔ'a yaci-man wie lɛ.

Ezekiɛl 24:21

‹Se Izraɛlfuɛ'm be kɛ: Anannganman seli min kɛ: Min tranwlɛ bɔ amun fa di amun nuan'n, bɔ amun wun i-ɔ, amun klun jɔ'n, bɔ amún wla o su'n n wa yo man ɔ yo fiɛn. Amun mma yasua mun nin amun mma bla nga be kali Zerizalɛm lɔ'n, be ´kun be.

Ezekiɛl 24:25

I sin Anannganman seli min kɛ: «Klɔ sran, n wa de bé sua b'ɔ ti be fiawlɛ nin be aklunjuɛ like'n, bɔ be fa di be nuan'n, bɔ bé wla o su'n. N ´yo man be mma yasua mun nin be mma bla'm be fi bé sa.

Mmla'n 28:25

Anannganman ´yo man amun kpɔfuɛ'm be ´kwla amun. Kɛ amun nin be ´ko kun'n, amun ´fa atin kunngba, sanngɛ balɛ'n su amun ´wanndi be ´fa atin nso. Kɛ mɛn'n nun nvle'm be ´wun sa ng'ɔ ´ju amún su'n, ɔ ´yo be sro.

Mmla'n 32:30

?Sran kunngba cenje kwla fuan sran akpi? ?Sran nnyɔn cɛ be kwla fuan sran akpi blu? N ´tɛ su kɛ: Ɛɛn! Sɛ min Anannganman bɔ n ti kɛ yɛbuɛ sa bɔ be talo min'n, sɛ n fa be n wla be kpɔfuɛ'm be sa nun'n, be kwla yo be sɔ.