Mmla'n 31:17 - NYANMIƐN NDƐ'N 1998

¹⁷ Kɛ be ko yo sɔ'n, n wa fa ya bé wun, n ´yi be ase, n ´kaci mín sin n ´si be. Nvle kun nga'm be ´nunnun be. Sa yalɛ sunman kpa nin nyrɛnnɛn sa'm be wa tɔ bé su. Kpɛkuun be wa wun i wlɛ kɛ Nyanmiɛn b'ɔ nun-man be afiɛn'n i ti yɛ sa sɔ'm be tɔ bé su nin-ɔn.

Mmla'n 31:17 ပူးပေါင်းရင်းမြစ်များ

1 Famiɛn Mun 8:57

Man Anannganman e Nyanmiɛn'n ɔ nin ye tran kɛ ɔ nin e nannan mun fa trannin'n sa. Nán ɔ kpɔci ye, nán ɔ yi ye ase.

2 Famiɛn Mun 22:13

«Amun `wɔ be ko wun Anannganman wun, man ɔ kan fluwa nga be wunnin i'n i wun ndɛ kle amun. Amun `wɔ min nin Zidafuɛ mun e dunman nun, afin kɛ n niɛn i sa'n, e nannan'm b'a fa-man fluwa nga nun ndɛ'm be su. B'a nian-man ndɛ sɔ'm be su b'a nanti-man. I ti Anannganman i ya nga ɔ'a fɛ i é wun'n ti-man blɛblɛ.»

1 Be Nyoliɛ 28:9

Min wa Salomɔn, ɔ liɛ'n, kplin ɔ́ nyin nan si Nyanmiɛn nga n su i'n kpa. Gua ɔ wla ase nan su i kpa, nán fa like uflɛ ukɛ i su, afin Anannganman nian kɛ e anwlɛn'n fa ti'n. Ɔ si e klun akunndan'n kwlaa. Sɛ a fa ɔ wun mɛntɛn i'n, ɔ ´yi i wun nglo ´kle wɔ, sanngɛ sɛ a kaci ɔ sin a si i'n, ɔ ´yi wɔ blo mlɔnmlɔnmlɔn.

2 Be Nyoliɛ 15:2

Azaria ko toli Aza-a. Ɔ seli i kɛ: «Nannan Aza, a nin Zidafuɛ mun, nin Bɛnzamɛnfuɛ mun kwlaa, amun `tie, n ´kan ndɛ. Sɛ amun nin Anannganman o nun'n, i kusu nin amun wo nun. Sɛ amun fa amun wun mɛntɛn i'n, ɔ ´yo man amun ´wun i. Sɛ amun kpɔci i'n, ɔ ´kpɔci amun.

2 Be Nyoliɛ 21:10

Kɛ ɔ fɛli i blɛ sɔ'n nun'n, Zida ɔ'a sie-man Edɔmfuɛ mun kun lele ndɛ. Klɔ nga be flɛ i Libna'n, i blɛ kunngba sɔ nun'n, i sufuɛ'm be kusu be yili bé ti Zɔram i sielɛ'n bo wie, yɛlɛ kɛ Zɔram yili Anannganman b'ɔ ti i nannan'm be Nyanmiɛn'n i ase.

2 Be Nyoliɛ 24:20

Anannganman i Wawɛ'n jrali Zɛozada wa Zakari b'ɔ ti Anannganman bɔbɔ nyrun jranfuɛ'n i su. Ɔ jrannin nzrafuɛ'm be nyrun, nan ɔ'a se be kɛ: «Amun `tie ndɛ nga Anannganman kan'n. I wan yoo: ‹?Ɔ yo sɛ ti yɛ amun fa-man min mmla'm be su-ɔ? Amun yo like fi-ɔ, ɔ su yo-man ye, afin amu'an kaci amun si b'a si min. I ti'n, n kusu n ´kpɔci amun.› »

Neemi 9:32

Siɛn'n e Min, Nyanmiɛn Kpli b'ɔ kwla like kwlaa yo'n, b'ɔ yo sro'n, Nyanmiɛn b'ɔ nanti aenguɛ b'ɔ nin ye trali'n su'n, Nyanmiɛn b'ɔ si aunnvuɛ'n, kɛ ɔ fɛ i Asiri famiɛn'm be blɛ su lele b'ɔ ´fa ju ndɛ'n, afɛ ng'ɔ tɔli é su e nin e famiɛn mun, nin e famiɛn i awlo lɔ sran dandan mun, nin e Nyanmiɛn nyrun jranfuɛ mun, nin e Nyanmiɛn nuan ijɔfuɛ mun, nin e nannan mun, nin e nvle'n kwlaa'n, afɛ sɔ'n, nán bu i like kaan.

Zɔb I Nyrɛnnɛn Wunlɛ 13:24

?Ɔ yo sɛ ti yɛ a kaci ɔ́ sin a si min bɔ a yo kɛ ɔ kpɔfuɛ yɛlɛ min sa nin-ɔn?

Zɔb I Nyrɛnnɛn Wunlɛ 34:11

Sa nga sran yo'n i nuan akatua yɛ ɔ fa mɛn i-ɔ. I nantilɛ'n su yɛ ɔ nian fa mɛn i ninnge mun-ɔn.

Jue Mun 104:29

Sanngɛ sɛ a to ɔ́ nyin blo'n, srɛ kun be kpa. Sɛ a yi wunmiɛn ng'ɔ o be nun'n, be ka lɛ be wu, yɛ be sa bé sin be kaci fa.

Jue Mun 2:12

Amun `koto i bo nan ɔ'a fa-man ya, nan atin nga amun fa su'n, amu'an mlin-man. Afin ɔ fa ya ndɛndɛ kpa. Sran ng'ɔ kunndɛ fiawlɛ i nun'n, i liɛ su ti ye!

Jue Mun 27:9

Nán kaci ɔ́ sin si min. Nán fa ya fuan min. Wɔ yɛ a ti min ukafuɛ-ɔ, nán yi min ase, nán yi min gua'n su. Wɔ Nyanmiɛn'n, wɔ yɛ a ti min defuɛ-ɔ!

Jue Mun 30:7

Blɛ bɔ n wo alaje'n nun fɔun'n, n se min wun kɛ: «Srɛ su kun-man min, yɛ min wun su usu-man min,

Jue Mun 44:10

Sanngɛ kpɛkuun, a yi e ase, a gua e nyin ase, kɛ ye alɛ kunfuɛ'm be ´kɔ alɛ kunlɛ'n, a nun-man bé sin kun.

Jue Mun 89:46

Wɔ man ɔ yoli oke i gbanflɛn nun. A guɛli i nyin ase.

Jue Mun 90:11

?Wan yɛ ɔ kwla si kɛ ɔ ya'n i dan'n fa ti ju-ɔ? ?Wan yɛ ɔ kwla wun ɔ ya'n i wlɛ b'ɔ man i nyin yi wɔ kɛ ɔ fata'n sa-a?

Ezai 2:6

W'a yi ɔ nvle'n nunfuɛ'm be ase. W'a yi Zakɔb i osu'n nunfuɛ'm be ase. Afin wia afiliɛ lɔfuɛ'm be nzuɛn'n yɛ be fa-a, be yi wunnzue kɛ Filistifuɛ'm be sa, yɛ be nin nvle kun nga'm be nunfuɛ'm bé bo ti kun .

Ezai 5:25

I sɔ'n ti Anannganman fali ya i sran'm bé wun. I sa kannin be. Oka'm be kejeli, sran'm be saka'm be tru klɔ'n nun atin'm be nun kɛ wla sa. Sanngɛ ɔ nin i sɔ'n ngba'n, Anannganman i ya'n ɔ'a jɔ-man, ɔ nin be tɛ nyɛn i tititi.

Ezai 63:17

?Anannganman, ɔ yo sɛ ti yɛ a yo man e wlan-wlan vaa bɔ e fa-man wɔ atin nin-ɔn? ?Ɔ yo sɛ ti yɛ a kete ye anwlɛn'n bɔ e sro-man wɔ nin-ɔn? E bɔ e ti ɔ sufuɛ mun'n, bɔ e ti ɔ liɛ'n, e dunman nun ti, sa ɔ́ sin bla.

Ezai 64:7

Ɔ nin sɔ'n ngba'n, Anannganman, a ti é si. E ti kɛ ufa sa, wɔ yɛ a ti ye ufuɛ-ɔ. E kwlaa e ti ɔ́ sa nuan like .

Ezai 8:17

N su minndɛ Anannganman. Blɛ nga nun liɛ'n, ɔ'a kaci i sin ɔ'a si Zakɔb i osu'n nunfuɛ mun. N fa mín wla guɛ i su kpa.

Zeremi 23:33

Nan yoo: ‹Sɛ min nvlefuɛ mun annzɛ Nyanmiɛn nuan ijɔfuɛ sɔ mun annzɛ Nyanmiɛn nyrun jranfuɛ sɔ'm be nun kun usa wɔ kɛ: ?Nguɛ sa yɛ Anannganman'n ɔ'a siesie kɛ ɔ ´fa yi é su-ɔ? Kan sa sɔ'n kle be. Se be kɛ: Anannganman'n waan: N ´yi amun ase.›

Zeremi 23:39

i ti n wa yi amun ase mlɔnmlɔn. N ´fuan amun min nyrun wa, yɛ klɔ bɔ n fa mannin amun nin amun nannan mun'n n ´nunnun i.

Zeremi 36:7

Nja, sɛ be wa kpan be ´kpata Anannganman nin o! Sɛ be ´yaci be aeliɛ tɛtɛ nin o! Afin Anannganman'n kɛnnin i kɛ ya ng'ɔ fɛli i bé wun'n, ɔ ti-man blɛblɛ.»

Zeremi 40:2

Gladi difuɛ kpɛn'n man be ko fali Zeremi bali nan ɔ'a se i kɛ: «Nyrɛnnɛn sa nga ɔ'a ju klɔ nga su yɛ'n, Anannganman ɔ Nyanmiɛn'n ɔ boli su.

Zeremi 8:19

Ee, min nvlefuɛ'm be o mɛn wie nun mmua lɔ be sun se kɛ: «?Nan Anannganman'n nun-man Siɔn wa kun? ?Siɔn i famiɛn'n nun-man wa kun?» « ?Ɔ yo sɛ ti yɛ be fa be amuɛn'm be fɔkɔ min anwlɛn nin-ɔn, ɔliɛ like finfin sɔ'n bɔ be fin mɛn uflɛ nun'n?»

Ezekiɛl 39:29

N su kaci-man min sin n ko si-man be kun, afin n wa fa min Wawɛ'n m ´man be.» Anannganman Nyanmiɛn yɛ ɔ kan sɔ-ɔ.

Ndɛ Nga Nyanmiɛn I Nuan Ijɔfuɛ Oze Kannin'n 10:4

Be yia be ijɔ lelele ngbɛn, be ta ato nda mun, be nin nvle wie'm be tra aenguɛ yɛ be kpɛ anuansɛ'm be ba. Sanngɛ sa ndɛnman su yolɛ'n ɔ'a yo bé sa nun kɛ ijre tɛ wie sa. Kɛ a nian-an, lika weiin ɔ'a fu.

Ndɛ Nga Nyanmiɛn I Nuan Ijɔfuɛ Oze Kannin'n 9:12

Ba kunngun nga be ´nyan be bɔ be ´ta be'n, n ´yo man ba sɔ'm be su nyan-man bé ti yo-man sran bɔ ngbɛn. N ´de be bé sa nun. Ee, cɛn nga n ko kaci mín sin n ko si be'n, be yako wie!

Mise 3:4

I sɔ'n ti, cɛn nga be wa kpan flɛ Anannganman'n, ɔ su tɛ-man be su. Ɔ ´kaci i sin si be, be sa tɛ nga be yoli'n ti .

Kalɛ 14:42

Nán amun wɔ, afin Anannganman nun-man amun afiɛn kun. Nán amun wɔ nan amun kpɔfuɛ'm be kɔ kwla amun lɔ ngbɛn.

Mmla'n 29:20

Anannganman ɔ ´yo man ɔ ´wun nyrɛnnɛn. Ɔ ´yi i Izraɛl akpasua'm be nun. Sa yalɛ nga be kan be ndɛ mmla bɔ be ti klɛwa fluwa nga nun'n, Anannganman ´fa yi i su. Kɛ Anannganman nin be nuan sɛli su sɔ-ɔ.

Mmla'n 30:18

i liɛ'n, man n kan kle amun ndɛ, san wulɛ yɛ amun ´wu-ɔ. Amun su cɛ-man lika nga amun su wa kpɛ Zurdɛn'n nzue ba nan amun ko fɛ i lɛ'n nun.

Mmla'n 30:19

Ndɛ nga n wa kan kle amun ndɛkɛn yɛ'n, nguan'n nin wie'n yɛ m'an ´fa sie amun nyrun lɛ-ɔ. Muae nin sa yalɛ'n yɛ m'an ´fa sie amun nyrun lɛ-ɔ. N bua-man ato. N kan nyanmiɛn nin asiɛ'n. Amun nin amun osu nunfuɛ mun, amun `fa nguan'n nan amun tran nguan nun.

Mmla'n 31:18

Sa tɛ kwlaa nga be yoli'n, bɔ man be yacili min lɛ be fali ninnge wie mun'n ti'n, n ´kaci mín sin n ´si be mlɔnmlɔnmlɔn.

Mmla'n 7:21

Nán srɛ kun amun bé wun, afin Anannganman amun Nyanmiɛn'n nin amun o nun. Ɔ ti Nyanmiɛn kun b'ɔ ti dan yɛ ɔ yo sro.

Jɔlɛ Difuɛ Mun 10:6

Izraɛlfuɛ'm be wa yoli like nga Anannganman klo-mɛn i ekun. Be sɔli amuɛn nga be flɛ be Baal nin Astarte mun. Be sɔli Sirifuɛ mun, nin Sidɔnfuɛ mun, nin Moabfuɛ mun, nin Amɔnfuɛ mun, ɔ nin Filistifuɛ'm be amuɛn mun ekun. Be kacili bé sin sili Anannganman, b'a su-mɛn i kun.

Jɔlɛ Difuɛ Mun 6:13

Zedeɔn tɛli i su kɛ: «?Ai nannan, sɛ Anannganman nin e o nun'n, yɛ wuun ɔ yo sɛ ti yɛ sa nga'm be ju e su-ɔ? ?Abonuan sa nga e si'm be kan kle e bɔ be waan: ‹Anannganman i fanngan nun yɛ e fin Ezipt lɔ e bali'n,› i sɔ abonuan sa liɛ ɔ yo sɛ ti yɛ e wun-man be kun-ɔn? Andɛ e yɛ Anannganman ɔ'a yi e blo yɛ, ɔ'a fa e ɔ'a wlɛ i Madianfuɛ'm bé sa nun.»