Naɔm 2:4 - NYANMIƐN NDƐ'N 1998

⁴ Ninivfuɛ'm be kpɔfuɛ'm be sonja mun be nyrɛn'm be ti ɔkwlɛ, bé wun tralɛ'm be blo kankankan. Kɛ be ´kɔ alɛ kunlɛ'n, be kakaklolo'm be sɔ youn kɛ sin sa, a ´nian-an b'a man be ta'm be su.

Naɔm 2:4 ပူးပေါင်းရင်းမြစ်များ

Nyanndra Mun 31:21

Ayrɛ blɛ nun'n, ayrɛ kpɛkpɛ kpa'n nun bɔbɔ'n, i klun ti-mɛn i. Afin i awlofuɛ'm be kwlaa be lɛ ayrɛ tralɛ sɛsɛsɛ.

Ezai 37:24

A sunmannin sran kɛ be wa kpɛ m bɔbɔ min Anannganman min nzowa. Yɛ a se kɛ: M bɔbɔ min Sankerib, min kakaklolo kpanngban'n, n fa n fuli oka'm bé su. N fa ɔli Liban mɛn'n i bo'n nun lɔ crɔcrɔcrɔ, n kpɛli sɛdri waka'm be nun ndɛnndɛn kpa mun, ɔ nin siprɛs waka'm be nun nglaannglaan kpa mun. N wɔli lele n juli Liban'n i oka nga be o mmua-mmua kpa'n bé wun lɔ, n fuli be su. N wɔli lele n wluli i bo mle kpa'm be nun.

Ezai 66:15

Afin amun `nian, Anannganman yɛ ɔ o sin kun nun ɔ su ba yɛ, i alɛ kakaklolo'm be yo kɛ aunngban dan kun b'ɔ su fita'n sa, ɔ wa yi i ya'n i nglo kekle kpa, yɛ ɔ ´fa sin taaman fa yi sa kekle nga i waan ɔ ´fa yo sran mun'n i nglo.

Zeremi 4:13

«Amun `nian, e kpɔfuɛ'n yɛ ɔ ´fu kɔ kɛ nyanmiɛn ble'n sa yɛ. I kakaklolo'm be tu kɛ seke sa, i nnɛn kpanngɔ'm be wanndi tra anunman nyin. Be `de ye o! Y'a wie mlin!»

Zeremi 46:9

«Nnɛn kpanngɔ mun, an man e wɔ! Kakaklolo mun, an `tu wɔ! Sonja kpakpa mun nin Kisfuɛ mun, ɔ nin Pitfuɛ mun, amun bɔ an ti nyrɛn nun trafuɛ'n, amun `wɔ. Lidfuɛ mun, amun bɔ an ti ta tofuɛ'n, amun `wɔ.»

Ezekiɛl 23:24

Be fin mɛn'n i nglo lɔ lika nun yɛ be ba-a. Be nin alɛ ninnge mun, nin alɛ kakaklolo mun, nin ninnge nga be fu be nun kɛ loto'm sa'n, ɔ nin alɛ kunfuɛ kpanngban yɛ be ba-a. Be fa be nyrɛn kaan mun nin be nyrɛn dan mun, yɛ be ´wla kpongbo kle, be ´sin yia wɔ. N ´fa ɔ wun ndɛ n wla be sa nun, be ´jran be mmla su be ´di wɔ jɔlɛ.

Ezekiɛl 26:10

I nnɛn kpanngɔ kpanngban sɔ'm be ´tru ndutre gua wɔ su. Kɛ be nnɛn kpanngɔ'm bé ja bo nin be kakaklolo'm be ´tɛ'n, ɔ talɛ'm be ´keje. Afin, kɛ be ´wlu wɔ anuan'm be nun'n, be ´wlu kɛ talɛ yɛ ɔ'a kpaci yɛ be su wlu nun sa.

Ezekiɛl 26:7

Anannganman Nyanmiɛn wan yoo: «Tir klɔ, n wa fa famiɛn'n ng'ɔ o mɛn'n i nglo lɔ lika nun'n, b'ɔ lɛ tinmin tra famiɛn'm be kwlaa'n, bɔ i dunman yɛlɛ Nɛbikadnɛzar, b'ɔ ti Babilɔni famiɛn'n, ɔ ´ba yɛ ɔ nin wɔ be ´kun. Ɔ ´ba-a, ɔ ´fa nnɛn kpanngɔ mun, nin alɛ kakaklolo mun, nin nnɛn kpanngɔ su fufuɛ mun, ɔ nin alɛ kunfuɛ mun kpanngban kpa.

Daniɛl 11:40

Blɛ'n i awieliɛ lɔ'n, Ezipt famiɛn'n ɔ nin i be ´kun, yɛ Siri famiɛn'n kusu wa fa kakaklolo mun, nin nnɛn kpanngɔ mun, nin mmeli kaka kpa ɔ ´ba kɛ aunngban dan sa. Ɔ ´fa i sonja'm be ´wlu mɛn kaka nun, be ´kpɛ mɛn'm be anyialiɛ mun kɛ nzue bɔ ɔ'a yi dan b'ɔ su sonji'n sa.