Mmla'n 9:13 - NYANMIƐN NDƐ'N 1998

¹³ Anannganman seli min ekun kɛ: «M'an wun kɛ nvle nga nunfuɛ'm be nyin ti kekle.

Mmla'n 9:13 ပူးပေါင်းရင်းမြစ်များ

Bo Bolɛ 11:5

Anannganman fin nglo lɔ jra niannin klɔ nin sua sɔ'n bɔ sran'm be su kplan'n.

Bo Bolɛ 18:21

Ɔ man ɔ ti bɔ n `jra n nian sɛ sa nga be yo'n nin be wun ndɛ nga n ti'n sɛ ɔ ti nanwlɛ o.»

2 Famiɛn Mun 17:14

Sanngɛ b'a tie-man ndɛ nga be kan kleli be'n. Be yoli nyin kekle kɛ bé nannan'm bɔ b'a lafi-man Anannganman be Nyanmiɛn'n i su'n be sa.

Jue Mun 50:7

Min sran mun, min bɔ n ti Nyanmiɛn'n, min bɔ n ti amun Nyanmiɛn'n, amun `sie amún su man n kan ndɛ n kle amun. Izraɛlfuɛ mun, amún wun ndɛ ng'ɔ o min klun'n, n wa kan kle amun.

Zeremi 13:27

Ɔ bian bɔ a kunndɛli mín bo'n, ɔ nin ɔ bian sa ngboko'n, ɔ nin ɔ tekle dan nga a boli'n, n wunnin be kpɔlɛ'm be su nin fie'm be su. N wunnin ɔ tete ninnge mun. Zerizalɛm, yako nin ɔ́ wun saun bɔ ɔ waan a yo-man'n. ?Cɛn onin ko yɛ a ´yaci kokowa bolɛ nin-ɔn?»

Zeremi 7:11

?Sua kpa bɔ min dunman'n wo su'n, ɔ ti amun nyrun kɛ awiefuɛ'm be fiawlɛ sa ? N wun i sɔ.› » Anannganman'n yɛ ɔ kan sɔ-ɔ.

Ndɛ Nga Nyanmiɛn I Nuan Ijɔfuɛ Oze Kannin'n 6:10

N wunnin sa tɛtɛ'n wie Izraɛl mɛn'n nun. Lɛ yɛ Efraim sili i tekle nin-ɔn, yɛ man fiɛn'n kannin Izraɛl-ɔ.»

Malasi 3:5

Anannganman'n b'ɔ sie mɛn wunmuan'n wan yoo: «N su wa ko tran amun afiɛn lɔ nan n ´di amun jɔlɛ. Wunnzue yifuɛ nin be nga be kunndɛ be wiengu'm bé yi mun, ɔ nin bé wun mun'n, n ´kan mín wun ndɛndɛ m ´ba nan n ´fɛ i sɔ ndɛ'n m ´mian bé sa. Be nga be ta ato nda, kpɛkuun i sɔ like'n be yo-mɛn i kun'n, ɔ nin be nga be mianmian bla nga be o angboti nun'n, ɔ nin aika mma mun'n, wie kusu-ɔ be bu aofuɛ'm be lufle'n, ɔ nin be nga be bu-man min like fi bɔ kaan sa'n, n ´kan mín wun m ´ba ndɛndɛ nan n ´fɛ i sɔ ndɛ'n m ´mian bé sa.»

Mmla'n 10:16

Ɔ man i ti'n, amun `fa amun wun mɛn i mlɔnmlɔn. Nán amun yo nyin kekle i su kun.

Mmla'n 31:27

Afin n si kɛ be ti nyin keklefuɛ dan kpa, be bli be-ɔ ɔ bli-man. Nian sunnzun bɔ min nyin tɛ o su'n, nian jasolɛ bɔ be ´jaso Anannganman wun-ɔn. ?Yɛ sɛ be waan m'an wu nin?

Mmla'n 9:6

Man amun si kɛ sɛ Anannganman amun Nyanmiɛn'n fa mɛn klanman nga man amun kɛ amun tran nun'n, nán kpa yɛ amun ti i ti yɛ ɔ fa mannin amun-ɔn, afin amun ti nyin keklefuɛ.