Kalɛ 26:53 - NYANMIƐN NDƐ'N 1998

⁵³ «Ɔ fata kɛ be cɛ mɛn'n nun nan be `fa man akpasua-akpasua mun. Kɛ akpasua kun i nun sran'm be nuan'n fa ti'n, i su yɛ be `nian yɛ be `mɛn i asiɛ liɛ nin-ɔn.

Kalɛ 26:53 ပူးပေါင်းရင်းမြစ်များ

Bo Bolɛ 12:2

N ´yo man ɔ osu'n wa yo nvle dan kun, n ´yo wɔ ye, n ´yo man ɔ dunman'n ´fu. Ɔ dunman nun ti n ´yo sran'm be ye.

Bo Bolɛ 12:7

Kpɛkuun Anannganman fiteli Abram nyrun nan ɔ'a se i kɛ: «N ´fa mɛn nga m ´man ɔ osu'n.» Nan Abram ɔ'a kplan Nyanmiɛn sɔwlɛ kun ɔ'a man Anannganman kan ɔ fiteli i nyrun lɛ'n.

1 Be Nyoliɛ 16:18

Ɔ seli kɛ: «N ´fa Kanaan mɛn'n m ´man wɔ, ɔ ´yo kɛ wɔ aja sa .»

Jue Mun 105:44

Ɔ fali nvle uflɛ wie'm be nunfuɛ'm be asiɛ'n mannin be. Ɔ man junman nga nvle sɔ'm be nunfuɛ'm be dili'n, i nuan like'n kwlaa yoli be liɛ.

Jue Mun 49:14

Be bɔ be lafi be bɔbɔ be wun su'n, sa ng'ɔ ´ju bé su'n yɛ ɔ o yɛ:

Ezekiɛl 47:22

Amun `tu fɔtɔ be fa cɛcɛ, yɛ nán amún wla fi aofuɛ nga be tran amun afiɛn bɔ be wu ba mɛn'n nga nun'n mun. B'a yo ɔnvuɛ amun afiɛn. Amun `bu be akunndan. Man be nyan asiɛ'n wie Izraɛlfuɛ'm be akpasua'm be su.

Daniɛl 7:27

Famiɛn diwlɛ nga be wo asiɛ'n su wa'n, be ´fa be nun famiɛn bia mun, yɛ be ´fa kwlalɛ'n nin be anyrunnyan'n be ´man Nyanmiɛn bɔ like fi nun-mɛn i sin'n i nvle'n nunfuɛ mun. Nyanmiɛn i nvle'n nunfuɛ sɔ'm be famiɛn diwlɛ'n ɔ ´tran lɛ tititi. Yɛ mɛn'n nun siefuɛ'm be kwlaa bé nyin ´yi i, yɛ be ´su i.›

Kalɛ 26:52

Anannganman seli Moiz kɛ:

Kalɛ 26:54

Akpasua nga i nun sran'm be sɔnnin'n, man i lika liɛ'n yo dan, akpasua nga i nun sran'm b'a sɔn-man'n, man i lika liɛ'n yo kaan. Kɛ sran'm bé nuan fa ti'n yɛ be ´fa man be asiɛ nin-ɔn.

Kalɛ 33:54

Kɛ amun ´cɛcɛ asiɛ'n nun'n, amun `tu fɔtɔ. Amun `nian kɛ amun akpasua nin amun osu-osu'm be dan'n ɔ fa ti'n su yɛ amun `yo-ɔ. Be nga be sɔnnin'n, man be lika liɛ nga amun ´man be'n ɔ cɛn, be nga b'a sɔn-man'n, man be lika liɛ nga amun ´man be'n `yo kaan. Nga fɔtɔ'n kle'n, i su yɛ amun `di-ɔ. Kɛ amún si'm be akpasua'm be fa ti'n, i su yɛ be ´nian yɛ be ´man amun asiɛ nin-ɔn.

Matthieu 5:5

Be nga be ti wɛtɛɛfuɛ'n, be liɛ su ti ye, afin mɛn'n ɔ wa yo be liɛ!

Zozie 1:6

Jran kekle, yo yakpafuɛ, afin wɔ yɛ man nvle ng'ɔ wa nyan like nga m boli amun nannan'm be kasiɛ kɛ n ´fa man be nin-ɔn.

Zozie 11:23

Wafa nga Anannganman kan kleli Moiz kɛ ɔ `fa mɛn sɔ'n, i su yɛ Zozie nian fali-ɔ. Ɔ fa cɛcɛli Izraɛl akpasua'm be kwlaa, i sin yɛ Izraɛlfuɛ'm be deli wunmiɛn alɛ kunlɛ nun-ɔn.

Zozie 14:1

Asiɛ nga be fa mannin Izraɛl nvle'n Kanaan mɛn'n nun lɔ mun'n yɛ: Nyanmiɛn nyrun jranfuɛ Eleazar, nin Nɛn i wa Zozie, ɔ nin awlobo kpɛnngbɛn'm be kwlaa be yɛ be fa cɛcɛli Izraɛlfuɛ'm bé ti nun ti nun-ɔn.

Sa nglô yile 21:27

Like fiɛn fi nin sran ng'ɔ fɛ i wun man tete sa yolɛ'n b'ɔ bua ato'n, be su ju-man lɔ. San be nga be klɛli be dunman Bua Gbanflɛn'n i nguan fluwa nun'n be cɛ yɛ be ´ju lɔ-ɔ .

Sa nglô yile 5:10

Ɔ man b'a kaci e Nyanmiɛn'n i awlo sran bɔ be trɛn i nyrun. Be yɛ be ´sie sran mun asiɛ'n su wa-a .»