Neemi 9:19 - NYANMIƐN NDƐ'N 1998

¹⁹ Sanngɛ wɔ aunnvuɛ silɛ dan'n ti w'a yi-man be ase aawlɛ flɛnnɛn'n nun. Wɛnsrɛn b'ɔ kle be atin wia nun'n, ɔ nin sin b'ɔ kpaja be nyrun kɔnguɛ'n b'a kpɔci-man be le.

Neemi 9:19 ပူးပေါင်းရင်းမြစ်များ

Neemi 9:12

Wia nun'n, a dun mmua be nyrun, sin wɛnsrɛn'n ɔ ja tiaan yɛ ɔ kle be atin nin-ɔn. Kɔnguɛ a dun mmua be nyrun, sin taaman'n ɔ ja tiaan yɛ ɔ kpaja atin nga be sin su'n su-ɔ.

Neemi 9:27

Yɛ ɔ kusu a fali be wlali be kpɔfuɛ'm bé sa nun. Be kleli be yalɛ. Kɛ be ´wun be nyrun'n, be kpan flɛli wɔ. Ɔ kusu a o nyanmiɛn su lɔ a tili. A mannin be defuɛ mun, be deli be be kpɔfuɛ'm bé sa nun.

Neemi 9:31

Sanngɛ wɔ aunnvuɛ silɛ dan'n ti w'a nunnun-man be, w'a yi-man be blo, afin a ti Nyanmiɛn kun b'ɔ si aunnvuɛ yɛ ɔ klun ti ufue.

Jue Mun 106:45

Kɛ i waan ɔ ´yo be ye'n ti'n, i wla kpɛnnin aenguɛ ng'ɔ nin be trali'n su. I klun-ufue dan'n ti ɔ sili be aunnvuɛ.

Jue Mun 136:16

Ɔ fɛli i nvle'n nunfuɛ mun sinnin aawlɛ flɛnnɛn'n nun lɔ, afin i klun-ufue'n wo lɛ tititi.

Ezipt Lɔ Tulɛ'n 40:36

Kan kwlaa nga be ju lɛ'n, sɛ sin wɛnsrɛn'n nian jaso-man Nyanmiɛn i tannin sua'n i ti su'n, Izraɛlfuɛ'm be kɔ-man be nyrun.

Ezipt Lɔ Tulɛ'n 40:38

Sin wɛnsrɛn ng'ɔ kata tannin sua'n su wia nun'n, ɔ nin sin ng'ɔ jue kɔnguɛ'n, be nun yɛ Anannganman yi i wun nglo kle Izraɛlfuɛ mun lele yɛ be fa juli be juwlɛ-ɔ.

Ezai 44:21

«Zakɔb i osu'n nunfuɛ mun, Izraɛlfuɛ mun, man amún wla kpɛn sa nga su: amun ti min sufuɛ mun, n yili amun kɛ amun yo min sufuɛ mun, Izraɛlfuɛ mun, ń wla fi-man amun su.

Ngwlɛ Yilɛ 3:22

Anannganman i klun-ufue'n ɔ nian wie-man, i sran klolɛ'n ɔ tɛ o lɛ.

Ezekiɛl 20:14

Sanngɛ kɛ ɔ ´yo nan min dunman ɔ'a saci-man nvle-nvle nga blɛ bɔ n ´fa Izraɛlfuɛ mun Ezipt lɔ m ´ba be wunnin nun'n ti'n, m'an yo-mɛn i sɔ. N guali min ya'n i ase.

Ezekiɛl 20:17

Sanngɛ kɛ n nian be sa'n, be yoli min annvɔ. Be nunnunlɛ ɔ'a yo-man n fɛ kun, ɔ man m'an nunnun-man be aawlɛ flɛnnɛn'n nun lɔ.› »

Ezekiɛl 20:22

Sanngɛ kɛ ɔ ´yo nan min dunman'n ɔ'a saci-man nvle-nvle nga blɛ bɔ n ´fa Izraɛlfuɛ mun Ezipt lɔ m ba'n be wunnin nun'n be nun'n ti, m'an yo-man be like fi.

Daniɛl 9:18

Min Nyanmiɛn, sie ɔ́ su nan tie. Tike ɔ́ nyin nan nian e klɔ'n i bubulɛ bɔ ɔ'a bubu'n, klɔ sɔ'n bɔ ɔ dunman'n wo su'n. Kɛ e srɛ wɔ tantrantan kɛ nga sa'n, nán kɛ e nzuɛn'n ti kpa ti yɛ e srɛ-ɔ, ɔ sran klolɛ b'ɔ lɛ-man awieliɛ'n ti-ɔ.

Daniɛl 9:9

Sanngɛ ɔ liɛ'n e Min, e Nyanmiɛn, wɔ bɔ a si aunnvuɛ'n, bɔ ɔ klun ti ufue'n, kannzɛ bɔ e jasoli ɔ́ wun'n, a yacili e wun sa'n a cɛli ye.

Malasi 3:6

«N ti Anannganman n kaci-man, i sɔ'n ti amun bɔ an ti Zakɔb i mma mun,

Kalɛ 14:14

Be kɛnnin i sɔ kleli be lɔfuɛ mun. Be wunnin i kɛ wɔ Anannganman yɛ a jin ɔ nvle'n i sin-ɔn, nan a yi ɔ́ wun nglo a kle ɔ nvlefuɛ mun weiin. Be tili i kɛ wɔ yɛ a sasa be-ɔ. Afin a dun mmua be nyrun, wia nun, a o sin wɛnsrɛn tiaan kun nun, yɛ kɔnguɛ, a o sin tiaan kun nun.

Mmla'n 8:2

Nán amún wla fi atin tɛnndɛn nga Anannganman amun Nyanmiɛn'n fali amun sinnin nun aawlɛ flɛnnɛn'n nun lɔ afuɛ ablanan'n. I waan ɔ ´gua amun nyin ase nan ɔ ´sa amun nian. I waan ɔ ´si amun klun lɔ akunndan mun. I waan ɔ ´nian sɛ amun ´fɛ i nuan ndɛ'n su o, annzɛ sɛ o.

1 Samiɛl 12:22

Anannganman su yi-mɛn i nvle'n i blo, yɛlɛ kɛ i dunman'n ti dan, afin i bɔbɔ yɛ ɔ guguli kɛ ɔ ´fa amun yo i nvle-ɔ.