Malasi 2:8 - NYANMIƐN NDƐ'N 1998

⁸ Sanngɛ amun ajulisu Nyanmiɛn nyrun jranfuɛ mun'n amu'an fa-man atin kpa sɔ'n su kun, amu'an kle sran sunman be atin tɛ. Amu'an saci aenguɛ nga e nin Levi e trali'n. M bɔbɔ min Anannganman bɔ n sie mɛn wunmuan'n yɛ n kan kle amun-ɔn.

Malasi 2:8 ပူးပေါင်းရင်းမြစ်များ

2 Famiɛn Mun 16:11

Yɛ Iri b'ɔ ti Nyanmiɛn nyrun jranfuɛ'n niannin sraka yiwlɛ nga kɛ Akaz o Damas lɔ'n ɔ klɛli i wun ndɛ blɛli i'n su kplannin sraka yiwlɛ kun sɛsɛsɛ kɛ ng'ɔ o lɛ'n sa. Ɔ wieli i kplan nan Akab ɔ'a fin Damas ɔ'a ba.

Neemi 13:29

«Min Nyanmiɛn, nán ɔ́ wla fi su kɛ be yoli ɔ sɔlɛ junman'n i finfin. Nán ɔ́ wla fi su kɛ aenguɛ nga a nin ɔ nyrun jranfuɛ nin Levifuɛ'm be trali'n be yoli i finfin ekun.»

Jue Mun 119:102

Sa nga a kan be kle min'n, n yi-man be ase, afin wɔ yɛ a ti min ngwlɛlɛ klefuɛ-ɔ.

Jue Mun 18:21

Sɛsɛ bɔ n ti'n, i nuan akatua yɛ Anannganman tuali min-ɔn. Sa tɛ bɔ m'an yo-man'n, i nuan like yɛ ɔ mannin min-ɔn.

Nyanndra Mun 12:8

Sran kun bɔ be ´klo i sa lɛ'n, ɔ fin i ngwlɛlɛ b'ɔ si i'n. Sran nga kusu b'ɔ fa sinnzin yolɛ'n fa cici i ti'n, bé nyin ci i sɔfuɛ'n.

Ezai 30:11

Amun `jaso nanwlɛ atin'n su, amun `yaci atin kpafuɛ'n. Nán amun bo Izraɛl Nyanmiɛn'n i dunman'n su kle ye kun.»

Ezai 59:13

E nyin yi-man Anannganman, e kpɛ i gblɛ, e kan ndɛ kekleekle bɔ be ti tɛtɛ'n, e jaso i wun, gblɛ kpɛlɛ'n yɛ ɔ wo e nun-ɔn, ɔ man e bua ato.

Ezai 9:16

I sɔ'n ti, Anannganman i klun su kwla jɔ-man be gbanflɛn'm bé wun. Yɛ ɔ su kwla si-man be aika mma mun nin be angboti mmla'm be aunnvuɛ. Afin be wie fi sro-mɛn i, be kwlaa be ti sa tɛ yofuɛ mun ngunmin kokoko. Ndɛ ng'ɔ fin be nuan fite'n, ɔ ti tɛtɛ ngunmin. I sɔ'n ti, Anannganman i ya'n ɔ su jɔ-man, ɔ nin be ´nyɛn i tititi.

Zeremi 17:13

Anannganman, wɔ bɔ ɔ su yɛ Izraɛl i wla'n wo'n, be bɔ be kaci be sin be si wɔ'n be ´wun nyannzuɛn. Be bɔ be yaci wɔ lɛ kɔ like uflɛ sin'n, be ti kɛ dunman bɔ b'a klɛ i aunnyan nun bɔ i nunnunlɛ ɔ yo-man ya'n sa. Afin Anannganman b'ɔ ti kɛ nzue ti kun bɔ i nun nzue'n ti klengle b'ɔ wie-man nun le sa'n, b'a yaci i lɛ.

Zeremi 17:5

Anannganman'n wan yoo: «Sran ng'ɔ yaci min Anannganman'n n lɛ bɔ sran su yɛ i wla'n wo'n, bɔ klɔ sran bɔ i nyin tɛ'n i su yɛ ɔ lafi'n nán man ɔ wun ye le!

Zeremi 18:15

Sanngɛ kpɛkuun min nvlefuɛ'm bé wla ɔ'a fi min. Be yra ansans be fa man ninnge finfin mun. B'a yo man b'a yaci be atin'n lɛ. B'a yaci be atin laa'n lɛ. B'a ko fa atin nga b'a yi-man'n.

Zeremi 2:8

Nyanmiɛn nyrun jranfuɛ'm b'a usa-man kɛ: ‹?Anannganman kpa'n wo nin?› Be bɔ mmla'n wo bé sa nun'n, b'a si-man min. Amun su kpɛnngbɛn'm be jasoli mín wun. Nyanmiɛn nuan ijɔfuɛ'm be yoli Baal nuan ijɔfuɛ. Like nga be yo-man like fi ye'n, bé wun yɛ be fali bé wun mantannin-ɔn.

Ezekiɛl 22:26

Be sraka yifuɛ'm be fɔn min mmla mun, yɛ be bu-man lika nga be ti n liɛ klonglo'n be like fi. Be si-man like ng'ɔ ti n liɛ klonglo'n nin ng'ɔ ti-man n liɛ mlɔnmlɔn'm be ngbaciɛ. Be kle-man sran'm be like ng'ɔ ti saun'n nin ng'ɔ ti-man saun'n be ngbaciɛ. Be nyinfu be di-man min wunmiɛn-delɛ-cɛn'n su. Yɛ sran fi nyin yi-man min. Anyinyiɛ ng'ɔ fata kɛ be fa man min'n, be fa man-man min.

Ezekiɛl 44:10

«Levifuɛ nga be yacili min'n bɔ be kacili be sin sili min'n, bɔ be nin Izraɛlfuɛ'm be onga mun be ko sɔli amuɛn fiɛnfiɛn mun'n, be liɛ'n, be wa fɛ be sa tɛ'n i su afɛ'n.

Ezekiɛl 44:12

Kɛ bɔ be yɛ be jrannin sran'm bé nuan be sɔli amuɛn'n ti yɛ man Izraɛlfuɛ'm be yoli sa tɛ'n nin-ɔn. I ti ndɛ nga min Anannganman Nyanmiɛn n kan'n yɛ: E nin be lɛ i, n wa kle be nun. Be wa sua bé sa tɛ nga be yoli'n i su afɛ'n.

Ezekiɛl 44:7

Blɛ bɔ amun ´fa kpaun nin nnɛn lui, ɔ nin nnɛn mmoja be fa blɛ min'n, amun fali aofuɛ bɔ be ti-man min sran'n, bɔ be nian wla-man be klɛn be anwlɛn'n nun nin be wunnɛn'n su'n wluli min sua'n nun wa. Be yoli min sua'n i fiɛn. Amu'an fa tete sa sɔ mun b'a saci aenguɛ nga e nin amun e trali'n.

Ndɛ Nga Nyanmiɛn I Nuan Ijɔfuɛ Oze Kannin'n 4:6

Min sran'm be su wu, silɛ bɔ be si-man min'n ti be su wu. Ɔ kusu ɔ liɛ'n, a yili min ase. Silɛ nga a si min laa'n, a si-man min sɔ kun. I sɔ'n ti kusu m'an yi wɔ ase, a su yo-man min nyrun jranfuɛ kun. Mmla nga n kleli wɔ bɔ ɔ́ wla fili be su'n ti, min kusu n su kplin-man su kɛ ɔ mma'm be yo min nyrun jranfuɛ.

Saun Yolɛ 21:15

Sɛ ɔ'a yo-man sɔ-ɔ, fiɛn ´wlu i awlo'n nun. N ti Anannganman, min yɛ n fɛli i n sieli i kɛ ɔ `di min nyrun jranlɛ junman nin-ɔn.»

Sofoni 3:4

I su Nyanmiɛn nuan ijɔfuɛ mun'n, be kwla lafi-man bé su fa-man like wla-man be sa nun kɛ be `yo, be yo-man like nga be kle be'n. I su Nyanmiɛn nyrun jranfuɛ'm be yo Nyanmiɛn i ninnge'm be finfin. Be fa-man mmla'n su .

Malasi 1:6

Min Anannganman bɔ n sie mɛn wunmuan'n, n se min nyrun jranfuɛ'm be kɛ yoo: «Bakan kwlaa i nyin yi i si, sran ng'ɔ ti afanniɛn'n kusu i nyin yi i min'n. ?Yɛ min li, nán min yɛ n ti amún si, ɔ nin amun min nin-ɔn? ?Yɛ ɔ yo sɛ, bɔ amún nyin yi-man min, bɔ amun sro-man min-ɔn? Amun yo min finfin, kpɛkuun amun usa kɛ: ‹?Finfin sɛ yɛ e yo wɔ-ɔ?›

Malasi 2:5

Aenguɛ sɔ'n i fanngan nun yɛ man be lɛ nguan nin fɔundi-ɔ. N waan n ´yo nan be sro min. Be kusu be sroli min. Kɛ be ti min dunman'n, bé wun usu be.

Kalɛ 25:12

Siɛn'n, se i kɛ e nin i e wa tra aenguɛ kun b'ɔ ti aunjuɛ aenguɛ.

Kalɛ 25:13

Aenguɛ sɔ'n, ɔ ti kɛ e nin i nin i osu'n nunfuɛ'm be kwlaa yɛ e trali-ɔ. Ɔ ´yo man be ´yo min nyrun jranfuɛ manndimaan. Afin i wun mantanlɛ ng'ɔ fa mantan min Nyanmiɛn'n, ɔ yili i nglo weiin. Ɔ ti kɛ ɔ kpatali Izraɛlfuɛ'm bé ti, ɔ man n yacili.»

Rɔmfuɛ Mun 14:21

Like nga sɛ an yo-ɔ ɔ ti kpa'n yɛ: nnɛn dilɛ o, nzan nɔnlɛ o, nán an yo like fi bɔ sɛ amun yo-ɔ ɔ saci amun niaan-an.

Hébreu 3:12

Aniaan mun, i sɔ'n ti an `nian amún wun, nán man amun nun wie i anwlɛn'n ɔ yo tɛ, yɛ nán man ɔ `yo kɛ ɔ lafi-man Nyanmiɛn su b'ɔ man ɔ ´yaci Nyanmiɛn b'ɔ lafi-man nin-ɔn.

1 Samiɛl 2:17

Eli i mma'm be aeliɛ tɛtɛ nga be yo i Anannganman i nyrun'n yɛ ɔ o lɛ-ɔ. Ɔ ti-man kpa mlɔnmlɔn, afin be yo ninnge nga be fa man Anannganman'n i finfin.

1 Samiɛl 2:24

Min mma mun, sa nga bɔ amun yo bɔ Nyanmiɛn i nvle nunfuɛ'm be kan sin'n, ɔ ti-man kpa mlɔnmlɔn. Nán amun yo sɔ kun.

1 Samiɛl 2:30

I sɔ'n ti, min Anannganman bɔ n ti Izraɛlfuɛ'm be Nyanmiɛn'n, min waan: ‹Laa n seli kɛ wɔ awlo'n, ɔ nin wɔ akpasua'n be ´jran min nyrun be ´yi tɛ tititi.› Sanngɛ siɛn'n, min Anannganman, min waan: ‹Ɔ su yo-man sɔ kun, afin be nga be bu min sran'n, m ´bu be sran. Sanngɛ be nga be yo min finfin'n, be ´wun nyannzuɛn.