Neemi 9:37 - NYANMIƐN NDƐ'N 1998

³⁷ Siɛn'n, e mɛn'n nun ninnge wla'm be ti famiɛn nga wɔ man e su be'n be liɛ, é sa tɛ bɔ e yoli'n ti. Kwlaa nga be klo kɛ be ´yo e nin e nnɛn mun'n, yɛ be yo-ɔ. Y'a wun e nyrun dan.»

Neemi 9:37 ပူးပေါင်းရင်းမြစ်များ

Ɛsdras 4:13

Nannan, man e kan kle wɔ, sɛ be kplan klɔ nga uflɛ'n, sɛ be kplɛn i talɛ'n, be ko tua-man lapo fanunfanun nga be tua'n, kpɛkuun ɔ sika'n su ´kpɛ.

Ɛsdras 6:8

Nga n usa kɛ amun yo be man Zuif'm be kpɛnngbɛn mun nan b'a kwla kplan sua sɔ'n, yɛlɛ kɛ Efrat sin lɔ lapo nga be tua blɛ min'n, i nun yɛ amun `fa ng'ɔ fata'n fa man be-ɔ. Nán junman'n jran.

Ɛsdras 7:24

I kun ekun b'ɔ nannan su'n, yɛlɛ Nyanmiɛn nyrun jranfuɛ mun, ɔ nin Levifuɛ mun, ɔ nin jue tofuɛ mun, ɔ nin anuan su nianfuɛ mun, ɔ nin Nyanmiɛn i sua nun junman difuɛ kun nga be lɛ su kpɛn mun, ɔ nin Nyanmiɛn i sua nun junman difuɛ nga'm be kwlaa be liɛ'n, nán be de be lapo fanunfanun'n wie fi.

Neemi 5:8

Kɛ e yiali'n, n seli be kɛ: «?Kɛ ɔ o yɛ'n, sɛ amun bo amun niaan'm be bosia'n, bɔ be wa yi'n, amun yo man be su i bo? Amun `nian, e niaan Zuif nga be yoli bé wun atɛ aofuɛ'm bé sa nun'n, e miannin e nyin nan e bɔbɔ y'a kpɔ bé ti. ?Yɛ amun bɔbɔ yɛ amun yo amun bɔbɔ amun niaan'm be atɛ e ngunmin-ngunmin é sa nun-ɔn?» Be gua lɛ be wun-man kun kan-man.

Ngwlɛ Yilɛ 5:5

E yalɛ klefuɛ'm be yaci-man e ndɛnngan. E lɛ-man wunmiɛn dewlɛ bɔ kaan sa, y'a fɛ siɛn'n.

Saun Yolɛ 26:17

E nin amun e ´nyɛn i: be nga be nin amun be kun'n, be yɛ be ´kwla amun-ɔn. Sɛ sran fi fuan-man amun bɔbɔ'n, sanngɛ amun ´wanndi .

Jean 8:33

Be seli i kɛ: «E ti Abraam anunman, e nian yo-man sran fi kanga le. ?Ɔ yo sɛ yɛ man a se kɛ, e ´nyan é ti nin-ɔn?»

Mmla'n 28:33

Nvle nga amun si-man be'n be nunfuɛ'm be ´di amun fie'm be su ninnge nin amun junman'n i nuan ninnge'm be kwlaa. Yalɛ yɛ be ´kle amun sa tititi-ɔ, yɛ mianmianlɛ yɛ be ´mianmian amun-ɔn .

Mmla'n 28:39

Amun ´ta vinyi, amun ´niɛn i lika, sanngɛ kakaa'm be ´wie i ngba di, amun su nyɛn-mɛn i mma wie yo-man nzan nan se kɛ amun ´fa wie sie.

Mmla'n 28:48

amun wa su amun kpɔfuɛ nga Anannganman man be nin amun wa kun'n. Awe nin nzue we ´kun amun. Amún wun tralɛ'n kwlakwla ´wie titi, yalɛ ´di amun. Anannganman ɔ ´sie amun kɔmin'n su blalɛ trɔ lele san ɔ ´wie amun nunnun.

Mmla'n 28:51

Be ´di amun nnɛn mun nin amun fie'm bé su aliɛ mun lele san amun ´wie nunnun. Amun ble, nin amun nzan lɔflɛ, nin amun ngo, nin amun nannin'm be mma mun, nin amun bua'm be mma mun, ɔ nin amun boli'm be mma mun'n, be su yaci-man wie fi lɛ. Yɛ amun bɔbɔ amun ´wie wu.