Neemi 12:27 - NYANMIƐN NDƐ'N 1998

²⁷ Kɛ be ´yi Zerizalɛm talɛ'n i nglo'n, be ko yiali Levifuɛ'm be lika nga be tran nun'n i kwlaa nun kɛ be bla Zerizalɛm be wa di cɛn'n wie. Be flɛ be kɛ be wa to jue, be bo aaba ndɛ nin jru, nin aluku be manman Nyanmiɛn.

Neemi 12:27 ပူးပေါင်းရင်းမြစ်များ

2 Samiɛl 6:12

David tili i kɛ Anannganman ɔ'a yo Obɛd-Edɔm i awlo'n i ye, nan i sa nun ninnge'n kwlaa ɔ'a yo kpa Anannganman i alaka b'ɔ o lɔ'n ti. Yɛ David ɔli ko fali Anannganman i alaka'n Obɛd-Edɔm i sua'n nun lɔ bali David Klɔ-ɔ. Be ´ba'n, wuun be ´si able.

1 Famiɛn Mun 8:63

Salomɔn fali nannin akpi-akpi ablaɔn-nin-nnyɔn (22.000) nin bua nin boli akpi-akpi ya ablaɔn (120.000) fa yili bo kun yolɛ i su tɛ mannin Anannganman. Anannganman i sua'n i nglo yilɛ ti yɛ be yili tɛ sɔ mun-ɔn.

1 Be Nyoliɛ 13:8

Kɛ be ´kɔ'n, wuun David nin Izraɛlfuɛ'm be kwlaa be ´bo jru mun, nin aluku mun, nin klɛn mun, nin aaba ndɛ mun, ɔ nin awɛ mun. Be fa be wunmiɛn'n kwlaa yɛ be yo-ɔ. Be ´yo'n, wuun be to jue.

1 Be Nyoliɛ 15:12

Ɔ seli be kɛ: «Amun ti Levifuɛ'm be awlobo kpɛnngbɛn. Amun nin amun niaan mun, amun `yo amun wun saun, nan amun `ko fa Anannganman b'ɔ ti Izraɛl Nyanmiɛn'n i alaka'n be bla lika nga n siesieli'n nun.

1 Be Nyoliɛ 15:16

David seli Levifuɛ'm be kpɛnngbɛn'm be kɛ be siesie be niaan jue tofuɛ'm be sɛsɛsɛ. I waan be kan kle be kɛ be fa be ngowa kanlɛ ninnge mun. Ɔ seli be kɛ be bo be jru mun, nin be aluku mun, ɔ nin be aaba ndɛ mun. I waan be bo i kekle kpa be fa yi be aklunjuɛ'n i nglo.

1 Be Nyoliɛ 15:28

Izraɛlfuɛ'm be kwlaa be ´fa Anannganman i alaka'n be ´ba'n, wuun be ´bo be sro, wuun be ´fita nnɛn wɛ'n nun, wuun be ´bo awɛ nin aaba ndɛ mun, wuun be ´bo aluku nin jru mun.

1 Be Nyoliɛ 15:4

David man Aarɔn osu'n nunfuɛ mun, ɔ nin Levifuɛ'm be yiali.

1 Be Nyoliɛ 16:42

Eman nin Zɛditɛn yɛ be nian awɛ mun nin aaba ndɛ'm be su-ɔ. Be nian ngowa kanlɛ ninnge bɔ be fa to Nyanmiɛn manmanlɛ jue'n be su ekun. Zɛditɛn i mma'm be ti anuan nun jranfuɛ.

1 Be Nyoliɛ 16:5

Azaf yɛ ɔ jin be nyrun-ɔn. Yɛ Zakari mɛntɛn i. Zɛiɛl, nin Sɛmiramɔt, nin Zɛiɛl, nin Matitia, nin Eliab, nin Bɛnaza, nin Obɛd-Edɔm, ɔ nin Zɛiɛl be lɛ ngowa kanlɛ ninnge mun. Be bo jru nin sanngo. Azaf kusu bo aaba ndɛ.

1 Be Nyoliɛ 23:5

Ɔ tili akpi nnan kɛ be yo anuan nun jranfuɛ, yɛ be akpi nnan (4.000) kun nga mun'n, i waan be `to jue manman Anannganman ɔ nin ngowa kanlɛ ninnge ng'ɔ yoli'n.

1 Be Nyoliɛ 26:31

Ebrɔnfuɛ'm be kpɛnngbɛn'n yɛlɛ Zɛriza. David sielɛ'n i afuɛ ablanan su'n, kɛ be ´nian-nian Ebrɔnfuɛ'm be afiliɛ'n, be wunnin kɛ be nun sran nga be ti safunyrɛn'n be wie o Zaɛzɛr Galaad mɛn'n nun lɔ.

2 Be Nyoliɛ 29:25

Famiɛn'n man Levifuɛ'm be ɔli Anannganman i sua'n nun lɔ. Aaba ndɛ, nin sanngo, ɔ nin jru o bé sa nun kɛ David, nin Gad b'ɔ ti famiɛn'n i jeliwafuɛ'n, ɔ nin Natan b'ɔ ti Nyanmiɛn nuan ijɔfuɛ'n be kannin'n sa, afin Anannganman yɛ man i nuan ijɔfuɛ'm be sieli i sɔ-ɔ.

2 Be Nyoliɛ 29:30

Yɛ famiɛn'n nin i awlo lɔ sran dandan'm be seli Levifuɛ'm be kɛ be to jue bɔ David nin Azaf b'ɔ ti Nyanmiɛn nuan ijɔfuɛ'n be kpɛli'n. Be waan be `to be manman Anannganman. Levifuɛ'm be kpajali bé wun be toli jue'n, i sin be kotoli yɛ be utuli be nyin ase, yɛ be suli Anannganman.

2 Be Nyoliɛ 5:13

Be kwlaa, i awɛ bofuɛ o, i jue tofuɛ o, be o likawlɛ, be sroli jue, be manmannin Anannganman, be bo flɛli i. Kɛ bɔ be ´to jue sɔ'n, wuun be ´bo ninnge nga be tɛ'n: awɛ mun, nin aaba ndɛ mun, ɔ nin like uflɛ mun. Be se kɛ: «Ɔ ti kpa, i aunnvuɛ silɛ'n wo lɛ tititi.» Kɛ ɔ yoli sɔ'n, nyanmiɛn ble'n yili Anannganman i sua'n.

2 Be Nyoliɛ 7:6

Nyanmiɛn nyrun jranfuɛ'm be jrannin be jranwlɛ'm be nun. Levifuɛ'm be kusu, ngowa kanlɛ ninnge nga David yo mannin Anannganman kɛ be `fa mɛnmɛn i'n, be wo bé sa nun. Be manmannin Anannganman be seli kɛ: «I aunnvuɛ silɛ'n wo lɛ tititi.» Nyanmiɛn nyrun jranfuɛ'm be kpɛ bé nyin bé su lɔ, yɛ be bo awɛ. Izraɛlfuɛ'm be kwlaa be jin nglo.

Ɛsdras 6:16

Izraɛlfuɛ mun nin Nyanmiɛn nyrun jranfuɛ mun, nin Levifuɛ mun, ɔ nin be kwlaa nga be fin kanga'n nun bali'n, be yili Nyanmiɛn sua'n i nglo aklunjuɛ nun.

Neemi 11:20

Izraɛlfuɛ kun nga mun, ɔ nin Nyanmiɛn nyrun jranfuɛ mun, ɔ nin Levifuɛ'm be trannin Zida klɔ kun nga'm be su. Be trannin be asiɛ'm be su sɛsɛsɛ.

Neemi 12:43

Le kun sɔ'n, e yili sraka kpanngban, yɛ e dili cɛn bɔbɔ, afin sa nga Nyanmiɛn yo mɛnnin i sran mun'n, ɔ man be klun jɔli dan. Bla nin ba kanngan'm be ngba yɛ be klun jɔli sɔ nin-ɔn. Be tili Zerizalɛmfuɛ'm be aklunjuɛ kplanlɛ'n mmua.

Neemi 8:17

Be kwlaa nga be fin kanga nun bali'n, be kplannin kpata be trannin nun. Kɛ ɔ fin Nɛn i wa Zozie blɛ su lele b'ɔ ´fa ju blɛ nga'n, be nian yo-mɛn i sɔ le. Aklunjuɛ'n yoli dan nan b'a di cɛn bɔbɔ.

Jue Mun 149:3

Man be si able nan be bo flɛ i. Man be bo klɛn nin jru yɛ be to jue be mɛnmɛn i.

Jue Mun 30:1

Jue nga ti David liɛ. Kɛ be ´yi Nyanmiɛn i sua'n i nglo'n, yɛ ɔ kpɛli-ɔ. I waan:

Mmla'n 16:11

Amun nin amun mma yasua mun, nin amun mma bla mun, nin amun kanga yasua mun, nin amun afanniɛn bla mun, nin Levifuɛ nga amun nin be tran lɛ mun'n, nin aofuɛ nga be sike amun'n, nin aika mma mun, ɔ nin angboti bla nga be nin amun o likawlɛ lɛ'n, amun `wɔ lika nga Anannganman amun Nyanmiɛn'n ko kle kɛ lɛ yɛ ɔ ´tran'n nun lɔ, nan amun `ko di cɛn i nyrun lɔ.

Mmla'n 20:5

Kpɛkuun man alɛ su kpɛnngbɛn'm be usa alɛ kunfuɛ'm be kɛ: «?Wan yɛ ɔ'a kplɛn i sua uflɛ-uflɛ b'ɔ nian la-man nun-ɔn? Man ɔ sɛ i sin wɔ i awlo. Nán man alɛ'n ɔ di i nan sran uflɛ yɛ ɔ tran nun-ɔn.

Filipfuɛ Mun 4:4

Sran wunmuan bɔ amun nin e Min'n ti'n ti'n, cɛn kwlaa man amun klun jɔ, n ´kɛn i ekun: man amun klun jɔ .

Sa nglô yile 5:8

Kɛ Bua Gbanflɛn'n sɔli fluwa nun'n, like nnan bɔ be ti kɛ nnɛn sa'n, be nin kpɛnngbɛn ablaɔn-nin-nnan'n be wa kotoli i bo. Aluku nin sika klowa mun be o be kwlakwla bé sa nun. Ansans o klowa sɔ'm be nun. Ansans'n yɛlɛ yalɛ nga Nyanmiɛn sran'm be koko kle i'n.