Mmla'n 16:19 - NYANMIƐN NDƐ'N 1998

¹⁹ Nán amun bu sran fi ndɛ kwlɛ. Nán amun nian sran nyrun nan amu'an bu ndɛ. Nán amun sɔ adi ninnge'm be nun. Afin ninnge sɔ'm be si akunndanfuɛ'm be nyinma. Yɛ be saci nanwlɛ difuɛ'm be ndɛ kanlɛ'n.

Mmla'n 16:19 ပူးပေါင်းရင်းမြစ်များ

Jue Mun 15:5

Sɛ be fɛ sika i sa nun'n, ɔ se-man kɛ be su i bo. Sɛ be waan be ´cɛ i like nan ɔ `tɔn sran nga ɔ'a yo-man sa'n i suɛn'n, ɔ kplin-man su . Sran ng'ɔ yo kɛ nga sa titi'n, ɔ su tɔ-man le nan kɛ ɔ ´yo-ɔ ɔ'a yo.

Ezipt Lɔ Tulɛ'n 18:21

Kpa sran nga be lɛ nyrun'n, bɔ bé nyin yi Nyanmiɛn kpa'n, bɔ be klo nanwlɛ'n, bɔ be ti-man sika tɛ kunndɛfuɛ mun. Man wie'm be yo sran akpi su kpɛnngbɛn, wie'm be yo sran ya su kpɛn, wie'm be yo sran ablenun su kpɛn, yɛ wie'm be yo sran blu su kpɛn.

Ezipt Lɔ Tulɛ'n 23:2

Sran wie bé bo yo kun be yo sa tɛ. Nán nian kɛ be ti kpanngban ti a se kɛ a su be su yo wie. Sran wie'm be kusu be di ndɛ i wafa b'ɔ ti-man su'n. Nán jran bé sin.

Ezipt Lɔ Tulɛ'n 23:3

Sɛ sran kun ti yalɛfuɛ bɔbɔ nan i ndɛ yo-man fɛ'n, nán nian kɛ ɔ ti yalɛfuɛ'n ti a se kɛ a jran i sin.

Nyanndra Mun 15:27

Sran nga i waan ɔ su kpli nyɛn i wun'n, i awlo'n i bolɛ i wun atin yɛ ɔ su kpɛ i lɛ-ɔ. Sran nga kusu bɔ be cɛ i like kɛ ɔ bua ato-ɔ ɔ kplin-man su'n, ɔ ´cɛ cɛcɛcɛ .

Nyanndra Mun 17:23

Sran ng'ɔ ti-man kpa'n, sɛ be mɛn i sika kɛ ɔ jran ndɛ tɛ sin'n, ɔ sɔ nun.

Nyanndra Mun 18:5

Sran nga b'ɔ yo sa'n, ɔ fata-man kɛ be jrɛn i sin nan be fa ndɛ'n gua sran nga bɔ ɔ'a yo-man sa'n i su.

Nyanndra Mun 24:23

Akunndanfuɛ'm be ndɛ nga be kannin'n i wie ekun yɛ. Sɛ be ´di jɔlɛ'n, ndɛ kwlɛ dilɛ'n ɔ ti-man kpa.

Nyanndra Mun 24:28

Nán tɔn ɔ wiengu wie suɛn. I sɔ gblɛ liɛ'n, nán kpɛ !

Nyanndra Mun 31:5

Afin sɛ be nɔn be bo'n, bé wla ´fi mmla'n, yɛ be ´di yalɛfuɛ'm be ndɛ kwlɛ.

Akunndanfuɛ'n 7:7

Sɛ be su kle sran kun nyrɛnnɛn'n, ɔ yo ngwlɛlɛfuɛ'n i ya lele tra su. Adi nga be man'n, ɔ yo man sran di-man nanwlɛ.

Ezai 1:17

Amun `suan sa kpa'n i yolɛ, amun `yo sa'm be nuan su. Sran ng'ɔ kle sran'm be nyrɛnnɛn'n, amun `yo man ɔ kaci i sa. Amun `di aika mma'm be jɔlɛ'm be kpa, amun `jran angboti mmla'm bé sin.»

Ezai 1:23

Ɔ famiɛn'n i awlo lɔ sran dandan mun be yo nyin kekle Nyanmiɛn su. Be nin awiefuɛ'm bé bo ti kun. Adi ninnge'n yɛ be kunndɛ-ɔ, siɛn'n be bɔbɔ yɛ be su sran'm be su kɛ be `wla bé sa bo-ɔ. Be di aika mma'm be ndɛ kwlɛ, angboti mmla'n be ndɛ'n nga be fa blɛ be kɛ be di'n, ɔ ti-man be ndɛ.

Ezai 33:15

Sran ng'ɔ fa mmla'n su'n, b'ɔ yo sa i nuan su'n, b'ɔ klo-man like nga be de i be wue kekle su'n, b'ɔ sɔ-man adi ninnge'm be nun'n mlɔnmlɔn'n, bɔ kɛ be ´kan sran kunlɛ ndɛ be kle i'n ɔ tannin i su'n, b'ɔ kɛtɛ i nyin kɛ ɔ ´yo nan ɔ'a wun-man sa tɛ'n,

Zeremi 5:28

Be wunnɛn'n wo be wun, be ti mlanmlanmlan. Sa tɛ'n wie fi nun-man lɛ bɔ be yo-man-an. Be ndɛ nun-man sa i nuan su yolɛ'n ndɛ nun. Like ng'ɔ ti bɔ be yo man aika mun'n, ɔ ti-man be ndɛ, sanngɛ be yɛ be ndɛ'n yo fɛ-ɔ. Like ng'ɔ ti bɔ be yo man yalɛfuɛ mun'n, ɔ ti-man be ndɛ.

Ezekiɛl 18:8

Sɛ ɔ bo sran bosia, ɔ kunndɛ-man asubo. Ɔ yo-man sa ng'ɔ ti-mɛn i nuan su'n. Sɛ ɔ ´di jɔlɛ'n, o bu ndɛ nanwlɛ, ɔ jran-man sran sin.

Ezekiɛl 22:12

Ɔ lɔ'n, be tua sran kalɛ kɛ ɔ ko kun sran. Kɛ be bo sran bosia'n, be kwla-man i asubo'n nun. Be bo be wiengu'm be akpo be fa nyan bé wun. Yɛ min liɛ'n bé wla fi min su mlɔnmlɔnmlɔn. Nga n wunnin i'n yɛ ɔ o lɛ-ɔ.› » Anannganman Nyanmiɛn'n yɛ ɔ kan sɔ-ɔ.

Saun Yolɛ 19:15

Nán amun bu ndɛ kwlɛ. Nán amun nian kɛ sran nga ti yalɛfuɛ'n ti amun ´bu ndɛ yi i su. Nán amun nian kɛ sran nga kusu ti sikafuɛ'n ti amun ´jrɛn i sin. Sanngɛ kɛ ndɛ'n fa ti'n, yɛ amun `fa kan man amun wiengu mun-ɔn.

Mise 7:3

Sa tɛ'n, b'a yo i lele b'a si i yo kekleke. Kpɛnngbɛn mun nin jɔlɛ difuɛ'm be mianmian sran mun kɛ be man be ninnge mun. Sran dandan'm be kusu be like liɛ kun nga be waan be ´fɛ i sran sa nun'n, be fia-man bé wun, be fɛ i wue kekle su.

Abakik 1:4

Sran'm be bu-man mmla'n i like fi kun, be di-man ndɛ nanwlɛ kun. Klunwifuɛ'n ɔ tɔ nanwlɛfuɛ'n su. Ɔ man ɔ jɔlɛ nga sran'm be di'n, wie fi ti-man su.

Sa nga bé yôli'n 10:34

Yɛ Piɛr kusu seli kɛ: «Nanwlɛ, m'an wun i wlɛ kɛ Nyanmiɛn liɛ'n, ɔ kpa-man sran nun ,

Sa nga bé yôli'n 16:37

Sanngɛ Pɔl seli sonja'm be kɛ: «?E bɔ e ti Rɔmfuɛ, bɔ b'a usa-man ye sa fi, bɔ be man be boli ye nzra nun bɔ be wlali ye bisua'n, yɛ be wa yaci e nun nvialiɛ nun-ɔn? E su kplin-man su. Man be bɔbɔ be wa yaci ye nun.»

Sa nga bé yôli'n 23:3

Yɛ Pɔl seli i kɛ: «Talɛ ufue, Nyanmiɛn wa bo wɔ! A ti lɛ a jran mmla'n su a di jɔlɛ. ?Kɛ a se kɛ be bo min'n, kɛlɛ ɔ bɔbɔ a fa mmla'n su yɛ o lɛ-ɔ?»

Mmla'n 10:17

Yɛlɛ kɛ Anannganman amun Nyanmiɛn'n ɔ ti dan tra amuɛn'm be ngba. Ɔ ti miɛn'm be Miɛn. Ɔ ti Nyanmiɛn Kpli, ɔ lɛ wunmiɛn, ɔ yo sro, ɔ kpa-man sran nun, be cɛ i like kɛ ɔ jran bé sin-ɔn ɔ yo-man ye.

Mmla'n 16:18

Klɔ nga Anannganman amun Nyanmiɛn'n fa man amun'n, amun `sie be kwlaa su jɔlɛ difuɛ mun, nin mmla su nianfuɛ mun amun akpasua kunngun'm bé su. Man be di sran'm be ndɛ mun nanwlɛ su.

Mmla'n 24:17

Nán amun bu aofuɛ annzɛ aika ba'n i ndɛ kwlɛ. Nán amun fa angboti bla'n i kondro'n wla aowa.

Mmla'n 27:19

«Sran ng'ɔ bu aofuɛ annzɛ aika ba, annzɛ angboti bla be lufle'n, nán man ɔ wun ye le.» Kpɛkuun man Izraɛlfuɛ'm be kwlaa be tɛ su kɛ: «Man ɔ yo sɔ!»

Mmla'n 27:25

«Sran nga be cɛ i like kɛ ɔ `fa nan ɔ `kun sran wie bɔ ɔ'a yo-man sa fi'n, b'ɔ sɔ nun'n, nán man ɔ wun ye le.» Kpɛkuun man Izraɛlfuɛ'm be kwlaa be tɛ su kɛ: «Man ɔ yo sɔ!»

1 Samiɛl 12:3

Min yɛ n wo yɛ, Anannganman ɔ nin famiɛn b'ɔ sieli'n be ti min lalofuɛ. Amun `kan sa nga n yoli'n, sɛ n fali sran wie nannin-ɔn, ɔ `kan. Sɛ n fali sran wie i aflunmun-ɔn, ɔ `kan. Sran nga n dili i lufle-ɔ, ɔ `kan. Sran nga n yoli i sa b'ɔ ti-man su-ɔ, ɔ `kan. Sran ng'ɔ mannin min like kɛ n fa nan sɛ ɔ yo sa tɛ-ɔ, n yo kɛ n wun-mɛn i sa'n, sɛ i sɔfuɛ o wa'n man ɔ kan. Like nga n fali'n b'ɔ ti-mɛn i su'n, amun `kan man n yi man amun.»

1 Samiɛl 8:1

Kɛ Samiɛl yoli oke'n, ɔ fɛli i mma yasua mun sieli Izraɛl nvle'n su kpɛn.

1 Samiɛl 8:3

Sika klolɛ'n ti, ba sɔ'm b'a nanti-man kɛ bé si sa. Be nga be man be like'n, be yɛ be bu be ndɛ klanman-an.