Mmla'n 32:46 - NYANMIƐN NDƐ'N 1998

⁴⁶ ɔ seli be kɛ: «Ndɛ nga m'an kɛn i ndɛ yɛ'n, man ɔ yo amun cinnjin. Amun `kan kle amun osu nunfuɛ mun. Man be nian mmla nga su be nanti.

Mmla'n 32:46 ပူးပေါင်းရင်းမြစ်များ

1 Be Nyoliɛ 22:19

Ɔ man amun `nian nun su Anannganman amun Nyanmiɛn'n kpa sakpa. Amun `siesie amún wun nan amun `kplan Anannganman Nyanmiɛn'n i sua'n. Kɛ amun ko kplɛn i manmanlɛ sua sɔ'n, amun `fa i alaka'n nin i sulɛ ninnge mun fa sie nun.»

Jue Mun 78:5

Ɔ kleli Zakɔb osu nunfuɛ'm be nantilɛ ng'ɔ fata'n, ɔ kpɛli mmla kun Izraɛl mɛn'n nun. Ɔ fa mmla sɔ'n sieli e nannan'm be nyrun kɛ be `kan be kle be mma mun

Nyanndra Mun 12:28

Nanwlɛ atin'n i su yɛ nguan'n wo-ɔ. I sɔ atin liɛ'n be sin su-ɔ be nyan nguan .

Ezekiɛl 40:4

Sran sɔ'n seli min kɛ: «Klɔ sran, nian kpa, yɛ sie ɔ́ su! Nian like nga n wa fa kle wɔ'n su kpa, afin n fali wɔ m bali wa kɛ a wa nian like sɔ'n. I sin'n, like nga a wun i'n, ko kan i kwlaa nun ndɛ kle Izraɛlfuɛ mun.»

Ezekiɛl 44:5

Anannganman seli min kɛ: «Klɔ sran, sie ɔ́ su kpa yɛ nian nga kpa. Sie ɔ su tie ndɛ nga n wa kan kle wɔ'n, min sua'n i su mmla'n i kwlaa yɛ n wa kɛn i lɛ-ɔ. Nian sua'n nun wluwlɛ nga be fa wlu lɔ'n nin fitewlɛ nga be fa fin lɔ fite'n su kpa.

Amɔs 5:4

Ndɛ nga Anannganman kan kle Izraɛlfuɛ mun'n yɛ: «Sɛ amun ´wun kɛ amun ´ka nguan nun'n, wuun amu'an mantan min .

JÉSUS-CHRIST I DYASIN FE'N BO LUC KLELI'N 9:44

«Amun liɛ'n, ndɛ nga m ma kɛn i yɛ'n, an `fa sie amun klun kpa. Be wa fa m bɔ n kacili Sran'n man sran mun.»

Mmla'n 11:18

An `fa ndɛ sɔ mun `sie amun klun, man be tran amun anwlɛn'n nun tititi. Amun `fa cici amún sa kɛ nzɔliɛ sa, amun `fa sie amun ngban su amun nyinma nnyɔn'm be afiɛn.

Mmla'n 11:19

Amun `fa kle amun mma mun sɛ an ti amun awlo lɔ o, amun `kan, sɛ amun o atin'n su amun su kɔ lika o, amun `kan, sɛ amun wa la o, sɛ amun tinnge o, amun `kan.

Mmla'n 32:45

Kɛ Moiz kannin Anannganman i nuan ndɛ'n i kwlaa kleli Izraɛlfuɛ mun wieli'n,

Mmla'n 4:6

Sɛ amun fa bé su nan amun nian bé su fa nanti'n, sɛ nvle kun nga'm be nunfuɛ'm be ti mmla sɔ'm be nun ndɛ mun'n, be ´si kɛ amun ti ngwlɛlɛfuɛ nin akunndanfuɛ mun. Nga be ´se'n yɛlɛ kɛ: «Nvle dan nga i nunfuɛ'm be si ngwlɛlɛ o, be si sa o!»

Mmla'n 4:9

Sanngɛ amun `nian amún wun kpa cɛn kwlakwla kɛ ɔ ´yo nan amún wla ɔ'a fi-man sa nga amun bɔbɔ amun wunnin be'n ti. Nán man be fin amun akunndan nun fite le. Amun `fa kle amun mma mun nin amun anunman mun.

Hébreu 2:1

I sɔ'n ti'n, man e fa ndɛ nga e tili be'n sie e klun kpa tra laa'n, sɛ y'a yo-man sɔ-ɔ ɔ cɛ-man nan y'a to a fuan atin'n.