Kalɛ 3:38 - NYANMIƐN NDƐ'N 1998

³⁸ Moiz, nin Aarɔn nin i mma'm be ngblaliɛ liɛ'n wo wia afiliɛ lɔ kan be sin be wlu Anannganman i tannin sua ng'ɔ yi i wun nglo nun'n nun lɔ'n. Be yɛ be ´di Nyanmiɛn i lika'n i nun junman Izraɛlfuɛ'm be kwlaa be dunman nun-ɔn. Sɛ sran wie b'ɔ ti-man Nyanmiɛn i nyrun jranfuɛ'n, i waan ɔ ´di i sɔ junman'n wie'n, be `kun i.

Kalɛ 3:38 ပူးပေါင်းရင်းမြစ်များ

1 Be Nyoliɛ 23:32

Be nian tannin sua'n nin Nyanmiɛn i lika kpa'n su. Anannganman i sua'n nun junman bɔ Aarɔn osu'n nunfuɛ'm bɔ be ti be niaan'm be kle be'n, be nian su be di .

Kalɛ 1:51

Sɛ amun su tu amun bo kɔ lika uflɛ'n, be yɛ be ti i tutufuɛ-ɔ. Blɛ bɔ amun ´kplan amun ngblaliɛ mun'n, be yɛ be ti tannin sua'n i kplanfuɛ-ɔ. Sɛ ɔ min kun bɔ a ti-man Levifuɛ a ko mantan mín tannin sua'n, be ´kun wɔ.

Kalɛ 1:53

San Levifuɛ'm be ngunmin yɛ be ngblaliɛ liɛ'n ɔ `sin yia tannin sua bɔ min alaka'n wo nun nin-ɔn. Be `di nun junman. I liɛ'n, n su fa-man Izraɛlfuɛ'm bé wun ya.»

Kalɛ 2:3

Man Zida sonja'm be akpasua'm be ngblaliɛ liɛ'n ɔ tran wia afiliɛ lɔ. Man be tran sin yia be flanga'n. Man akpasua kunngun'm be su kpɛn kunngun'm be yɛ be yo be nga be kali be'n, bɔ be kwla di sonja'n bé su kpɛn nin-ɔn. Zida akpasua liɛ'n su'n, be fali Aminadab i wa yasua Naksɔn, ɔ sie sran akpi-akpi ableso-nin-nnan sran ya nsiɛn (74.600). Isakar akpasua liɛ'n su, be fali Ziar i wa yasua Nɛtaneɛl, ɔ sie sran akpi-akpi ablenun-nin-nnan sran ya nnan (54.400). Zabilɔn akpasua liɛ'n su'n, be fali Elɔn i wa yasua Eliab, ɔ sie sran akpi-akpi ablenun-nin-nso sran ya nnan (57.400).

Kalɛ 3:10

Sie Aarɔn nin i mma'm be ngunmin, man be di min nyrun jranlɛ junman'n. Sɛ sran kun ti-man min nyrun jranfuɛ, nan ɔ fɛ i wun wla be nun'n, man be kun i.»

Kalɛ 3:23

Gɛrsɔnfuɛ'm be akpasua'm be trantrannin sua'n i bue ng'ɔ kpɛ wia atɔliɛ lɔ'n i sin lɔ.

Kalɛ 3:29

Keatfuɛ'm be akpasua'n i ngblaliɛ'n wo Nyanmiɛn i lika'n i ngua lɔ.

Kalɛ 3:35

Mɛrarifuɛ'm bé su kpɛnngbɛn'n yɛlɛ Abiail i wa Ziriɛl. Be ngblaliɛ liɛ'n wo Nyanmiɛn i lika'n i bue ng'ɔ kpɛ nglo lɔ'n i nun.

Kalɛ 3:37

Awlo klun'n i awa'n ja mun nin be takawlɛ mun, ɔ nin kpɛngbɛ mun, yɛ nyanman mun, be nian bé su wie.