Kalɛ 19:13 - NYANMIƐN NDƐ'N 1998

¹³ Sran ng'ɔ kan fuɛn nan i waan ɔ wunnzin-man'n, ɔ yo min tranwlɛ'n i fiɛn. Be `kɛn i sɔ sran'n i bo Izraɛlfuɛ'm be afiɛn. Afin kɛ b'a fa-man nzue ng'ɔ tu fiɛn'n wie b'a guɛ-mɛn i su'n ti ɔ tɛ o fiɛn nun.

Kalɛ 19:13 ပူးပေါင်းရင်းမြစ်များ

Ezipt Lɔ Tulɛ'n 30:33

Sɛ sran kun nian ngo nga su sɛnngɛn i liɛ'n nan ɔ fa gua sran ngbɛn wie su'n, be `kɛn i bo i nvlefuɛ'm be afiɛn.› »

Nyanndra Mun 14:32

Sa tɛ nga klunwifuɛ'n ɔ yo'n ɔ mlin i, sanngɛ sran ng'ɔ ti kpa'n i wie cɛn'n nun bɔbɔ'n, i wla gua ase.

Ezekiɛl 44:26

Sɛ ɔ yo sɔ kusu'n, ɔ `wunnzin, yɛ ɔ `minndɛ cɛn ba nso nan ɔ'a di i junman'n ekun.

Saun Yolɛ 15:31

Amun `wla Izraɛlfuɛ'm bé su nun kpa kɛ cɛn nga fiɛn kan be'n, nán be ju min nyrun wa. Sɛ be ju min nyrun wa nan fiɛn kan mín tannin sua ng'ɔ o be afiɛn wa yɛ'n, be ´wu.»

Saun Yolɛ 20:3

M bɔbɔ min e nin i sɔ sran liɛ'n e lɛ i. N ´kɛn i bo Izraɛlfuɛ'm be afiɛn i mma'm be nun kun b'ɔ fa ko yili tɛ mannin Mɔlɔk'n ti. Ɔ'a yo min tranwlɛ'n i finfin, yɛ kusu ɔ'a saci min dunman klanman'n.

Saun Yolɛ 22:3

Nan yoo: min nyrun jranfuɛ'm be awlo'n nunfuɛ kun nga bɔ fiɛn o i wun'n, ninnge nga Izraɛlfuɛ'm be fa mannin min'n, sɛ i sa kan wie, nán be mɛn i atin nan ɔ di min junman'n wie kun. Min yɛ n ti Anannganman nin-ɔn.

Saun Yolɛ 22:4

Min ninnge nga be man min'n, sɛ kokowe o, sɛ kusu loliɛ o ɔ o min nyrun jranfuɛ'n wie wun'n, sɛ i sɔ fiɛn liɛ'n ɔ nian wie-mɛn i wun'n, nán man i nuan kan wie fi. Be nga be o yɛ'n be kusu, nán be nuan kan min ninnge sɔ'm be wie: sran ng'ɔ kan i wiengu kun bɔ i kusu ɔ'a dun mmua ɔ'a kan saka wie'n, b'ɔ man fiɛn ɔ'a kɛn i'n,

Saun Yolɛ 5:17

Like nga bɔ be klɛli i min mmla'n nun kɛ nán be yo'n, bɔ sran kun ɔ'a sunnzun-man kɛ ɔ ´yo i sɔ sa liɛ'n kpɛkuun ɔ'a yo'n, i sɔ'n ti tɛ. Ɔ ´suɛ i su afɛ'n.

Saun Yolɛ 5:3

Sɛ sran kun ´ko kɛn i wiengu b'ɔ si-man kɛ i wiengu sɔ'n fiɛn o i wun'n nan be kɛn i wuun b'a kan fiɛn'n, sɛ ɔ wa si sɔ kasiɛn'n, wuun ɔ'a wlu fiɛn nun.

Saun Yolɛ 5:6

I sɔ sa tɛ liɛ b'ɔ yoli'n i ti man ɔ `fa bua bla kun, wie kusu-ɔ boli bla kun nan be fa ko yi tɛ man min kɛ n `yaci i wun sa'n n cɛ i. Min nyrun jranfuɛ'n ɔ `fa yi tɛ man n yaci ngbata sefuɛ'n i wun sa n cɛ i.»

Saun Yolɛ 7:20

Sran ng'ɔ o fiɛn nun nan ɔ di bo kun yolɛ i su tɛ'n i nnɛn nga be fa man min wie'n, i sɔfuɛ'n, be `tu i Izraɛl nvle'n nun.

Saun Yolɛ 7:21

Sɛ fiɛn o sran wie wun annzɛ nnɛn wie wun annzɛ kusu like uflɛ wie wun'n, nan ɔ min kun nga a kɛn i sɔ ninnge liɛ mun be nun kun nan a di bo kun yolɛ i su tɛ'n i nnɛn'n wie'n, be ´tu wɔ Izraɛl nvle'n nun.»

Kalɛ 15:30

Sanngɛ sɛ sran kun, sɛ ɔnvuɛ o, sɛ aofuɛ o, bɔ nán sanvuɛsa yɛ ɔ nyɛnnin i-ɔ, nan ɔ yo nyinfu sa'n, be `kɛn i bo min mma'm be afiɛn.

Kalɛ 19:14

Mmla uflɛ wie mun ekun yɛ: sɛ sran kun wu i tannin sua'n nun'n, sran kwlaa ng'ɔ wlu i sin lɔ'n, wuun ɔ'a yo fiɛn, ɔ ´ka sɔ lele cɛn ba nso.

Kalɛ 19:18

Sɛ sran yɛ ɔ wuli'n, man sran saun kun fa waka nga be flɛ i izɔp'n i sama kun fa wla nzue'n nun, nan ɔ `fa kpɛntɛn-kpɛntɛn tannin sua nga sran'n wuli nun'n i su. Man ɔ fa nzue sɔ'n wie kpɛntɛn-kpɛntɛn tannin sua sɔ'n i nun ninnge'm be kwlaa nin sran nga be o nun lɛ'm bé su. Sran ng'ɔ kannin sran owie'n annzɛ fuɛn annzɛ asieliɛ'n, man sran ng'ɔ ti saun sɔ'n ɔ fa kpɛntɛn-kpɛntɛn i wun nan ɔ tu i wun fiɛn'n wie.

Kalɛ 19:19

Man sran b'ɔ ti saun'n ɔ tu sran ng'ɔ ti fiɛn'n i wun fiɛn'n, cɛn ba nsan'n su nin cɛn ba nso'n su. I sin, man sran ng'ɔ ti fiɛn'n ɔ kpu i tralɛ mun nan ɔ `wunnzin, kpɛkuun nnɔsua ɔ'a yo saun.

Kalɛ 19:20

Sran ng'ɔ yo fiɛn nan ɔ'a yo-mɛn i wun saun'n, be `kɛn i bo min sran'm be afiɛn. Afin ɔ sacili min sua'n. Kɛ bɔ nzue bɔ be fa kplo fiɛn'n ɔ'a kɛn-mɛn i kplo'n ti, ɔ tɛ o i fiɛn'n nun.

Kalɛ 19:9

Man sran ng'ɔ ti-man fiɛn'n wie'n, ɔ isa nannin'n i nzuɛn'n guɛ i lika b'ɔ ti min liɛ klonglo'n kun nun ngblaliɛ'n sin lɔ. Be `sie nzuɛn sɔ'n lɛ, ɔ ti Izraɛlfuɛ'm be kwlaa be liɛ, be fa gua nzue bɔ be fa kplo bé wun fiɛn'n i nun. I sɔ nzue'n ti kɛ tɛ bɔ be yi be fa kpata min'n sa.

Kalɛ 8:7

Wafa nga a wa fa kplo be wun fiɛn'n yɛ. Kpɛntɛn-kpɛntɛn bé su nzue b'ɔ salo sa tɛ'n. Man be bɔbɔ be fa laliɛ lɛman be yiyi be wunnɛn wunmuan'n su ndrɛ'n, man be kpu be tralɛ mun, man bé wun ɔ sa .

Kalɛ 9:13

Sɛ sran kun ti saun'n, sɛ kusu ɔ'a ɔ-man lika nan i waan ɔ di-man Delɛ-cɛn'n wie'n, man be tu i min nvlefuɛ'm be afiɛn, kɛ bɔ sran sɔ'n ɔ'a yi-mɛn i cɛlɛ ninnge nga be kleli i blɛ kɛ be `yi'n ti'n, ɔ wa sua i tɛ trɔ'n.

Jean 8:24

I sɔ'n ti yɛ n seli amun kɛ amún sa tɛ'n ´ka amun wun nan amun ´wu nin-ɔn, afin sɛ an lafi-man sran wafa nga n ti su'n, amún sa tɛ'n ´ka amun wun amun ´wu.»

Hébreu 10:29

?Sɛ ɔ ti sɔ'n, be nga be yo Nyanmiɛn Wa'n i finfin'n, bɔ be bu-man aenguɛ nga Nyanmiɛn waan ɔ nin sran'm be ´tra i wa'n i mmoja b'ɔ man bé wun sa'n wie'n i like fi'n, bɔ be kpɛ Nyanmiɛn Wawɛ'n b'ɔ yo sran ye'n i nzowa'n, an bu be liɛ'n sɛ? Be liɛ'n ´yo tɛ tra su .

Hébreu 9:10

Afin be ti ndidiɛ ninnge, nin like nɔnnɔnlɛ, ɔ nin wunnzinlɛ fanunfanun'm bé su mmla bɔ be di su lele fa juli cɛn nga Nyanmiɛn kacili like'n kwlaa uflɛ'n.

Sa nglô yile 21:8

Sanngɛ srɛfuɛ mun'n, nin be nga be lafi-man n su'n, nin be nga be yo tete sa'n, nin sran kunfuɛ mun'n, nin bian nin bla kunndɛfuɛ mun'n, nin baefuɛ mun'n, nin amuɛn sɔfuɛ mun'n, nin be kwlaa nga be bua ato'n, be lika liɛ'n yɛlɛ sin dan'n bɔ sufru b'ɔ jue o nun'n. I yɛ ɔ ti wie'n i nnyɔn su nin-ɔn .»

Sa nglô yile 22:11

Sran ng'ɔ yo sa tɛ'n, man ɔ yo wɔ i nyrun, sran ng'ɔ ti fiɛn'n, man ɔ kɛ i fiɛn'n su, sran ng'ɔ ti sran kpa'n, man ɔ yo sa kpa'n wɔ i nyrun, yɛ sran ng'ɔ ti Nyanmiɛn liɛ'n, man ɔ yo i liɛ tititi!»

Sa nglô yile 22:15

Be nga be ti kɛ alua sa'n, be nin baefuɛ mun'n, nin bian nin bla kunndɛfuɛ mun'n, nin sran kunfuɛ mun'n, nin amuɛn sɔfuɛ mun'n, nin be kwlaa nga be bua ato'n, bɔ be yo gblɛgblɛ sa mun'n, be lika liɛ'n yɛlɛ klɔ'n sin lɔ.